الەۋمەتتىك جەلىلەردە «قازاقستان بانكتەرى نەسيەنى تەڭگەمەن بەرۋدى دوعارىپتى» دەگەن اڭگىمە گۋلەپ كەتتى. بۇدان بىلاي نەسيەنى تەك قانا دوللارمەن بەرەدى-ءمىس.

«اۋەلدە سەنبەپ ەدىم، كەشە عانا ءوز باسىمنان وتكەرگەن سوڭ، نانباسقا امالىم قالمادى، – دەپ جازادى قاراعاندى قالاسىنىڭ تۇرعىنى. – بانككە بارىپ، نەسيە الۋعا ارەكەتتەنگەنىمنەن تۇك تە شىقپادى، بانك ماعان تەڭگەمەن نەسيە بەرۋدەن... ءۇزىلدى-كەسىلدى باس تارتتى. بۇرىن نەسيەنى ۋاقتىلى تولەمەي، سەنىمنەن شىعىپ قالعان جەرىم بولعان ەمەس، قۇجاتتارىم دا دۇرىس. سەبەبىن ءتۇسىندىرىپ ايتپاي، سىپايى شىعارىپ سالدى».

وسى جازبانىڭ استىنا پىكىر جازعان ايان تولەۋبەكوۆ دەگەن قولدانۋشى: «قازىر بانكتەردىڭ بارىندە دە ساياسات سونداي. ءبىر بەلگىلى بانكتىڭ فيليالىندا ديرەكتوردىڭ ورىنباسارى بولىپ جۇمىس ىستەيتىن دوسىم ايتادى: «تەڭگەمەن نەسيە بەرۋدى ازىرگە توقتاتىپ تۇرمىز. ۇلتتىق ۆاليۋتانىڭ باعامى جاقىن ۋاقىتتا وزگەرۋى مۇمكىن. دەۆالۆاتسيا بولۋى دا عاجاپ ەمەس. اقپان ايىنا دەيىن تەڭگەمەن نەسيەنىڭ بەرىلمەيتىنى انىق». ياعني، ەلدىڭ شۋلاپ جاتقانى بەكەردەن-بەكەر ەمەس»، – دەيدى.

الايدا بانكتەر جاعى مۇنداي ۇستانىمنىڭ بار ەكەنىن جاپا-تارماعاي جوققا شىعارىپ وتىر. «اتفبانك تەڭگەمەن نەسيە بەرۋدى توقتاتقان جوق. ءتىپتى ونداي وي باسىمىزعا كەلگەن دە ەمەس. ءىرى بانكتەردىڭ ءبىرى بولعان سوڭ، قارجى سالاسىندا قانداي دا ءبىر قاۋەسەت شىقسا، ىشىندە ءبىز جۇرەمىز ايتەۋىر...» دەپ قىنجىلىس ءبىلدىردى اتالعان بانكتىڭ ءباسپاسوز قىزمەتى. «دەۆالۆاتسيا قاۋپى كۇشەيىپ بارا جاتقاندىقتان، ءارى رەسەيدەگى ەكونوميكالىق جاعدايعا بايلانىستى، سونداي-اق مۇناي باعاسىنىڭ قۇلدىراي باستاۋىنا وراي تەڭگەنىڭ وتەمپازدىعىنا كۇمان تۋىنداعانى راس. دەگەنمەن، ءبىز احۋالدىڭ اۋىرلىعىنا قاراماستان، تەڭگەمەن نەسيە بەرۋدى دوعارعان جوقپىز. بىراق اسا زور كولەمدە نەسيە بەرۋدەن باس تارتا تۇرساق پا دەگەن ويدامىز» دەپ مالىمدەمە جاسادى ەۋرازيالىق بانكتىڭ ءباسپاسوز قىزمەتى. «Kaspi Bank»، «ربك» جانە «قازاقستاننىڭ حالىق بانكى» دە الەۋمەتتىك جەلىدەگى الگىندەي سوزدەردى جوققا شىعارۋعا تىرىسۋدا.

ال جيناقبانكى نەسيەنى تەڭگەمەن بەرۋدى توقتاتقانىن راستادى.

– ءبىز تەڭگەمەن نەسيە الام دەۋشىلەردەن ءوتىنىش قابىلداۋدى جەلتوقسان ايىندا-اق توقتاتقانبىز. سەبەبى بەلگىلى – نارىقتاعى تەڭگەنىڭ وتەمپازدىعى تىم تومەن بولىپ تۇر. باسقا سەبەبى جوق. ال دوللارمەن نەسيە بەرە بەرەمىز، – دەپ مالىمدەدى بانكتىڭ ءباسپاسوز قىزمەتى.

ساراپشىلار ۇلتتىق ۆاليۋتامەن نەسيە الۋشىلاردىڭ كوپتىگىنەن بانكتەردە تەڭگە ازايىپ، مۇلدە قالماۋى دا ىقتيمال ەكەنىن ايتادى. «حالىقتىڭ نەسيەنى تەڭگەمەن العىسى كەلەتىنى – ونىڭ پايىزدىق مولشەرلەمەسىنىڭ تومەندىگىنەن. ۇلتتىق بانكتىڭ ەلىمىزدەگى شەتەلدىك بانكتەرگە ەشقانداي قولداۋ كورسەتپەي وتىرعان سەبەبى دە – تەڭگەنىڭ نارىقتاعى ءرولىن نىعايتا ءتۇسۋ ماقساتىنان تۋىنداپ وتىر» دەيدى ەكونوميست ماقسات سەرالى.

Abai.kz