6 ساۋىردەن باستاپ«حابار» ارناسىندا ء«ومىر ساباقتارى» اتتى جاڭا دەرەكتى دراما كورەرمەنگە جول تارتتى. جاڭا جوبانىڭ باستى ماقساتى – رۋحاني-ادامگەرشىلىك قۇندىلىقتار مەن ادام بويىنداعى ىزگى قاسيەتتەردى ناسيحاتتاۋ ارقىلى كورەرمەنگە تاعلىمدى ساباق بەرۋ. «تەلەتۋىندىعا  ومىردەن الىنعان شىنايى وقيعالار ارقاۋ بولدى، سوندىقتان ءتۇسىرىلىم بارىسىندا كينو ەلەمەنتتەرىن پايدالانۋدى ءجون كوردىك»، - دەيدى جوبا رەجيسسەرى ايبول سەيىلحان.

بۇگىندە «حابار» ارناسىنىڭ تاپسىرىسى بويىنشا «Mass Media Group» كومپانياسى تەلەتۋىندىنىڭ تۇسىرىلىمدەرىن جۇرگىزىپ جاتىر. رولدەردى سومدايتىن اكتەرلەر كەيىپكەر تابيعاتىنا، بولمىسىنا ساي ىرىكتەلىنىپ، كاسىبي شەبەرلىكتەرى ەرەكشە نازارعا الىنۋدا. ال جوبانىڭ جارىققا شىعۋىنا ات سالىسىپ، نەگىزگى باستاماعا قولداۋ كورسەتكەن باۋىرجان يبراگيم «بۇل جوبا مەنىڭ ومىردەن تۇيگەنىمنىڭ جەمىسى. ء«ومىر ساباقتارى» قوعامعا رۋحاني ازىق بەرىپ، جاقسىلىققا جەتەلەسە، نۇر ۇستىنە نۇر بولار ەدى» دەي كەلىپ، ء«ومىر ساباقتارى» جالپى كورەرمەننىڭ كوڭىلىنەن شىعادى دەگەن سەنىم ءبىلدىرىپ وتىر. درامانىڭ باستى ۇستانىمى – زاماننىڭ قاسقىرعا، ادامنىڭ تۇلكىگە اينالعان شاعىندا قوعامداعى ادىلەتسىزدىكتى، ادامدار اراسىندا قاتىگەزدىكتى اشكەرە ەتۋ بولىپ تابىلادى. ءار سەريا تولىققاندى قۇرىلىمى بار سيۋجەتتىڭ جەلىسىمەن ءتۇسىرىلىپ، العاشقى ماۋسىمدا 40 سەريا كورەرمەن نازارىنا ۇسىنىلماق. ەندەشە، ومىردەن ساباق العان كەيىپكەرلەردىڭ شىتىرمان وقيعالارى سىزدەرگە دە ساباق بولىپ، ومىرلەرىڭىزگە ءمان سىيلاسىن دەيمىز.                     

P.S. باعدارلامانى ءار اپتانىڭ دۇيسەنبى جانە بەيسەنبى كۇندەرى ساعات 15:55-تە «حابار» ارناسىنان تاماشالاي الاسىزدار.

اباي-اقپارات