ءبىر جولى جازۋشىلار وداعىنىڭ ءبىرىنشى قاباتىندا، قىزىل كوستەمدى وتەجان اقىن نۇرعاليەۆ اعاممەن كەزدەسىپ قالدىم. امان-ساۋلىقتان سوڭ (و كەزدە سىنشى دەگەن اتىم شىقپاسا دا، ءار ءتۇرلى جيىنداردا سيرەك تە بولسا اتى-ءجونىم ايتىلىپ قالاتىن), قاشاندا دا توسىن، اياق استى سۇراق پەن جاۋاپقا اۋەس، ءسوزدى كەسىپ ايتۋعا بەيىم وتەجان اعام:

- امانحان، شىنىڭدى ايتشى، مەن مىقتىمىن با، قادىر مىقتى ما؟ - دەگەنى. وندايدا، جالپىلاما جاۋاپ بەرىپ، تۇيىقتان شىعىپ كەتۋدى اجەپتەۋىر مەڭگەرىپ قالعان باسىم "تۇلكى قۇيرىققا "سالىپ-اق باقتىم. بولمادى. ەكەۋىنىڭ دە مىقتى ەكەنىن بىلەمىن."ەكەۋىڭىزدە مىقتىسىزدار" دەسەم، ءبارى ءبىر وتەجان اعا ء"وزىن مىقتى" دەۋدى كۇتىپ تۇر. سوندىقتان، جاۋابىما قاناعاتتانبايدى. ال، قادىر اعانى جىعىپ بەرگىم كەلمەيدى. ول وتەاعاڭنان مىقتىلىقتى قىزعانۋ ەمەس، قادىر اعاعا دەگەن ءىلتيپاتىمدى،قۇرمەتىمدى جەر ەتپەۋ. جەمە - جەمگە كەلگەندە شىعارماشىلىق پرينتسيپ. ايتپەسە، "كىم ءبىلىپ، ەسىتىپ جاتىر" دەگەن ويمەن، وتەجان اعانىڭ كوڭىلىن تاۋىپ، ماسەلەدەن وڭاي قۇتىلىپ كەتۋگە بولادى. و كىسى جاۋاپتى كۇتىپ تۇر. سوندا دا، سوزىمنەن تانباي:

- وتەجان اعا، ەكەۋىڭىزدىڭ شىعارماشىلىق، اقىندىق ستيلدەرىڭىز ءار ءتۇرلى. ءبىر بىرلەرىڭىزگە ۇقسامايسىزدار! سوندىقتان، ەكەۋىڭىز دە مىقتىسىزدار عوي! - تۇرىپ الدىم. و كىسى مەنى گرۋزيننىڭ مەنشەۆيگى چەحيدزە دەيتىن. اقىرى، سوزىمنەن قايتپايتىنىمدى ءبىلدى مە، قۇرمەتتى اعام:
- ءبىلىپ تۇرمىن، قادىردى قيمايسىڭ. مەن 6-7 جىل ەلگە كەتكەن كەزدە، ول سەندەردى، جاستاردى جاۋلاپ العان. مىقتىسىنا مىقتى ول، بىراق، مەنىڭ جىلىگىمدى شاقساڭدار، ودان ماي شىقپايدى، شىندىق شىعادى، - دەدى دە، اڭگىمەنى باسقا تاقىرىپقا بۇردى.

سو جىلدارى وتەجان اعانىڭ "سوعىستىڭ سوڭعى جازى" اتتى باللادار جيناعى شىققان كەز. و كىتاپتىڭ جارىق كورۋى دە قيىن بولدى. ءار ءتۇرلى كەدەرگىلەر كوپ كەزدەستى. قىسقارتىلدى. وتەجان اعا سوعان قاناعاتتانبايتىن.قاپالاناتىن. ونى سول قينايتىن. مىنە، دوستارىم، جاتقان جەرلەرى جايلى بولعىر ارداقتى، مەن قۇرمەتتەگەن، مەنى جەككورمەگەن اعالارىممەن وسىنداي دا ءازىل-قالجىڭ، ويىن-كۇلكىگە باراتىنبىز.

امانحان ءالىم

Facebook-تەگى پاراقشاسىنان