ءساۋىردىڭ 26 كۇنى قۇلسارىعا اتىراۋ وبلىسى اكىمى ورىنباسارى ناقباەۆ مىرزا كەلدى. كەلگەن ماقساتى – ەكى ايدان بەرى كۇنى-ءتۇنى تشو-دان قۇلسارىعا لاس سۋ تاسىمالداپ كەلگەن تەحنيكالار تۋرالى بولاتىن. جينالىسقا اۋدان اكىمىنىڭ ورىنباسارى جاردەم احمەتوۆ، قالا اكىمى شاكىر كەيكىن، «جىلوي سۋ» باسشىسى ىبىرايوۆ بالتاباي، دەپۋتات، پروكۋرور، جەرگىلىكتى پوليتسيا باسشىسى، ەكولوگيا باسشىسى، اتىراۋدان تابيعات رەسۋرستارىن قورعاۋ باسشىسى، ت.س.س تۇلعالار قاتىستى.

جينالىس كوپكە سوزىلمادى. ناقباەۆ مىرزا ناقتى سويلەپ، اقيقاتتى ورنىنا قويىپ بىردەن شەشىم شىعاردى. ءسوز بارىسىندا ونداي ولقىلىقتارعا كىم رۇقسات بەرگەنىن، نە ءۇشىن بەرگەنىن، ولاي قىلۋلارىنا ەش حاقىلارى جوق ەكەنىن، نەمقۇرايىلىققا جول بەرمەۋ، جىعىلعانعا جۇدىرىق جۇمساپ، حالىققا قيانات جاساماۋ كەرەكتىگىن، بۇل ىسكە ءۇزىلدى-كەسىلدى قارسى ەكەنىن، تۇرار شاپقارانىڭ شىرىلداعان Abai.kz cايتىنداعى «دابىل ماقالاسىنىڭ» دۇرىس ەكەنىن، اتىراۋ قالاسىندا بۇنداي ىستەرگە كەزىندە شەكتەۋ قويعانىن ايتىپ ءوتتى. بۇل ءىستىڭ دەرەۋ توقتاتىلۋىن تالاپ ەتىپ، بۇل ىسكە شەكتەۋ قويىلۋىن شەگەلەپ ەسكەرتتى ءھام بۇيىردى.

جينالىس جۇما كۇنى تشو وڭىرىندە جالعاساتىنىن، بۇل ىسكە قاتىسى بارلارعا، نە ۇلت جاناشىرلارىنا قاتىسۋلارىنا شەكتەۋ قويىلمايتىنىن تىلگە تيەك ەتتى. «كوپ ءسوز – بوق ءسوز، انىق ءسوز – قانىق ءسوز» دەگەندەي، بۇل ءىستىڭ دە نۇكتەسى قويىلدى. ەندى تشو وڭىرىنەن قۇلسارىعا لاس سۋ تاسىمالدانبايتىن بولدى.

تۇرار شاپقارا

اباي-اقپارات