مەن «المااتاگورستروي» قۇرىلىس كومپانياسىنىڭ ديرەكتورى يگور ميلگرامدى ەرتىپ، گاراج سالاتىن ورىندى بەلگىلەدىك. اپاي-توپاي قيمىلداپ، ءبىر تۇندە گاراجدىڭ باسىن قارايتتىق. كەلەسى كۇنى دىنمۇحاممەد قوناەۆ اعامىزعا زامانبەك نۇرقادىلوۆ گاراجدىڭ كىلتىن اپارىپ بەردى. 
زامانبەك اعامىز ديماش احمەتۇلىنا ەرەكشە قۇرمەتپەن قارايتىن.

ءبىر كۇنى ديمەكەڭنىڭ ۇيىندەگى توڭازىتقىش ىستەمەي قالىپتى. زۋحرا جەڭگەمىز «كازتورگوبورۋدوۆانيە» مەكەمەسىنىڭ ديرەكتورى حوحلوۆقا تەلەفون سوعىپ: «توڭازىتقىشىمىزدى جوندەپ بەرەسىزدەر مە؟»– دەپ ءوتىنىش جاساپتى. سوندا حوحلوۆ: «قوناەۆتىڭ جۇبايى بولساڭ قايتەيىن. كۇيەۋىڭنىڭ داۋرەنى الدەقاشان ءوتىپ كەتتى. ەندى ماعان قوناەۆتان قاراپايىم ءۇي سىپىرۋشى الدەقايدا بيىك» دەپ، زۋحرا شارىپقىزىنىڭ نامىسىنا تيەتىن، ودان وزگە دە اۋىر-اۋىر سوزدەر ايتىپتى. مۇنى ەستىگەندە، نۇرقادىلوۆ ورنىنان تۇرىپ كەتىپ، بولمەسىندە ارى-بەرى ءجۇردى دە، وزىنە تەز ارادا حوحلوۆتى الىپ كەلۋدى بۇيىردى. از ۋاقىتتان سوڭ بولمەسىنە كىنالى مىسىقتاي جالتاق-جالتاق قاراۋمەن ەنگەن حوحلوۆقا زاكەڭ: «قوناەۆتىڭ ىسكەرلىگى ارقاسىندا قازاقستاندا بوي كوتەرگەن قىرىق قالانى ايتپاي-اق قويايىن. وسى الماتى قالاسى ءۇشىن ونىڭ قانشاما تەر توككەنىن ۇمىتۋ ازاماتتىققا جاتا ما؟! 
بىرىنشىدەن، زۋحرا شارىپقىزىنان بوسپەلىك، رۋحسىزدىق ءسوزىڭ ءۇشىن كەشىرىم سۇرايسىڭ. 
ەكىنشىدەن، توڭازىتقىشىن ءبىر ساعاتتىڭ ىشىندە جوندەپ بەرەسىڭ. بۇل تاپسىرمام ورىندالماسا، ەكى ساعاتتان كەيىن جۇمىستان كەتەسىڭ. وسى ەكى تالاپتىڭ قايسىسىن ورىندايسىڭ؟» – دەپ، حوحلوۆقا تەسىلە قاراعاندا، ول: ء«بىرىنشىسىن، ءبىرىنشىسىن… وعاش مىنەزىم ءۇشىن زۋحرا شارىپقىزىنان دا، سىزدەن دە كەشىرىم سۇرايمىن» – دەدى، باسىن تومەن ءيىپ.»

ديمەكەڭ ءوزىنىڭ كەمەل باسشىعا ءتان پاراساتىمەن، عاجاپ كىشىپەيىلدىلىگىمەن جانە زامانا اعىمىنا ۇندەسەمىن دەپ جىبەرگەن كەيبىر كەمشىلىكتەرىمەن دە قوسا ەسكەرىلۋگە، ارداقتالۋعا ءتيىستى ساياسي تۇلعا ەكەنى داۋسىز.

ەرقانات تۇرسىنجانۇلىنىڭ فەيسبۋكتەگى پاراقشاسىنان الىندى