ساياساتتانۋشى رۇستەم قادىرجانوۆ 2015 جىلعى سايلاۋدىڭ ۇيىمداستىرىلۋىنا جوعارى باعا بەردى

بيىلعى سايلاۋ ناۋقانى بارىسىندا مەملەكەت تاراپىنان ناقتى جۇمىستار اتقارىلدى. بۇل تۋرالى ساياساتتانۋشى، فيلوسوفيا عىلىمدارىنىڭ دوكتورى رۇستەم قادىرجانوۆ BNews.kz تىلشىسىنە بەرگەن سۇحباتىندا ايتتى. ول بيىلعى سايلاۋ ناۋقانى ەرەكشە بولعانىن مالىمدەدى.

«مەن قازاقستان تاۋەلسىزدىگىن العاننان بەرگى سايلاۋلاردى قاداعالاپ ءجۇرمىن. بۇگىنگىدەي سايلاۋ بولعان ەمەس. سايلاۋ مەملەكەت پەن قوعامنىڭ ءوزارا بايلانىسىن نىعايتادى. مۇندا ءبىز مەملەكەت تاراپىنان ناقتى جۇمىستار اتقارىلعانىن كورىپ وتىرمىز. ۇيىمداستىرۋ جۇمىستارى جوعارى دەڭگەيدە جۇرگىزىلگەن. بيىل سايلاۋ ۋچاسكەلەرىنىڭ سانى ارتقان، وسك، اكىمدىكتىڭ قىرۋار جۇمىس اتقارعانى بايقالادى. قوعام تاراپىنان دا جاۋاپ بولدى: ءبىز بۇرىنعى سايلاۋلارعا قاراعاندا حالىق داۋىس بەرۋگە ەداۋىر كوپ كەلىپ جاتقانىن كورىپ وتىرمىز»، - دەيدى رۇستەم قادىرجانوۆ.

ساراپشىنىڭ ايتۋىنشا، سايلاۋ ناۋقانى تەك داۋىس بەرۋ كۇنىن عانا ەمەس، ۇگىت-ناسيحات كەزەڭىن دە قامتيدى. بۇل تۇستا اتالعان ناۋقاننىڭ دا ماڭىزى زور، ەرەكشە بولىپ تابىلادى. بيىلعى جىلى ۇگىت-ناسيحات ماتەريالدارى وتە مىقتى بولدى. بۇل قوعامنىڭ ساياسي مادەنيەتىنىڭ وسكەنىن، حالىقتىڭ بيلىككە سەنەتىنىن كورسەتىپ وتىر.

«مەن تاڭەرتەڭ قازگيدرومەتتە داۋىس بەردىم. تاڭعى 10-عا تامان سايلاۋ ۋچاسكەسىنە كەلسەم، كەزەك كۇتىپ تۇرعان حالىقتىڭ قاراسى قالىڭ ەكەن. مۇنداي كوپ سايلاۋشىنى بۇرىن-سوڭدى كورمەپ ەدىم. مەنىڭشە، بيىل سايلاۋشىلاردىڭ سانى 90%-دان كەم تۇسپەيدى. ءتىپتى ازداپ كەزەك كۇتۋگە دە تۋرا كەلدى. بۇگىنگى كۇن ماعان مەرەكە سياقتى. حالىقتىڭ كوڭىل-كۇيى كوتەرىڭكى»، - دەپ ءبولىستى ويىمەن ساياساتتانۋشى.

اباي-اقپارات.