قازاقستان سىرتقى ىستەر مينيسترلىگى رەسەي مەملەكەتتىك دۋماسىنىڭ دەپۋتاتى پاۆەل شپەروۆتىڭ قازاقستاننىڭ تەرريتوريالىق تۇتاستىعى جونىندە ايتقان سوزدەرىنە قاتىستى رەسەي سىرتقى ىستەر مينيسترلىگىنە الاڭداۋشىلىعىن ءبىلدىردى، - دەپ حابارلادى Ult.kz پورتالى مينيسترلىكتىڭ ءباسپاسوز حاتشىسى ءانۋار جايناقوۆقا سىلتەمە جاساپ.

ءسىم مالىمەتىنشە، كەشە قازاقستان سىرتقى ىستەر ءمينيسترىنىڭ ءبىرىنشى ورىنباسارى مۇحتار تىلەۋبەردى رەسەي سىرتقى ىستەر ءمينيسترىنىڭ ورىنباسارى - ستاتس-حاتشى گريگوري كاراسينمەن تەلەفونمەن سويلەسىپ، ەكى جاقتى ىنتىماقتاستىق ماسەلەلەرىن تالقىلاعان. تاراپتار ايماقتىق جانە حالىقارالىق كۇن تارتىبىندە تۇرعان وزەكتى ماسەلەلەر بويىنشا پىكىر الماسقان.

رەسەيلىك اقپارات قۇرالدارى 27 قاڭتاردا پاۆەل شپەروۆتىڭ مەملەكەتتىك دۋمادا وتكەن "شەتەلدەردەگى وتانداستار: وتكەن شاق پەن قازىرگى ۋاقىت" دەگەن تاقىرىپتاعى دوڭگەلەك ۇستەلدە جاقىن شەتەلدەردەگى، ونىڭ ىشىندە قازاقستانداعى ورىستاردى دياسپورا دەپ اتاۋدى "ساياسي قاتەلىك" دەپ اتاپ، ولار تۇراتىن تەرريتوريانىڭ "رەسەيدىڭ ۋاقىتشا تارتىپ الىنعان جەرلەرى" ەكەنىن ايتقانىن حابارلاعان. شپەروۆ "شەكارالاردىڭ ماڭگىلىك ەمەسىن" ايتىپ، رەسەي جاقىن بولاشاقتا ءوزىنىڭ "مەملەكەتتىك شەكاراسىنا ورالاتىنىن" ايتقان.

ءسىم رەسەي دەپۋتاتىنىڭ سوزىندە ونىڭ قازاقستاننىڭ تەرريتورياسىنا قاتىستى تالاپ-شاعىمى بارى بايقالاتىنىن، بىراق رەسەي جاعى قازاقستان سىرتقى ىستەر مينيسترلىگىنىڭ ۇندەۋىن بايىپتى قابىلداعانىن ايتادى.

اباي-اقپارات