حالىقارالىق ستۋدەنتتىك سپورت فەدەراتسياسىنىڭ (International University Sports Federation – FISU) باسشىسى ولەگ ماتىتسين 28-ءشى دۇنيەجۇزىلىك قىسقى ۋنيۆەرسيادا ويىندارىن وتكىزۋگە قولداۋ بىلدىرگەنى  ءۇشىن قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆقا العىس ءبىلدىردى.

«حالىقارالىق ستۋدەنتتىك سپورت فەدەراتسياسى اتىنان جانە جەكە ءوز اتىمنان جوباعا تۇراقتى قولداۋ بىلدىرگەنىڭىز ءۇشىن العىس بىلدىرەمىن. ۋنيۆەرسيادا مەن قازاقستان قۇراماسىنىڭ تابىسى ستۋدەنتتىك سپورتتىڭ دامۋىنا جانە جاستار اراسىندا سالاۋاتتى ءومىر سالتىن ناسيحاتتاۋعا وراسان كۇش بەرەرىنە سەنىمدىمىن»، - دەلىنگەن و.ءماتىتسيننىڭ جەدەلحاتىندا.

سونىمەن بىرگە، فەدەراتسيا باسشىسى ويىندار تەلەاۋديتورياسىنىڭ 70 مەملەكەتتى قامتىعانىن، مۇنىڭ حالىقارالىق ارەنادا قازاقستان بەدەلىن نىعايتا تۇسكەنىن اتاپ ءوتتى. ۇيىمداستىرۋ كوميتەتى، الماتى قالاسىنىڭ اكىمدىگى جانە قازاقستان ستۋدەنتتىك سپورت فەدەراتسياسىنىڭ ۇيلەسىمدى جۇمىسىنىڭ ارقاسىندا الماتىدا وتكەن بۇكىلالەمدىك ستۋدەنتتىك قىسقى ويىنداردىڭ جوعارى دەڭگەيدە وتكەنىن جانە قازاقستاننىڭ مۋلتيسپورتتىق جارىستاردى ۇيىمداستىرۋعا دايىن ەكەنىن باسا ايتتى.

«كوپتەگەن شەتەلدىك قوناقتاردىڭ پىكىرىنشە، الماتىدا وتكەن بۇل شارا بۇكىلالەمدىك قىسقى ستۋدەنتتىك ويىندار تاريحىنداعى ەڭ ۇزدىك ۋنيۆەرسيادا بولدى. بارلىعى الماتىعا كەلگەن 3 مىڭعا جۋىق سپورتشىنىڭ، رەسمي تۇلعالاردىڭ جانە شەتەلدىك قوناقتاردىڭ ساپارىن ۇمىتىلماستاي ەتكەن قازاقستان تۇرعىندارىنىڭ قوناقجايلىلىعىنا، كىشىپەيىلدىلىگىنە ءتانتى بولدى»، - دەپ جازدى ماتىتسين.

ەسكە سالا كەتسەك، 2017 جىلى 29 قاڭتار - 8 اقپان ارالىعىندا الماتىدا ححVIII قىسقى ۋنيۆەرسيادا ويىندارى ءوتتى. وعان 57 ەلدەن 2000-عا جۋىق سپورتشى قاتىستى. ۋنيۆەرسيادا ويىندارىندا 12 سايىس بويىنشا 85 مەدال جيىنتىعى ساراپقا سالىندى. جالپى كوماندالىق ەسەپتە 28 التىن، 27 كۇمىس جانە 15 قولا مەدال العان رەسەي قۇراماسى ءبىرىنشى ورىن الدى. قازاقستان 11 التىن، 8 كۇمىس جانە 17 قولا جەڭىپ الىپ، ەكىنشى ورىنعا تابان تىرەدى. ۇزدىك ۇشتىكتى 11 التىن، 5 كۇمىس جانە  5 قولا مەدالمەن وڭتۇستىك كورەيا تۇيىندەدى.

Abai.kz