سيريالىق وپپوزيتسيا قازاقستاننان كەزەكتى رەت ماسكەۋدە 6-9 ءساۋىر ارالىعىندا وتەتىن سيرياارالىق كەلىسسوزدەرگە قاتىسۋىن سۇراۋعا نيەتتى، دەپ مالىمدەدى سيرياارالىق كەزدەسۋدىڭ قاتىسۋشىسى، ساياساتكەر راندا كاسسيس.

راندا كاسسيس

بۇل تۋرالى «ريا نوۆوستي»-عا سىلتەمە جاساپ NUR.KZ حابارلايدى.

«مەن قازاقستان پرەزيدەنتى نۇرسۇلتان نازارباەۆقا ماسكەۋدەگى جيىنعا قاتىسقان بىرنەشە وپپوزيتسيونەرلەردەن قۇرالعان جۇمىسشى توپپەن جانە جيىنعا قاتىسپاي قالعان وزگە وپپوزيتسيونەرلەرمەن كەزدەسۋدى سۇراپ، حات جولداماقشىمىن»، — دەدى كاسسيس Sputnik اگەنتتىگىنە.

كاسسيس: «بۇل توپتى قۇرۋ ءۇشىن ءبىز جۇمىس جوسپارىن جاساۋدى باستاپ، ماسكەۋلىك باستامانى دا قولداي الاتىن مەحانيزمدەر ويلاستىرۋىمىز قاجەت»، — دەگەندى العا تارتادى.

ساياساتكەر قازاقستاننىڭ بۇۇ قاۋىپسىزدىك كەڭەسىنە مۇشە بارلىق ەلدەرمەن جاقسى قارىم-قاتىناس ورناتقان بەيتاراپ مەملەكەت ەكەندىگىنە باسا نازار اۋدارتتى. «قازاقستان تاراپىنان جاعىمدى بەلگىلەر بار»، — دەدى سيرياارالىق كەلىسسوزدەردىڭ قاتىسۋشىسى.

سيريا بيلىگى مەن وپپوزيتسياسى اراسىنداعى كەلىسسوزدەردىڭ ەكىنشى كەزەڭى ماسكەۋدە دۇيسەنبى كۇنى باستالدى. كەزدەسۋ 9 ساۋىرگە دەيىن جالعاسىن تاپپاق.

«شاباب» ۇلتتىق سيريالىق پارتياسى باس حاتشىسىنىڭ كومەكشىسى سۋحەيرا سۋرمەنيدىڭ ايتۋىنشا، ماسكەۋدەگى سيرياارالىق كەزدەسۋدىڭ كۇن تارتىبىنە ۇلتتىق تاتۋلىقتى جاقىنداتتىرا ءتۇسۋ، ءارى بيلىك پەن وپپوزيتسيا سۇيەنەتىن سەنىمنىڭ ولشەمىن زەرتتەۋ ءۇشىن ساياسي ءۇردىستى ىسكە قوسۋ كىرەدى.

تالقىلاۋلاردىڭ العاشقى كەزەڭى قاڭتاردىڭ اياعىندا ءوتتى. وعان سيريانىڭ ازاماتتىق قوعامى مەن وپپوزيتسياسىنىڭ 30-دان استام وكىلدەرى قاتىستى.

كەزدەسۋلەر بارىسىندا ورتاق پلاتفورما قۇرىلىپ، سيريا بيلىگى وكىلدەرىمەن تالقىلاۋلار جاسالىندى. ناتيجەسىندە، ۇلتتىق تاتۋلىقتىڭ ساياسي پلاتفورماسىن قۇرۋدى قامتيتىن «ماسكەۋلىك قاعيداتتار» كەلىسىلدى.

اباي-اقپارات