پاۆلودار. 26 قىرقۇيەك. قازتاگ – الماتى قالاسىندا ورنالاسقان قر ءىىم ىشكى اسكەرلەرىنىڭ 5571 بولىمشەسىندە قىزمەت اتقارعان قاتارداعى قازبەك تەمىرحانوۆتىڭ تۋىستارى ۇلدارى وزىنە-ءوزى قول سالدى دەگەنگە سەنبەيدى. ەكىباستۇزدان اسكەرگە شاقىرىلعان اسكەري قىزمەتكەر جەكسەنبى كۇنى ءولى كۇيى تابىلعان. تەمىرحانوۆتاردىڭ وتباسىنا ۇلدارىنىڭ قازاسى تۋرالى 26 قىرقۇيەك كۇنى تاڭەرتەڭ حابارلاندى.

«بۇگىن تاڭەرتەڭ اسكەري بولىمشەدەن قوڭىراۋ شالىندى، ۇلىمىز قازبەكتىڭ اسىلىپ قالعانى تۋرالى حابارلادى»، - دەدى قاتارداعى جاۋىنگەردىڭ اكەسى ورازالى تەمىرحانوۆ.

ونىڭ ايتۋىنشا، وتباسىنا تاڭعى ساعات 10 شاماسىندا قوڭىراۋ سوعىلعان.

«وقيعا 26 قىرقۇيەكتە قاراۋىل قىزمەتىنىڭ ءدال قاسىندا بولعانى بەلگىلى بولدى. ۇلىمىزدىڭ وزىنە-ءوزى قول سالعانىنا سەنبەيمىز. ونىڭ اسكەردە جۇرگەنىنە ءبىر جىل بولدى عوي. 23 قىرقۇيەكتە ول ماعان تەلەفون سوقتى، مەن ونىمەن سويلەستىم، ءبارى جاقسى بولدى. ول ءبىر ايدان كەيىن ۇيگە كەلەتىنىن ايتقان ەدى. دۇيسەنبى كۇنى دەموبيليزاتسيا تۋرالى جالپىاسكەري بۇيرىق شىعادى دەدى. بۇعان دەيىن البومعا دەپ 10 مىڭ تەڭگە سۇرادى. ال ەڭ باستىسى، پوليتسيا بولعىسى كەلەتىنىن، بۇل ءۇشىن جوعارى ءبىلىم العىسى كەلەتىنىن ايتقان. ونىڭ كۇتپەگەن جەردەن اسىلىپ قالعانىنا قالاي سەنۋگە بولادى؟»، - دەيدى بالانىڭ اكەسى.

ق. تەمىرحانوۆتىڭ اتا-اناسى جاعدايدىڭ انىق-قانىعىن انىقتاپ، قوعامنان قولداۋ سۇراپ وتىر. ولاردىڭ وكىلى 5571 بولىمشەسىنە اتتاندى. ولار ازىرگە ۇلىنىڭ دەنەسىن ەكىباستۇزعا جەتكىزىلۋىن كۇتىپ وتىر. وسىدان ءبىر اي بۇرىن ق. تەمىرحانوۆ 20 جاسقا تولعان بولاتىن.