قالاي بولارىن كىم ءبىلسىن، الايدا بيىلدان باستاپ ءبىزدىڭ ەلىمىز استىق ءونىمىن ەكسپورتقا شىعارماۋى مۇمكىن. كوك تيىن پايداسى جوق. شىعىنى شاش ەتەكتەن. باسقاسىن بىلاي قويعاندا، استىق ءونىمىن شەت ەلدەرگە تاسىمالداۋدىڭ وزىنە عانا 15 ميلليارد تەڭگە كەتەدى ەكەن. «ودان دا بۇل اقشانى فەرمەرلەرىمىزگە قولداۋ كورسەتۋگە جۇمساعانىمىز دۇرىس» دەدى جاقىندا اۋىل شارۋاشىلىعى ءمينيسترى اسىلجان مامىتبەكوۆ مىرزا.

ويپىرماي، ءا! ءمينيسترىمىز شەت ەلدەردەن اسىل تۇقىمدى مال اتاۋلىنى اكەلىپ بولىپ، ەندى شەت ەلدەرگە استىق شىعارماۋدىڭ قامىنا كىرىستى مە وسىلايشا؟ وسىنداي وي كەلدى ءبىزدىڭ قاۋاشاعىمىزعا – اسەكەڭنىڭ اڭگىمەسىن ەستىگەن ساتتە. دۇرىس قوي، وتە دۇرىس. شىعىنى شاش ەتەكتەن بولسا، شىعارىپ كەرەگى نە؟ قوس قولداپ تۇرىپ قولدايمىز مۇندايدى. ال بىراق «اتالمىش اقشانى فەرمەرلەرىمىزگە بەرە سالايىق» دەگەنى نەسى سوندا بۇ كىسىنىڭ - بىزگە ماسەلەنىڭ وسى جەرىنىڭ ءمانىسى تۇسىنىكسىزدەۋ بولىپ تۇر. ويتكەنى... كەشە عانا ەسەپ كوميتەتىنىڭ باسشىسى قوزى-كورپەش جاڭبىرشين مىرزا اۋىل شارۋاشىلىعى مينيسترلىگىنە بولىنگەن 43,1 ميلليارد تەڭگە بيۋدجەت اقشاسىنىڭ 2012 جانە 2013 جىلدارى مەن 2014 جىلدىڭ ءبىرىنشى جارتىجىلدىعىندا ءتيىمسىز پايدالانىلعانى جونىندە مالىمەت تاراتتى.

«بۇل قالاي سوندا؟» دەسەك، ول سوندا بىلاي ەكەن: ەسەپ كوميتەتىنىڭ باسشىسى قوزى-كورپەش جاڭبىرشين مىرزانىڭ مالىمەتتەرىنە سەنەتىن بولساق (رەسمي مالىمەتكە سەنبەۋگە قۇقىمىز جوق), اۋىل شارۋاشىلىعى مينيسترلىگى 2013 جىلى تۇپ-تۋرا توعىز زاڭدى تۇلعاعا نەسيە بەرىپتى. توعىزىنىڭ ارقايسىسىنا ءبىر جانە ەكى ميلليارد تەڭگەدەن. ميلليون دەگەنىڭىز مۇلدە جوق. تەك قانا ميللياردتاپ بەرىپتى! ءبىر قىزىعى – ميللياردتاعان نەسيەنى مينيسترلىك جشس دەپ اتالاتىن فيرمالارعا 2013 جىلى بەرگەن بولسا، سول فيرمالاردىڭ وزدەرى دە... ءتيىستى ورگاندارعا زاڭدى تۇلعا رەتىندە 2013 جىلى تىركەلىپتى! تاعى ءبىر قىزىعى - اۋىل شارۋاشىلىعى سالاسىندا ايانباي جۇمىس ىستەۋ ءۇشىن زاڭدى تۇلعا رەتىندە تىركەلگەن وسىناۋ فيرمالاردىڭ نە ء«بىر گرامم» تەحنيكاسى، نە ء«بىر مەتر» جەرى، ءتىپتى «كوز قىلىپ كورسەتەتىندەي» ءبىر-ەكى ايىر-كۇرەگى دە جوق ەكەن. ال ءسىز ايتاسىز، اسىلجان مىرزا، «ون بەس ميللياردتى تاعى دا بەرە سالايىق» دەپ. سوندا دەيمىز-اۋ... سوندا ءسىز مەملەكەت باسشىسىنىڭ وتكەندە عانا «مەملەكەت سەندەرگە ساۋىن سيىر ەمەس» دەگەنىن تۋرا ماعىناسىندا ءتۇسىنىپ قالعانسىز با، ا؟

مارات ماداليموۆ.

اباي.kz