اۋىلدى جەرلەردە ىلگەرىدە توي جاسايتىن ءۇي الدىمەن سول اۋىلدىڭ تەلىسى مەن تەنتەگىن جيناپ الىپ: «اينالايىندار، ءىشىم-جەم مولىنان بولادى، تەك تويدا توبەلەس شىعارماڭدارشى»، - دەپ سودىر-سويقانداردىڭ الدىنان ءوتىپ الاتىن. سودان كەيىن، ولاردىڭ اراسىنداعى ەڭ دۇلەيىن وڭاشالاپ الىپ شىعىپ: «باتىرەكە، ءبىز سەنىمەن پالەنباي اتادان تۋىسامىز عوي. تويدىڭ ءتارتىبىن ءوزىڭ ەرەكشە قاداعالا»، - دەگەندى الگى اۋمەسەردىڭ قۇلاعىنا جانە قۇياتىن. قىسقاسى، تويدىڭ توپالاڭى شىقپاۋىن وسى كۇنگە دەيىن جۋان جۇدىرىقتىلار مەن سول توي يەسىنىڭ تۋىستارى قاداعالاپ كەلەدى. بىراق، بۇنىڭ تاۋەكەلى كەم شارا. ويتكەنى، توي دەگەن توسىننان باستالاتىن قىم-قۋىتى كوپ دۇنيە عوي. ولاي دەيتىنىمىز – كەيىنگى كەزدەرى تويدا تويىپ الىپ شەشىنىپ تاستايتىندار شىقتى. جالاڭاشتانۋدى توي-بيزنەستىڭ تابىسىنا اينالدىرعاندار دا تابىلىپ جاتىر. قىسقاسى، قازاقى سالت-ءداستۇر جايىنا قالىپ، داراقىلىققا اينالا باستاعان توي ماسەلەسىن ەندى پارلامەنت دەپۋتاتتارى زاڭ جۇزىندە تالقىلاپ، توي مادەنيەتىن «ادەپتىلىك پوليتسياسى» قاداعالاماق.

تويداعى ادەپسىزدىكتەرمەن ەندى بيلىك زاڭدى تۇردە كۇرەسەتىن بولدى دەپ حابارلايدى NUR.KZ  سايتى. قولدانىلاتىن شارالار ءتىزىمى ارنايى جۇمىس توبىمەن دايىندالدى. تويلار مەن مەرەكەلەردى وتكىزۋ جانە جينالعان قوناقتاردى قاداعالاۋ جونىندەگى زاڭعا سەنات جانە ءماجىلىس دەپۋتاتتارى قول قويادى.

تويلاردى تەك تۇنگى ساعات 23:30-عا دەيىن وتكىزۋگە رۇقسات بەرىلەدى. توي سارقىتىن الىپ، ءبىر-بىرىمەن قوشتاسۋعا قوناقتارعا جارتى ساعات قوسىمشا ۋاقىت بولىنەدى. ءسويتىپ، تۇنگى ساعات 00:00-دە توي تولىق تارقاۋى ءتيىس.

مۇنىمەن قوسا، تويدىڭ بارىسىن ارنايى ينسپەكتور قاداعالايتىن بولادى. ينسپەكتور قوناقتارعا شاراپتىڭ ورنىنا قىمىز ۇسىنىپ، اراققا قاتتى ماسايعانداردى تويدان شىعارىپ جىبەرەتىن بولادى. اشىق-شاشىق كيىنگەن ايەلدەرگە تويدا ينسپەكتور ورامالدار ۇلەستىرىپ، ۇياتتى جەرلەرىن جابۋىن تالاپ ەتەدى.

كەش باسىندا توي قوناقتارىنا ءوزىن ءوزى ۇستاۋ ادەبى مەن ىشىمدىكتىڭ زيانى تۋرالى فيلم كورسەتىلەدى. سونىمەن قاتار، ينسپەكتور جينالعاندارعا قازاقستاننىڭ مورالدىق بەت-بەينەسى جونىندە ءتۇسىندىرىپ ءوتىپ، بروشيۋرالار تاراتادى.

ينسپەكتور ادەپسىز سايىستار مەن قالجىڭدار ۇسىنعان اساباعا جۇمىسىن توقتاتۋىن تالاپ ەتۋگە قۇقىلى. كوپشىلىك الدىندا جالاڭاشتاناتىن قوناقتارعا 100 ايلىق ەسەپتىك كورسەتكىش كولەمىندە ايىپپۇل سالىناتىن بولادى. مۇنىمەن قوسا، تويدا ۇياتسىز ارەكەتتەرگە بارعان ازاماتتاردىڭ فوتوسى باق-قا جاريالانىپ، كوشەلەرگە قويىلادى.

جاڭا زاڭ قازاقستاندىق توي-بيزنەسىنىڭ دۇرىس دامۋىنا سەپتىگىن تيگىزەدى دەپ سانايدى زاڭدى قۇراستىرۋشىلار. دەپۋتاتتار اتالمىش زاڭ قوعامنىڭ مورالدىق قۇلدىراۋىنا جول بەرمەي، قازىنانى سالىقپەن تولتىرۋمەن قاتار، مەملەكەت ءيميدجىن ساقتايتىن بولادى دەپ ۇمىتتەنۋدە.

مىنە، ساعان كەرەك بولسا! سونىمەن، تويعا بارساڭ تويىپ بار (ىشىمدىككە ەمەس، ارينە), اناۋ-مىناۋ جامان ادەتىڭدى قويىپ بار. ايتپەسە، تويدىڭ جۋان ورتاسىندا ءسىزدى توي يەسى ەمەس، ينسپەكتور يتشە سۇيرەپ دالاعا شىعارىپ تاستايدى. دەگەنمەن دە ءبىر سۇراق: وسى تالاپ بيلىك باسىنداعى جۋاندار مەن بايلىقتان باسى اينالىپ، اۋەدەن اقشا جاۋدىراتىندارعا قويىلار ما ەكەن؟

Abai.kz