سەنبى, 27 اقپان 2021
2704 0 پىكىر 30 مامىر, 2017 ساعات 10:30

اتامباەۆ قىرعىزستاندا پرەزيدەنتتىك سايلاۋ وتەتىن كۇندى جاريالادى

قىرعىزستان پرەزيدەنتى المازبەك اتامباەۆتىڭ حابارلاۋىنشا، كەزەكتى پرەزيدەنتتىك سايلاۋ 15 قازاندا وتەدى. سايلاۋ وتەتىن جاڭا كۇن بەلگىلەنگەنىن ول قارۋلى كۇشتەردىڭ قۇرىلعانىنا 25 جىل تولۋىنا وراي سالتاناتتى كەشتە مالىمدەدى.

ونىڭ ايتۋىنشا، 15 قازاندا حالىق جاڭا مەملەكەت باسشىسىن سايلايدى. "سوڭعى بىرنەشە ايدا مەن وتكەن كۇندەردى ەسكە الىپ، پرەزيدەنت رەتىندە اتقارعان جۇمىستارىما باعا بەرۋمەن بولدىم. جاراتقانعا العىس! سونىڭ كومەگىمەن سوڭعى 5-6 جىلدا ەلدى تولعاندىرعان كوپتەگەن ماسەلەلەر شەشىلدى", - دەدى اتامباەۆ.

پرەزيدەنت ەلدىڭ سوڭعى بىرنەشە جىلداعى جەتىستىكتەرىن اتاپ ءوتتى. "ەڭ اۋەلى، بۇل - تۇراقتى ورنىققان بەيبىتشىلىك. اتا-بابالارىمىدىڭ رۋحى ادامداردىڭ بويىندا قايتا ءتىرىلدى", - دەدى ول.

بيىل اقپان ايىندا وسك توراعاسى نۇرجان شايلدابەكوۆپەن كەزدەسكەن اتامباەۆ پرەزيدەنتتىك سايلاۋدىڭ 19 قاراشادا وتەتىنىن ايتتى. كەيىن "اتا مەكەن" پارلامەنتتىك فراكتسياسى سايلاۋدى تامىزدا وتكىزۋدى ۇسىندى.

پرەزيدەنتتىك سايلاۋ وتەتىن كۇن ءالى بەكىتىلگەن جوق. پارلامەنت سايلاۋ كۇنىن وزگەرتۋ تۋرالى زاڭ جوباسىن ماقۇلدادى. ول بويىنشا، بيىل سايلاۋ 15 قازانعا سايكەس كەلىپ تۇر.

اباي-اقپارات

0 پىكىر