«شەتەلدەگى 5 ميلليوننان استام اعايىندى الاڭداتىپ وتىرعان «كوشى-قون تۋرالى» زاڭدى ءماجىلىس دەپۋتاتتارىنا قازاق تىلىندە سويلەمەك تۇگىلى، تۇسىنبەيتىن دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى تانىستىردى. داۋلەت ارعىندىقوۆ ورالمانداردىڭ ازاماتتىق الۋى تۋرالى قازاقشا ساۋالداردى ۇعا الماي، وعان دەپۋتاتتاردىڭ ورىس تىلىنە اۋدارىپ بەرۋىنە تۋرا كەلدى» دەپ حابارلايدى «31-ارنانىڭ» جاڭالىقتار قىزمەتى.

(مەملەكەتتىك تىلدە سويلەۋ بىلاي تۇرسىن، تۇسىنبەيتىن ۆيتسە-مينيستر - وسى)

قازاقستان رەسپۋبليكاسىنىڭ ۇلتتىق قاۋىپسىزدىگى مەن بولاشاق تاعدىرىنا ساياتىن بۇنداي ماڭىزدى ماسەلەنىڭ وسىلايشا قارسىلىقتار مەن كەدەرگىلەرگە ۇشىراۋى – زيالى قاۋىمدى ۇمىتسىزدەندىرىپ وتىر. جالپى، بۇل زاڭدى قابىلداپ، قانداستاردىڭ ورالۋىنا داڭعىل جول اشۋ – پرەزيدەنتىمىز نۇرسۇلتان نازارباەۆتىڭ تاپسىرماسى ەكەنىن بىرەۋلەر ۇمىتىپ قالعان سەكىلدى. مۇمكىن ادەيى ۇمىتىپ قالۋلارى دا عاجاپ ەمەس. ءبىز دە سوعان وراي ءوز پىكىرىمىزدى ءبىلدىرۋدى ءجون كوردىك.

بىرىنشىدەن, قازاق ءتىلىن تۇسىنبەيتىن قر دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى داۋلەت ارعىندىقوۆتىڭ زاڭ جوباسىن اكەلىپ تانىستىرۋى - ءتىل مەن ۇلتتى، ءماجىلىس پەن ماجىلىسمەندەردى، قانداستاردى، قازاقتاردى قورلاۋ. قر اتازاڭىن، قر ءتىل تۋرالى زاڭىن، ازاماتتاردىڭ ازاماتتىق قۇقىن بۇزعاندىق. ول نەگىزىنەن زاڭدىق جاۋاپكەرشىلىككە تارتىلۋى كەرەك.

(داۋىس بەرىپ "سايلاعان" ساۋاتسىز دەپۋتاتتارىمىزدىڭ ءبىرى - ساميعوللا ناكوستىگىن كەزەكتى رەت كورسەتىپ الدى)

ەكىنشىدەن، ءبىر ءبولىم ماجىلىسمەندەر ورىس ءتىلىن بىلمەيتىن ورالمانداردى «ساۋاتسىز سانايدى». راسىندا، قانداستارىمىزدىڭ زور ينۆەستيتسيالىق كاپيتال مەن ادامي كاپيتال ەكەنىن بىلمەۋ – ساياسي ءارى ازاماتتىق ساۋاتسىزدىق. ەگەر، ءماجىلىس دەپۋتاتتارىنىڭ قايسىبىرى ساياسي ساۋاتسىز بولماسا، مىسالى، قر پارلامەنتى ءماجىلىسىنىڭ دەپۋتاتى ساميعوللا ورازوۆ: «قازاقشا ايتقاندا سانى بار دا، ساپاسى جوق. كەلگەندەردىڭ 70 پايىزى جۇمىسسىزداردىڭ قاتارىن تولىقتىرادى. ولاردىڭ سانى ءبىز دە ونسىز دا 2 جارىم ملن.-نان اسادى» دەمەس ەدى....

ۇشىنشىدەن، پارالامەنتتە تالقىلانىپ جاتقان زاڭ جوباسى وسى كۇيىندە قابىلدانسا، ورالمانداردى ءبىر جىل ىشىندە ازاماتتىق الۋعا مىندەتتەپ، تاعى دا سەرگەلدەڭگە ءتۇسىرۋى مۇمكىن. ەگەر ءبىر جىل ىشىندە ازاماتتىق الماسا، زاڭ ورالمان اعايىندى ىقتيارحات پەن باسقا دا جەڭىلدىكتەردەن ايىرماق. بۇل تۋرالى دا ءبىر دەپۋتات ۇسىنىس جاساعان. سەبەبى، وسىلاي بولسا، قانداستارىمىزدىڭ بۇرىنعى مەكەنىنە بارىپ-كەلۋىنە قيىندىق تۋىپ، بەلگىلى مولشەردە دۇنيە-مۇلىكتەرى مەن زەينەتاقىلارىنان ايىرىلادى. بۇل دا حالىقارالىق قۇقىقتىق نورمالاردى نەگىزگە الماي جاسالعان جاداعاي شەشىم بولىپ قالماق.

تورتىنشىدەن، اتالمىش 2 انىقتامانى: «سوتتالماعانى تۋرالى انىقتاما مەن ءوزى كەلگەن ەلىنىڭ ازاماتتىعىنان شىققانى نەمەسە باسقالاي رۇقسات انىقتاماسىن اكەلۋ تۋرالى انىقتامانى» الىپ تاستاماسا، جاڭا زاڭ قانداستار ءۇشىن ءبارىبىر پايداسىز بولماق. سەبەبى، ۇكىمەتتىڭ 111 ءنومىرلى قاۋلىسى قىتايدان ورالاتىن قانداستارىمىزدىڭ تۇراقتى تىركەۋگە تۇرۋىن زاڭدىق تۇرعىدان شەكتەپ وتىر. ايتا كەتەيىك، قىتايداعى قانداستار جالپى قازاق ۇلتى سانىنىڭ 1/8-ءى، شەتەلدەگى قانداستاردىڭ 1/3-ءى.

اللا، قازاقتارىمىزدى ەل امان، جۇرت تىنىشتا ءبىر-بىرىنەن ايىرماسىن دەپ تىلەيىك، اعايىن!

التاي بۇقارباەۆ.

Abai.kz