وتكەن اپتادان بەرى الەۋمەتتىك جەلى مەن باق-تا قىزۋ تالقىعا تۇسكەن تاقىرىپ - "ساعاديەۆ رەفورماسى" بولدى. جوعارعى وقۋ ورىندارىندا ماماندىقتار دايارلاۋ كلاسسيفيكاتورىنىڭ جاڭارتىلعان نۇسقاسىنا "قازاق ءتىلى", "قازاق ادەبيەتى", "شىعىستانۋ", "لينگۆيستيكا" سەكىلدى بىرقاتار ماماندىقتاردىڭ ەنبەي قالۋى جۇرت نازارىن اۋدارىپ، بجعم-داعى ءبىراز تۇيتكىلدى ماسەلەلەر ءسوز بولىپ، مينيستر ساعاديەۆ سىننىڭ استىندا قالدى. 

وسىدان كەيىن ءۇش كۇن دەگەندە مينيستر ساعاديەۆ مىرزا بەينە جازبا جاريالاپ، اكادەميكتەردىڭ "وتىرىكشى" ەكەنىن ايتتى. سوزدەرىن جوققا شىعاردى. 

وسىدان كەيىن، ۇعا پرەزيدەنتى مۇرات جۇرىنوۆ مىرزا اقىن، كوسەمسوزشى، qazaquni.kz سايتىنىڭ قۇرىلتايشىسى قازىبەك يسانى "جالعان قول ۇيىمداستىردى" دەپ ايىپتادى. 

بۇل ارادا بىزبەن حابارلاسقان بجعم-ءنىڭ وكىلى  ساعاديەۆ مىرزانىڭ"Abai.kz" پورتالىنا سۇحبات بەرەتىنىن ايتتى. ءبىز كۇنى بۇگىنگە دەيىن مينيستردەن جاۋاپ بولىپ قالار دەپ كۇتىپ وتىرمىز. ال، مينيسترگە قاتىستى ماسەلەگە كەلسەك، ول ۋشىعىپ بارادى. نەگە دەسەڭىز، الەۋمەتتىك جەلى بەلسەندىلەرى مەن قوعامنىڭ سەرگەك ويلى ازاماتتارى مينيستر ساعاديەۆ مىرزانىڭ وتستاۆكاعا كەتۋىن تالاپ ەتىپ جاتىر. مينيستر قوعام بەلسەندىلەرىنىڭ بۇل تالابىنا بايلانىستى  "نازارباەۆ ايتسا عانا قىزمەتىمنەن كەتەمىن" دەپ جاۋاپ بەردى. 

ەرلان ساعاديەۆتى جۇرت ءبىلىم سالاسىنا كولدەنەڭ كەلگەن ادام دەيدى. راس پا؟ بجعم تىزگىنىن ۇستاعان مينيستر ەرلان ساعاديەۆتىڭ اكەسى اكادەميك كەنجەعالي ساعاديەۆ اقساقال ەلباسىنىڭ قابىلداۋىندا ءجيى بولىپ تۇراتىن تۇلعالاردىڭ ءبىرى... سونى ەسكەرىپ، ءارى سوڭعى جايتتارعا قاتىستى كەنجەعالي ساعاديەۆ مىرزا نە ايتار ەكەن دەپ، حابارلاستىق.

"اينالايىن بالام، مەن اكە بولعان سوڭ، مەنىڭ پىكىرىم وبەكتيۆتى بولماي قالۋى مۇمكىن. مەنەن دە باسقا پىكىر الاتىن ادامدار بار عوي. ال مامبەت قويگەلدى، ايگۇل ىسماقوۆالارعا كەلسەك - ولاردىڭ ارقايسىسى ءوز پىكىرلەرىن ايتۋعا قۇقىلى. ايتسىن. بجعم-داعى اتقارىلىپ جاتقان جۇمىستارعا كوڭىلىم تولادى", - دەپ شورت كەسىپ، تەلەفون تۇتقاسىن قويا سالدى، اكە ساعاديەۆ. مىنە، وسىلاي.

نۇرگەلدى ابدىعانيۇلى

Abai.kz