ادەبيەت تۋرالى اڭگىمەلەر توپتىق مۇددەلەردىڭ قىزمەتشىسىنە اينالدى
قازىر ادەبيەت تۋرالى اڭگىمەلەر توپتىق مۇددەلەردىڭ قىزمەتشىسىنە اينالدى. بۇل ۇدەرىستى اتى-ءجونى بەيماعلۇم پوست-پىكىرلەردەن كورۋگە بولادى.
مەن Abai.kz سايتىندا تۇنىق ساۋلە دەگەن فيلوسوفيالىق ەڭبەگىمدى جاريالاعان ەدىم. بەلگىسىز ءبىر، ايماقتىق بەلسەندى توپ بولسا كەرەك، ۇيىمداسىپ الىپ، جاپپاي جابىلا، بىردەي تەرىس پىكىر جازدى. مەن ادەتتەگىدەي ءبىر-ءبىرىن قولداعان، مۇرات-مۇددە تۇرعىسىنان ۇجىمداسقان، ۇشقارى پىكىر، جاڭساق وي ايتقان، قارالاۋعا، مۇقاتۋعا، كەكەتۋگە، كۇيە جاعىپ، كولەڭكە ءتۇسىرۋگە تالپىنعان بەلسەندىلەردىڭ بۇل جانكەشتى كۇرەسىنە ارالاسقان جوقپىن.
مەنى تاڭ قالدىرعان، جانىمدى شوشىتقان باسقا نارسە ەدى...
نە دەگەن قاتىگەزدىك، نەتكەن ولەرمەندىك... سوندا بۇل جانتالاستىڭ ءبارى نە ءۇشىن كەرەك؟ اۆتورعا قارسى جانقيارلىقپەن مايدان اشقان باتىرلار بۇركەنشىك ات جامىلىپ، جاۋاپكەرشىلىك جوق بولعان سوڭ، ويلارىنا نە كەلسە، سونى جازادى.
سوندا نە، ولاردىڭ بوس ۋاقىتى كوپ پە؟ الدە ىستەيتىن جۇمىسى جوق پا؟
جىكشىلدىكتەن قاشان جانە قانداي ۇلت كوركەيىپ ەدى؟ مەنى قۇلاتقاننان ولارعا كەلەر پايدا نە؟ مەن قۇلامايمىن دا، جىعىلمايمىن دا.
ەلگە قاجەت، ۇلتقا ماڭىزدى شارۋالارمەن نەگە اينالىسپايدى دەپ ويلادىم.
مەنىڭشە، ۇلت ادەبيەتى ۇلت تۇتاستىعىنا قىزمەت ەتۋى كەرەك. ۇيىسقان ۇلتتىڭ عانا بولاشاعى بار.
سوندا نە، قالامگەردى ەلىنە قاراپ، ايماعىنا قاراپ جاقسى كورەمىز بە؟ وتكەن عاسىردا ءوتىپ كەتتى مە دەسەم، بۇل تاراپتا ءالى كۇنگە شەيىن ەلدىڭ شەتىندە، جەلدىڭ وتىندە تۇر ەكەنبىز عوي...
كىتابي ۇستازدارىم ت.الىمقۇلوۆ، ش.مۇرتازا، ءا.كەكىلباي، م.ماعاۋين، ت.ابدىك، ت.نۇرماعانبەتوۆ بولدى. ءا.نۇرپەيىسوۆتى، ساكەن ءجۇنىسوۆتى، قاليحان ىسقاقتى، سايىن مۇراتبەكوۆتى جاتا-جاستانا وقىدىق. ماحامبەتكە، ابايعا، مۇقاعاليعا ءتانتى بولدىق.
مەن ولاردى قالامىنا قاراپ قۇرمەت تۇتتىم:
تاۋ شىڭى قۇزدار ەكەنىن،
كورەسىڭ شىققان جەرىڭدە!
ءار قازاق جۇرتى – مەكەنىم،
بار قازاق – بيىك تورىمدە!
ءبىرتۇتاس جونى جوتانىڭ،
ءبىر ءۇمىت وتىن جاعايىن،
بار ءوڭىر – مەنىڭ وتانىم،
بار قازاق – تۋعان اعايىن!
كوزى تىرىسىندە ءامىرحان بالقىبەك تە، تالاسبەك اسەمقۇلوۆ تا
رەسمي تۇرعىدا ماقتاۋ دا ەستىگەن جوق، ماراپات تا كورگەن جوق... كەرىسىنشە، مويىنداماۋعا تىرىستى.
ەندى توپشىلدار ول ەكەۋىن ماعان قارسى قويىپ، ارامدىقتىڭ ەڭ اۋىر ءتۇرى - ارامىزعا وت تاستايتىن عادەت تاۋىپ الىپتى، ول نە ءۇشىن قاجەت، مەن دە ولارعا قارسى بىردەڭە ايتسىن دەيتىن شىعار.
ەشقاشان ايتپايمىن. ۇشەۋىمىزدىڭ ءوز ءبىلىمىمىز وزىمىزگە جەتەدى.
ەلگە دە، دوسقا دا ادالمىن.
ديدار امانتاي
Abai.kz
