ەلباسىنىڭ توراعالىمەن ۇكىمەتتىڭ كەڭەيتىلگەن وتىرىسى ءوتتى. ءوتتى دەگەن اتى بولماسا، ونىڭ ساكەن سىبانباي ايتقانداي (http://abai.kz/post/view?id=2886) ناشار مەكتەپتەگى ناشار سىنىپتىڭ ساباعىنداي عانا بولعانىن كوپشىلىك ەستىپ، ءبىلىپ جاتىر. مينيسترلەر مەن اكىمدەردىڭ باستارىن سالبىراتىپ، مەنەن ساباق سۇراپ قالماسا ەكەن دەپ بۇقپانتايلاپ وتىرعانىن، جينالىس اياقتالا سالا، ساباق ءبىتىپ قۋانعان وقۋشىلاردىڭ كەيپىن كوردىك. ەشقايسىسى ۇسىنىس نەمەسە ءوز وي-پىكىرلەرىن ايتا المادى. وسىندايدا باياعىدا اكەمنىڭ «ايتقاندى ىستەگەن بالانى ۇرۋ كەرەك» دەگەن اڭگىمەسى ەسىمە ءتۇستى.

«ەرتەرەكتە ورتا ءجۇزدىڭ قوڭىرات ەلىندە تولەش دەگەن ەڭبەكسۇيگىش، كىسى اقىسىن جەمەيتىن، ەڭبەكقور دا اقىلدى كىسى بولىپتى. ول وتباسىنىڭ بارلىق شارۋاشىلىق جۇمىستارىن ءوزى ۇيىمداستىرىپ، ءوزى باسشىلىق جاسايدى ەكەن. بالالارى دا اكەسىنىڭ ايتقانىن بۇلجىتپاي ورىنداپ، شارۋاعا بەيىم بولىپ وسەدى. بىراق، بالالارىنىڭ ايتقانىن ىستەۋى، باسقاشا تىرلىك ەتپەۋى وزىنە ۇنامايدى. سوندىقتان دا ۇلكەن ۇلىن ۇيلەندىرۋدە، قىز ايتتىرىپ، قىز تاڭداۋدىڭ وزگەشە ءادىسىن قولدانادى. ول ۇلكەن بالاسىن ەرتىپ، ءار اۋىلعا بارعان كەزدە بالاسىن ۇرادى. بۇنى كورگەن اۋىل ادامدارى، «ە، بۇل بالانىڭ جازىعى نە، نەگە ۇراسىڭ، بۇل بالا كىم»؟ دەپ سۇراسا تولەش «بۇل ءوز بالام، ايتقانىمدى ىستەيدى، سوندىقتان ۇرامىن» دەپ جاۋاپ بەرەدى. بۇنى ەستىگەن باسقالار: «مىنا شال جىندانعان شىعار، ايتقاندى ىستەگەن بالانى نەگە ۇرادى؟» دەپ تاڭدانىپتى. وسىلايشا اۋىلدان اۋىلعا-اۋىلعا بارىپ، ەلدى ارالاپ وسى ارەكەتىن قايتالاپتى. بىراق ويلاعانى بولماي، ەڭسەسى ءتۇسىپ تاعى ءبىر اۋىلعا بارىپ، بالاسىن ۇرىپ جاتقاندا ءبىر بويجەتكەن قىز كەلىپ، «اتا بالاڭىزدى نەگە ۇراسىز، ونىڭ قانداي كىناسى بار؟» دەپ سۇراعاندا قاريا «بۇنىڭ بار جازىعى - ايتقانىمدى ىستەيدى، سوندىقتان ۇرامىن» دەپتى. سوندا بويجەتكەن: «دۇرىس، ءوزى ءبىلىپ ىستەمەگەن بالانى ۇرۋ كەرەك، ونداي بالا بارلىق جيعان-تەرگەنىڭىزدى بوسقا شاشادى. ايتقاندى عانا ىستەپ، ءوزى ءبىلىپ ەشنارسە ىستەي الماسا، ونداي بالا ۇيلەنگەندە دۇنيە جيناپ، بالا-شاعاسىن اسىراي المايدى» دەپتى. ويلاعان ويىنان شىققان قىز جاۋابىن ەستىگەن تولەش سول قىزعا قۇدا ءتۇسىپ، ۇلكەن ۇلىنا اپەرگەن ەكەن»، - دەيدى ەل اڭگىمەسى.

ءبىزدىڭ اكەمىز دە وسى اڭگىمەسىن بىزگە ءجيى ايتىپ وتىراتىن. اكەمىزدىڭ وسى اڭگىمەسىن مينيسترلەر مەن اكىمدەر دە وقىپ بىلسە ەكەن. ء«تىسى شىققان بالاعا، شايناپ بەرگەن اس بولماس» دەگەندەي ايتقاندى عانا ىستەيتىندەر ەل باسقارىپ دۇرىس قىزمەت ەتە المايدى، شايناپ بەرگەندى جۇتقاندى عانا بىلەدى، جوعارىدان نۇسقاۋ كۇتىپ وتىرادى. جەرگىلىكتى جاعدايدى ەسكەرىپ، نارىق زاڭدارىنا بەيىمدەلىپ، وزدىگىنەن جۇمىس ىستەي الماسا، جاۋاپكەرشىلىكتى موينىنا الماسا، ءبىر نارسەسى دۇرىس بولماي جاۋاپ بەرەمىن دەپ جالتاقتاسا، وندايلار تەك نۇسقاۋ مەن تاپسىرمانى ورىنداۋمەن عانا اينالىساتىن بيلىكتىڭ باس شۇلعىعىش قۇلى عانا بولادى. سوندىقتان دا ونداي باسشىلاردى ورىندارىنان الۋ كەرەك.      

بەكمىرزا سىرىمبەتۇلى،

الماتى قالاسى.

اباي.kz