مۇحتار شەرىم. كرەسلونىڭ ماحابباتى
پرەزيدەنت سايلاۋىنان كەيىن مينيسترلەر بيلەپ ءجۇردى، اكىمدەر ءان سالىپ كەتتى. وزدەرىڭىز بىلەسىزدەر، لاۋازىمدارىندا قالىپ، قايتا تاعايىندالعان شەنەۋنىكتەردىڭ تاڭدايلارى تاقىلداپ، بۇيرەكتەرى بۇلكىلدەپ، جۇرەكتەرى لۇپىلدەپ، كوڭىلدەرى «كوسموسقا» ۇشتى. سول ەكەن، قاراپايىم، كادىمگى قازاقي، ارقاسى جوق ورىندىقتار، «تابۋرەتكالار»، ءبىر ياعى سىنعان مۇگەدەك ورىندىقتار ورە تۇرەگەلىپ، استانادا نارازىلىق شەرۋىن وتكىزدى.
–كرەسلولار وتستاۆكاعا كەتسىن!
–سولار عانا قايتا تاعايىندالا بەرە مە، نە؟
–وزدەرىنە وتىراتىن مينيسترلەر مەن اكىم-قارالاردىڭ ىشىندە باستارى ىستەمەيتىن، تەك ءوز قۇلقىنىن عانا ويلايتىندار بار، تىم بولماسا كرەسلولارىن اۋىستىرسىن!
–شەنەۋنىك كرەسلو بىتكەن جان-جاعىنا شىر كوبەلەك اينالا الادى! ءبىز بەيشارالار اينالساق، شيقىلداپ قۇلاپ قالامىز! اشپىز...
–بىزگە تەك بازارداعىلار عانا وتىرادى، – دەپ ءتۇڭىلدى جاس تابۋرەتكا قىز.
–مەن كەدەي ءۇيدىڭ ورىندىعىمىن... شيقىلداپ اۋىرىپ ءجۇرمىن... –دەدى ەكى رەت اياعى سىنىپ، قايتا شەگەلەنگەن ورىندىق جىگىت جىلامسىراپ.
ء–بىزدىڭ دە كرەسلوعا اينالعىمىز كەلەدى!
ورىندىقتار وسىلاي شۋلاپ، ۇرانداتىپ جاتقاندا، پوليتسەيلەر كەلىپ، بىرنەشە ورىندىقتى دۋبينكامەن ۇرىپ قيراتتى... تابۋرەتكالار مەن وتىز ورىندىقتى ۇستاپ الىپ، قاماپ قويدى... قىزدار ۋنيۆەرسيتەتىندە وقىعان، سىمباتتى ورىندىق بويجەتكەن بار ەدى، پوليتسەيلەردەن قاشىپ شىعىپ، مينيسترلىك عيماراتىنا بايقاتپاي كىرىپ كەتتى. پرەمەر-ءمينيستردىڭ قابىلداۋ بولمەسىندە ەشكىم جوق ەكەن. قاز-قاتار تىزىلگەن، ءساندى ورىندىقتارعا سالەم بەرىپ، كابينەتكە كىردى. ءساندى ورىندىقتار مۇرىندارىن ءشۇيىرىپ، سىبىر-سىبىر ەتە قالىستى. كابينەتتەگى كرەسلو جىگىت ءوز كوزىنە ءوزى سەنبەدى:
–وي، ورىنگۇل، قايدان ءجۇرسىڭ؟ جانىم مەنىڭ! –دەپ قۇشاعىن جايدى. ورىندىق قىز كۇلىمسىرەپ، جىلى جىميىپ، كرەسلونىڭ الدىنا وتىردى.
ء–وزىڭ عوي، حابارلاسپاي كەتكەن... ءمينيستردىڭ كرەسلوسى بولعالى ءبىزدى مەنسىنبەيتىندى شىعاردىڭ...
–قويشى، جانىم... ءبىز ەكەۋمىز اعاش، رەيكا كەزىمىزدەن تانىسپىز عوي. سوتكامنىڭ «ەدينيتساسى» تاۋسىلىپ...
–قايتا تاعايىندالۋىڭمەن!
–راحمەت. پرەمەر-مينيستر مىرزانىڭ ارقاسى. قايتا-قايتا تاعايىندالا بەرەدى... جانىم، مەنى سۇيەسىڭ بە؟
–يا...
–ەستۋىمشە، «سكامەيكا» دەگەن ءبىر ورىس ورىندىق ساعان قىرىنداپ ءجۇر دەيدى
عوي؟
–قويشى سونى... بويى قىرتيىپ تابۋرەتكا اعاي دا ءسوز ايتادى ماعان... قاقباس دەسە.
–مىنا كابينەتتەن جاالىقتىم! –دەدى كرەسلو كۇرسىنىپ، ء–جۇرشى، قول ۇستاسىپ، شىمكەنتكە قاشىپ كەتەيىكشى...
ء–ولا، سەن شىمكەنتتەنسىڭ بە، نە؟ ورالدانمىن دەپ ەدىڭ...
–سەن دە شىمكەنتتەن ەكەنسىڭ عوي، الماتىدانمىن دەپ ەدىڭ...
سول ەكەن، كابينەتكە كىرىپ كەلگەن پرەمەر-ءمينيستردىڭ كومەكشىسى ورىندىقتى سيراعىنان ۇستاپ، تەرەزەدەن لاقتىردى. جۇرەگى جىلاعان كرەسلو جىگىت تە كوپ قاباتتى عيماراتتىڭ تەرەزەسىنەن ءوزىن-ءوزى تاستاپ جىبەردى... تومەندە قوس عاشىقتىڭ قيراندىسى ارالاسىپ، شاشىلىپ جاتتى... بەۋ، اعاش ماحاببات...
Abai.kz
