وپپوزيتسيا دەگەننىڭ ءوزى بىتىراپ كەتتى عوي. بۇرىن وسىنداي سايلاۋلاردان كەيىن ءبارىمىز جينالىپ، باعا بەرىپ جاتاتىنبىز. بۇگىندە و دا جوق.

سوندىقتان سايلانعان پرەزيدەنتكە مەن ءبىر تىلەك ايتايىن. بۇل - مەنىڭ جەكە پىكىرىم.

نۇرسۇلتان ءابىشۇلى!

سايلاۋ ءبىتتى. تاققا قايتا وتىردىڭىز.

ەندىگى جەردە ءوزىڭىز ايتقان رەفورمالاردى دەرەۋ قولعا الىڭىز!
اسىرەسە، ساياسي رەفورما، زاڭدار مەن اتا زاڭعا وزگەرتۋ سەكىلدى ماڭىزدى شارۋالارعا باسا كوڭىل ءبولىڭىز. قوعامدا قالىپتاسقان پىكىر-وي الۋاندىعىن ەسكەرىپ، مەيلىنشە كەڭ قامتىڭىز، ويتكەنى، وسى جىلدار ىشىندە ءوزىن نە بيلىكتە، نە وپپوزيتسيادا كورگىسى كەلمەيتىن جاڭا كۇشتەر مەن تۇلعالار قالىپتاسىپ قالدى.

ساياسي ولىمدەردىڭ شىندىعىن اشۋ، تاۋەلسىز باق-تى قۋدالاۋدى دوعارۋ سەكىلدى شارۋالار كەزەك كۇتتىرمەيتىنى انىق.

وسى جىلدارى ماڭايىڭىز وركەنيەتتى تۇردە زاڭ اياسىندا قىزمەت جاساي الاتىن ساياسي وپپوزيتسيانىڭ بىت-شىتىن شىعاردى: ءبىرىن قۋدالادى، ءبىرىن وزىنە بەيىم قىلىپ الدى. ول پارتيالارعا ەل سەنبەيدى. ال، رەسمي وپپوزيتسيا بولماعان سوڭ، بيلىككە سىن ايتۋشىلار بەيرەسمي، زاڭنان تىس الاڭعا شىعىپ كەتىپ جاتىر. ول بولسا، ەكسترەميزم مەن تەرروريزم، راديكاليزم مەن بىتىسپەۋشىلىككە ۇلاسۋدا! سوندىقتان دا بىزگە جاساندى ەمەس، شىنايى، وكىمەتكە بالاما ۇسىنىس ايتا الاتىن، ەڭ باستىسى، ەل تاۋەلسىزدىگىن تۋ ەتىپ ۇستاي الاتىن، سول ءۇشىن جانىن بەرە الاتىن ساياسي كۇش كەرەك! سول جاعىن دا ويلاڭىز. ياعني، قوعامدا قالىپتاسىپ كەلە جاتقان سول كۇشتەرگە قىسىم جاسالماۋى ءتيىس!

بەرگەن ۋادەڭىز سول باياعى شەنەۋنىكتەردىڭ قولى مەن قۇزىرىندا قالىپ، بايانسىز بوپ كەتپەسىن!

جاڭا مەرزىمىڭىز الدا تۇر. وسى كەزەڭدە اينالاڭىزداعى كۇشتەر ەلگە سىيدىرماي، سىرتقا ىعىستىرىپ جىبەرگەن مىقتى قازاقتاردى ەلگە قايتارساڭىز. ءوز باۋىرلارىڭىز عوي، كەيبىرى، ءتىپتى بالالارىڭىزبەن جاستى ەمەس پە؟ ول ءبىر ساۋاپتى ءىس بولار ەدى. قوعام ول باستاماڭىزدى ءسوزسىز قولدار ەدى.

الدا پارلامەنتتىك سايلاۋ. قوعامدا بار بارلىق ساياسي كۇشتەردى سونىڭ قۇرامىنا نەگە ەنگىزبەسكە؟ الۋان ءتۇرلى پىكىرلەردىڭ ورتاق  قازانى بوپ قايناپ جاتسىن! بارشامىز ءزارۋ بوپ جۇرگەن اقيقات سول قازاندا پىسپەي مە؟

ايتپاقشى، كونستيتۋتسيا بويىنشا وتستاۆكاعا كەتەتىن ۇكىمەتىڭىزدى دە ءبىر سىلكىلەپ الساڭىز! ايتپەسە، ءسىز تاپسىرما بەرمەسەڭىز، جۇمىس ىستەي المايتىندار تولىپ ءجۇر ىشىندە. بىزگە جاڭاشا، زامان تالاپتارىنا ساي، ەلمەن جۇمىس ىستەي الاتىن، جاۋاپكەرشىلىكتى موينىنا الاتىن ۇكىمەت كەرەك! بەلگىلى ءبىر كەزەڭگە باعدارلاما جاساپ، سونى ۋاقىتىندا ورىنداي الماسا، ءوز ەركىمەن وتستاۆكاعا كەتەتىن ۇكىمەت كەرەك!

بيلىك ينستيتۋتتارى جاڭارسا، قوعام دا جاڭارارى ءسوزسىز!

ازىرشە – وسى.

P.S. بۇل - مەنىڭ عانا تىلەگىم. وپپوزيتسياداعى باسقالار وزگەشە ويلاۋى مۇمكىن. بىزدە قالىپتاسقان جاعداي بويىنشا مەنىڭ بۇل پىكىرىم پرەزيدەنتكە جەتەدى جانە ول وعان قۇلاق اسادى دەگەنگە سەنە قويمايمىن. بىراق مەنىڭ پوزيتسيامدى قوعام ءبىلسىن دەگەن ويمەن جازىپ وتىرمىن.

Abai.kz