بۇگىن رەسەيدە العاش رەت «ارنايى وپەراتسيالىق كۇشتەر» كۇنى مەرەكەلەنىپ جاتىر. بۇنداي كۇننىڭ قىزىل داتاعا ەنگىزىلۋىنە رف پرەزيدەنتى ۆلاديمير پۋتين كەشە، بەيسەنبى كۇنى عانا جارلىق شىعارعان.

BBC جاڭالىقتارىنىڭ جازۋىنشا، ءپۋتيننىڭ جارلىعى قۇقىقتىق اقپاراتتارعا ارنالعان ينتەرنەت پورتالدا جاريالانعان. اقپاراتقا ساي، جارلىق جاريالانعان ساتىنەن باستاپ كۇشىنە ەنەدى. مامانداندىرىلعان ارنايى كۇشتەر مەرەكەسى رەتىندە نەلىكتەن 27 اقپان تاڭداپ الىنعانى قۇجاتتا كورسەتىلمەگەن.

ەستەرىڭىزگە سالاتىن بولساق، «ازاتتىق راديوسى» رەسەي كورشىسى ليتۆانىڭ ازاماتتار ءۇشىن اسكەري قىزمەتتى قايتا مىندەتتى قىلىپ، ناتو-مەن بىرلەسىپ سارسەنبى كۇنى اسكەري جاتتىعۋ وتكىزگەنىن حابارلاعان ەدى. سونداي-اق ەستونيادا دا تاۋەلسىزدىك كۇنىنە وراي نارۆا قالاسىندا اسكەري پاراد وتكىزىلىپ، رەسەيمەن شەكارالاس ايماقتا ناتو-عا مۇشە بىرنەشە مەملەكەتتىڭ اسكەرلەرى قاتىسقان اسكەري جاتتىعۋلار جاسالعان. جاتتىعۋلار بارىسىندا امەريكالىق سوعىس تەحنيكالارى شەكارادان نەبارى  300 م عانا قاشىقتىقتا ءجۇرىپ وتكەن. پولشا مەن بالتىق ەلدەرى بىلتىر رەسەي قىرىمدى اننەكسيالاپ العان سوڭ ناتو اسكەرلەرىن ءوز تەرريتوريالارىنا ورنالاستىرۋعا ءوتىنىش بەرگەن بولاتىن.

بۇۇ-نىڭ مالىمەتىنە ساي ۋكرايناداعى كونفليكت قۇرباندارى سانى 5800 ادامعا جەتكەن. بىرنەشە مەملەكەتتىك كەلىسىم مەن الەم ەلدەرىنىڭ الاڭداۋشىلىعىنا قاراماستان رەسەيشىل سەپاراتيستەر شىعىس ۋكراينانىڭ بىرقاتار وڭىرلەرىنە تىنىشتىق بەرمەي كەلەدى. ۋكراينانىڭ شىعىسىنداعى اسكەري قاقتىعىستار مەن ساياسي تۇراقسىزدىققا باتىس ەلدەرى مەن اقش رەسەيدى ايىپتايدى.  ال رەسەي بيلىگى اسكەري قاقتىعىستارعا ءوزىنىڭ مۇلدە قاتىسى جوق ەكەنىن ايتۋدان تانباي كەلەدى.

نۇرعالي نۇرتاي

Abai.kz