بۇگىن «ەلىمىزدەگى تاريحي-مادەني مۇرا ەسكەرتكىشتەرىنىڭ قازىرگى جاي-كۇيى» تاقىرىبىمەن وتكەن «نۇر وتان» پارتياسى «ميراس» قوعامدىق كەڭەسىنىڭ كوشپەلى وتىرىسىندا قر مادەنيەت قايراتكەرى سادۋاقاس اعىتاەۆ وسىلاي دەپ مالىمدەدى.

«بۇگىنگى كۇنى رەستاۆراتسيا سالاسىندا ليتسەنزيا العان مەكەمەلەر كوبەيدى. نارىقتىق ەكونوميكاعا بەيىمدەلىپ جاتقان جايىمىز بار. قاجەتتى عىلىمي تاجىريبەلىك دەڭگەيدى تالاپ ەتەتىن بۇل سالادا ازىرگە تەك قانا كەمشىلىكتەردى عانا اتاپ ايتا الامىز. «سىن تۇزەلمەي، ءمىن تۇزەلمەيدى». دەگەنمەن، ارقايسىسىنىڭ ورنى بولەك  تاريحي، مادەني قۇندىلىعى قايتالانباس مۇرامىزدا جاسالىپ جاتقان كەز كەلگەن جۇمىس مەملەكەتتىك دەڭگەيدە ساپا تۇرعىسىناان تەكسەرىلىپ وتىرۋدى تالاپ ەتەدى»، - دەدى ول.

«بىردە-ءبىر وبلىستا رەستاۆراتسيا سالاسىن تۇسىنەتىن، ەكسپەرتتىك باعا بەرە الاتىن مەكەمەنىڭ جوقتىعىن ەسكەرسەك، بۇل فۋنكتسيا جەدەل تۇردە شەشىمىن كۇتىپ تۇرعان باستى ماسەلەلەلەردىڭ ءبىرى ەكەندىگى تۇسىنىكتى بولادى. قۇرىلىستا ۋاكىلەتتى ورگاننىڭ تاۋەلسىز ەكسپەرتيزا فۋنكتسياسىن اتقاراتىن مەملەكەتتىك مەكەمەسى ساپا ماسەلەسىن قاداعالايدى. مادەنيەت جانە سپورت مينسترلىگىندە وسىنداي مەكەمە اشىلۋى كەرەك نەمەسە باسقا ءبىر مەكەمەگە بۇل فۋنكتسيا جۇكتەلۋى كەرەك»، - دەپ اتاپ ءوتتى ساۋلەتشى عالىم.

ايتا كەتەيىك، ءىس-شارا بارىسىندا ارنايى ازىرلەنگەن كورمە ۇسىنىلىپ، مادەني ەسكەرتكىشتەردى رەستاۆراتسيالاۋ، كونسەرۆاتسيالاۋ، قايتادان جاساۋ جۇمىستارىنىڭ ساپاسى، قورىق-مۇراجايلاردىڭ مادەني ءتۋريزمدى دامىتۋعا قوسار ۇلەسى، تاريحي-مادەني مۇرا وبەكتىلەرىن قورعاۋ جانە پايدالانۋ تۋرالى زاڭنامالاردىڭ ورىندالۋى ماسەلەلەرى قارالدى.

وتىرىسقا قر پارلامەنتى دەپۋتاتتارى، سونداي-اق قۇزىرلى ۆەدومستۆولار باسشىلىعى، تاريحشى عالىمدار مەن ساۋلەتشىلەر، مۇراجاي سالاسىنىڭ وكىلدەرى قاتىسىپ، ەسەپتىك باياندامالار جاسادى.

اباي-اقپارات