"مۇمكىندىك بەرىلسە، شەتەلگە كەتىپ-اق قالار ەدىم"
"مۇمكىندىك بەرىلسە، شەتەلگە كەتىپ-اق قالار ەدىم" دەگەن پىكىردى كوپ وقيتىن بولدىق. جاي ادام ەمەس، اۋزىنا جۇرت قارايتىن كىسىلەردىڭ وزىنەن. قازاقستاننان قاجىعان شىعار دەپ اقتارمىز، جارايدى.
وتكەندە ونىنشى سىنىپتىڭ بالاسى: "امەريكاعا بارىپ، سوندا قالعىم كەلەدى، قانداي جولدارى بار؟" دەپ سۇراق قويىپتى جەكە چاتتا. "شىراعىم، ادرەستەن قاتەلەستىڭ" دەدىم ىشىمنەن. سىرتتاي دا ول ويىمەن كەلىسپەيتىنىمدى، ماقساتتى ەلدەن كەتەم دەپ ەمەس، ءبىلىم، تاجىريبە جيىپ، ەلگە ورالام دەپ قويۋ كەرەك دەپ اقىل ايتقان بولدىم. حوش، الگى بەسىكتەن بەلى شىقپاعان بالانى ەلىنەن بەزدىرىپ تۇرعان نە؟ مەنىڭشە، جوقشىلىق تا، توقشىلىق تا ەمەس، ءسوز باسىندا ايتقان، "اۋزى دۋالى" ادامداردىڭ ناسيxاتى.
باياعىدا عوي، ەلگە دەگەن ماxابباتىڭ مايداندا سىنالاتىن ەدى. سوعىستان قاشتىڭ با، بولدى، سەن قانشا جەردەن كەۋدە سوق، قولباسىنىڭ تاكتيكاسىن سىنا، اقىلدى سوزدەر ايت، ءبارىبىر ەر ەمەس، ەزسىڭ. ول زاماندا وتان ءۇشىن جان قيۋعا، بالاڭدى جەتىم، جارىڭدى جەسىر ەتۋگە ءماجبۇرسىڭ. جەڭىس قۇرباندىقسىز كەلمەيدى. كەبىنىڭدى الا كەتەسىڭ قايدا كەتسەڭ دە.
قازىر بەيبىت زامان. بىراق بۇل دا ءبىر مايدان. مۇنداي كەزدە دۇشپانىڭ "جەمقور قىزمەتكەر", "ادىلەتسىز سوت", "دورەكى پوليتساي" بولىپ جولىعۋى مۇمكىن. نە ىستەيسىڭ؟ وتانىڭدى تاستاي قاشاسىڭ با؟ الدە، ەرتەڭ ۇرپاعىم ءومىر سۇرەتىن ەل دەپ كىندىگىڭدى بايلاپ، تىم قۇرىسا ءبىر اعاشىنا سۋ قۇيسام دا ۇلەسىمدى قوسايىن دەيسىڭ بە؟ وتان ءۇشىن جان قيۋ سۇرالىپ تۇرعان جوق، ازداپ جان قيناۋ سۇرالىپ تۇر، بالكىم. وعان شىداماساق، ەرتەڭ، قۇداي ساقتاسىن، اناۋ مىناۋ زامان تۋسا، اۋا كوشەدى ەكەنبىز دە شەتەلگە.
پىسى. اقش ازاماتتىعىن الۋ - قالاعان كىسى جەتەتىن شارۋا ەمەس. وعان ازداپ ساتقىندىق، وتىرىكشىلىك نەمەسە امەريكالىق باي ياكي جۇباي كەرەك. ول تۋرالى تاعى بىردە جازارمىن.
مەرەكە قۇتتى بولسىن! وتانىمىزدى جاۋدان قورعايتىن كۇن ەشقاشان كەلمەسىن. داۋدان قورعاپ الساق تا جاراعانىمىز.
مۇرات ەسجان
Facebook-تەگى پاراقشاسىنان
