بۇگىن "Abai.kz" اقپاراتتىق پورتالىندا قازاقستاننىڭ ءبىلىم جانە عىلىم مينيسترلىگىندەگى بولىپ جاتقان وزگەرىستەر تۋرالى قوس بىردەي ماقالا جاريالاندى. جۋرناليست ءشارىپحان قايساردىڭ "ۇبت سۇراقتارىندا بايان ماقساتقىزى نە ىستەپ ءجۇر، ساعاديەۆ مىرزا؟" اتتى ماقالاسى مەن ساياسي شولۋشى نۇرگەلدى ابدىعانيۇلىنىڭ "بعم "قازاق ءتىلى" ماماندارىن دايىندامايدى" اتتى ماقالاسىندا اتالعان سالاداعى ولقىلىقتار ءسوز بولدى. 

"Abai.kz" اقپاراتتىق پورتالىندا جارىق كورگەن "بعم "قازاق ءتىلى" ماماندارىن دايىندامايدى" اتتى ماقالاعا قاتىستى قر اقپارات جانە كوممۋنيكاتسيالار مينيسترلىگىنىڭ ىقپال ەتۋىمەن قر ءبىلىم جانە عىلىم مينيسترلىگى  رەسمي جاۋاپ ازىرلەپتى. قاراڭىز: 

"Abai.kz" اقپاراتتىق پورتالى رەداكتسياسىنا

قازىرگى ۋاقىتتا مامانداردى دايارلاۋ قازاقستان رەسپۋبليكاسىنىڭ جوعارى جانە جوعارى وقۋ ورنىنان كەيىنگى ماماندىقتار جىكتەۋىشىنە (كلاسسيفيكاتورىنا) سايكەس جۇرگىزىلۋدە.

اتالعان قۇجات جوو-نىڭ ماماندىقتار بويىنشا ءبىلىم بەرۋ قىزمەتىن اتقارۋ قۇقىعىن بەرەتىن ليتسەنزيالاردى الۋعا نەگىز بولادى. بۇل ليتسەنزيا جوو-عا وقۋ باعدارلامالارىن، ونىڭ ىشىندە قازاق ءتىلى مەن ادەبيەتى باعدارلامالارىن ازىرلەپ، ىسكە اسىرۋ مۇمكىندىكتەرىن بەرەدى. 2017 جىلدىڭ 1 اقپانىنان باستاپ ەشقانداي دا جاڭا جىكتەۋىش قولدانىسقا ەنگىزىلگەن جوق. الداعى 2017-2018 وقۋ جىلىنا دا ونداي جوسپارلار بەلگىلەنبەگەن.

جاڭا جىكتەۋىشتى دايىنداۋ جانە قولدانىسقا ەنگىزۋگە ۇزاق ۋاقىت قاجەت – ورتا ەسەپپەن، بۇل جۇمىسقا 1-2 جىل جۇمسالادى. جىكتەۋىشتەگى ماماندىقتاردى وزەكتى قىلۋ جۇمىستارى بەلگىلەنگەن ءتارتىپ بويىنشا، 5 جىلدا ءبىر رەتتەن ءجيى جۇرگىزىلمەيتىنىن اتاپ ءوتۋ قاجەت. وعان نارىقتا جوعارى ءبىلىمدى ماماندارعا دەگەن سۇرانىس مونيتورينگىنىڭ ناتيجەلەرى نەگىز بولا الادى.

سونىمەن قاتار، جاڭا جىكتەۋىش جوباسى دايىندالاتىن بولسا، قر ءبىلىم جانە عىلىم مينيسترلىگى بۇل قۇجاتتى بەكىتپەس بۇرىن، ەڭ الدىمەن مەملەكەتتىك ورگانداردىڭ، قوعامدىق ۇيىمداردىڭ، ونىڭ ىشىندە جۇمىس بەرۋشىلەر مەن اكادەميالىق قوعامداستىقتاردىڭ قاراۋىنا بەرىپ، كەلىسىمدەرىن الادى.

 قر بعم ءباسپاسوز قىزمەتى

ءتۇيىن. بعم-ءنىڭ ءباسپاسوز قىزمەتى بەرگەن مالىمەت پەن اتى-ءجونىن اتاماۋدى وتىنگەن بعم وكىلىمەن ەكەۋارا اڭگىمەمىزدەن كەيىن مىنا جايتتارعا دا جەكە-جەكە توقتالىپ ايتا كەتۋدى ورىندى كوردىك.

بىرىنشىدەن، "جەل تۇرماسا ءشوپتىڭ باسى قيمىلدامايدى" دەيدى اتام قازاق. جوبا بار دەگەن ءسوز، كۇندەردىڭ كۇنىندە ول قولدانىسقا ەنگىزىلەدى دەگەن ءسوز. وسى ماسەلە جونىندە بعم ءباسپاسوز قىزمەتى وكىلىمەن 2 ساعاتتاي (بەلگىسىز سەبەپتەرمەن اتى-ءجونىن جاسىرىپ قالۋدى ءوتىندى) اڭگىمەلەستىك. "نەگە مينيستر ساعاديەۆ مىرزا بىزگە سۇحبات بەرىپ، ماسەلەنىڭ جاي-جاسپارىمەن تۇسىندىرمەيدى؟" دەگەن سۇراعىمىزعا مينستىرلىك وكىلى: "ەندى جاۋاپ بەرەتىن بولادى. مينيستر مىرزا قازىر شىمكەنتتە جۇرگەن كورىنەدى. استاناعا كەلىسىمەن "Abai.kz" پورتالىنا سۇحبات بەرەدى. "الىپپە داۋى" مەن "ساۋات اشۋداعى" شيكىلىكتەر، ەلەكتروندىق كۇندەلىك، ۇبت سۇراقتارى مەن جوو-داعى "قازاق ءتىلى", "قازاق ادەبيەتى", "شىعىستانۋ", "لينگۆيستيكا" سەكىلدى پاندەر توڭىرەگىندەگى تۇسىنىسپەۋشىلىكتەرگە بايلانىستى قوعامدا قوردالانىپ جاتقان سۇراقتاردىڭ بارلىعىنا جاۋاپ بەرىلەتىن بولادى" دەپ سەندىردى. سەنەيىك. از-كەم كۇن كۇتەيىك. ءمينيسترىمىز راسىندا سۇحبات بەرىپ قالار، ەل ءىشىن شۋ-شۇرقان ەتىپ تەككە قاراپ وتىرماس...

ەكىنشىدەن، بعم وكىلى ءابدۋالي قايداري باستاعان اكادەميكتەردىڭ بعم ءمينيسترىنىڭ اتىنا جازعان اشىق حاتتاعى ماسەلەلەردى تەرىسكە شىعارىپ، مۇنداي قۇجاتتىڭ مۇلدە جوق ەكەنىن ايتتى. سوندا كىم وتىرىكشى، بعم بە، الدە ءابدۋالي قايدار، شورا سارىباەۆ، رابيعا سىزدىقوۆا، سەرىك قيراباەۆ، ومىرزاق ايتباەۆ، مامبەت قويگەلدى، ايگۇل ىسماقوۆا، ۇلان ەركىنباي سىندى اكادەميكتەر مەن پروفەسسورلار ما؟ "بۇل كىسىلەردىڭ الگى حاتقا قول قويعان، قويماعانى بەلگىسىز" دەدى مينيسترلىك وكىلى. ەندەشە، ونى دا انىقتايمىز. الداعى ۋاقىتتا جوعارىدا اتتارى اتالعان عالىمداردىڭ ارقايسىسىنىڭ پىكىرىن جاريالايتىن بولامىز.

ۇشىنشىدەن، ەكەۋارا سۇحباتىمىزدىڭ بارىسىندا بعم وكىلىنىڭ مىنا ءسوزى قۇلاعىمىزعا مايداي جاقتى. "ەشكىم ءوز حالقىنا قاستاندىق جاسامايدى" دەدى ول. سويتسەك، ساعاديەۆتىڭ تۇسىندا قابىلدانىپ جاتقان رەفورمالاردىڭ اۆتورى - الدىڭعى مينيسترلەر ەكەن. "بۇل رەفورمالاردى "ساعاديەۆ رەفورماسى" دەپ اتايدى. شىنىندا ولاي ەمەس. بۇل ءسارىنجىپوۆ مىرزانىڭ الدىندا باستالعان رەفورمالار. ەرلان ساعاديەۆ مىرزا تەك ورىنداۋشى عانا. رەفورما دەگەن 10-15 جىلدا جاسالاتىن ۇلكەن جۇمىس. ونىڭ ۇساق-تۇيەگىنە دەيىن قارالۋى ماڭىزدى. ايتپەگەندە ول - قىلمىس", - دەدى اتى-ءجونىن اتاماۋدى وتىنگەن مينيسترلىك وكىلى. "ساعاديەۆ رەفورماسى" دەپ جۇرگەنىمىز ساعاديەۆتىڭ الدىندا باستالعان بولسا، ونى دا قايتادان ساراپتاۋعا بولادى. دەمەك، ءبىلىم سالاسىندا ءالى كۇنگە تياناق تاپپاي كەلە جاتقان رەفورمالاردىڭ ماسەلەسىنە قايتا ءبىر شولۋ جاساۋعا تۋرا كەلەدى.

تورتىنشىدەن, ءبىلىم جانە عىلىم مينيسترلىگى اتىنان جوعارعى ءبىلىم دەپارتامەنتىنىڭ باسشىسى جونتاەۆا جاڭىل الپامىسقىزى "Abai.kz" پورتالىنا سۇحبات بەرمەك. ء بىز جاڭىل حانىممەن "ساۋات اشۋداعى" ساۋاتسىزدىقتار مەن جوو-داعى نەگىزگى پاندەردىڭ جويىلىپ كەتۋى توڭىرەگىندە كەڭىرەك اڭگىمە وربىتەتىن بولامىز. وقىرمان قاۋىم، سالا ماماندارى قازىردەن باستاپ پورتالىمىزدىڭ ەلەكتروندى پوشتاسىنا (abai-akparat@mail.ru) جوعارعى ءبىلىم دەپارتامەنتىنىڭ باسشىسى جونتاەۆاعا ساۋالدارىڭىزدى جولداي بەرسەڭىزدەر بولادى.

بەسىنشىدەن، قازىرگى ۋاقىتتا الەۋمەتتىك جەلىلەردە مينيستر ساعاديەۆ مىرزانىڭ وتستاۆكاعا كەتۋىن تالاپ ەتكەن ۇسىنىستار اتويلاپ تۇر. ماسەلە ابدەن ۋشىققانى تاعى راس. بۇل رەتتە ءبىز، "Abai.kz" پورتالى اتالعان ءىستى اياعىنا دەيىن جەتكىزۋدى قولعا الدىق. بعم-داعى تۇيتكىلدى ماسەلەلەر، ولاردىڭ رۋحاني ءام ساياسي-يدەولوگيالىق قاۋىپى، قارجىلىق شىعىندار مەن باسقا دا وزەكتى مالەلەر الداعى ۋاقىتتا دا كۇن تارتىبىنەن تۇسپەيتىن بولادى.

نۇرگەلدى ابدىعانيۇلى

Abai.kz