ەلدىڭ ەرەك ازاماتتارى قۇساپ حالىقتى قۇتقارىپ قالۋدىڭ جولىن ىزدەپ، ءتۇن بويى كوز ىلمەي جىلاعان جوقپىن. قارا اسپاندى توندىرمەك نيەتىم جانە جوق. تەك، وزدەرىڭىزبەن پىكىر الماسسام دەگەن وي عانا، مەنىكى. ءيا، سول، 26-باپقا بايلانىستى عوي. ءدال قازىر ودان قاتتى نە ويلانتۋى مۇمكىن ءبىزدى؟ قاتتى ويلانتاتىن ءجونى بار. ول - كونستيتۋتسيا عوي ويتكەنى. "كونستيتۋتسيالىق داعدارىس" دەيتىن ساياسي ۇعىمدى بىلەسىزدەر. كونستيتۋتسياعا وزگەرىس ەنگىزەتىن ساتتە تۋىندايتىن قايشىلىق قوي. نەگىزى، ونشا جاعىمدى دۇنيە ەمەس سول، قايشىلىق. ادامزات تاريحىندا ونىڭ قانمەن جازىلعان بەتتەرى كوپ. ءتىپتى، كەشە عانا، 1992-93 جىلدارى ماسكەۋ كوشەلەرىنە تانكتەر شەرۋىن جاساتىپ، اق ءۇيدى زەڭبىرەكپەن اتقىلاتقان كونستيتۋتسيالىق داعدارىستى ءازىر ۇمىتا قويعان جوقپىز. سوندىقتان، كونستيتۋتسيالىق داعدارىستىڭ بەتى اۋلاق بولسىن دەگىم كەلەدى. بىزدە قازىر كونستيتۋتسياعا ەنگىزىلمەك وزگەرىستەرگە بايلانىستى پىكىرتالاس ءورشىپ كەلەدى. حالىقتىڭ سانا-سەزىمى ءبىر جىل بۇرىنعىدان بولەك، قازىر. ءدال سول 26-باپقا بايلانىستى بەيجاي ادام جوق دەپ ويلايمىن. ەگەر كونستيتۋتسيالىق باپقا بايلانىستى پىكىرتالاستى ودان ءارى ورشىتە بەرسە، داعدارىسقا جەتىپ بارۋىمىز دا ابدەن مۇمكىن. ال، ءبىر داعدارىس بىرنەشەۋىنە سەبەپكەر بولاتىنى بەلگىلى. سوندىقتان، ونى ورشىتپەي، قايشىلىقتى تەرەڭدەتپەي، بىتىستىرەتىن جول تاپقان دۇرىس بولماس پا ەدى؟ وتكەندە جاس الاشتانۋشى عالىمداردىڭ وتىرىسىندا "اقجول" پارتياسى مىناداي ويىن ورتاعا سالىپتى:
"26-شى باپتىڭ جەرگە قاتىسى جوق ەكەندىگى اتا زاڭدا جازىلۋى ءتيىس", دەپتى پارتيا جەتەكشىسى ازات پەرۋاشەۆ. بۇل ۇسىنىستى جيىنعا قاتىسقان عالىمدار قولداعان كورىنەدى. كونستيتۋتسيالىق داعدارىستى بولدىرماۋدىڭ، تۋراسىن ايتقاندا قاقتىعىسقا، تەكەتىرەسكە جەتكىزبەۋدىڭ ءبىر جولى رەتىندە وسى ۇسىنىستى تالقىلاپ كورسەك قايتەدى؟

سەرىك جانبولات, جۋرناليست