استاناعا الەمنىڭ بەلگىلى كينو جۇلدىزى دجەكي چان كەلدى. قۇرمەتتى قوناقتى ەلوردانىڭ اكىمى اسەت يسەكەشوۆ پەن "قازاقستان" ۇلتتىق ارناسىنىڭ ديرەكتورى ەرلان كارين مىرزالار كۇتىپ الدى.

اكتەر قازاقستانداعى قىتاي كينوسى فەستيۆالىنىڭ اشىلۋ سالتاناتىنا قاتىسۋ ءۇشىن كەلگەن. ءتىپتى، كەي ازاماتتار اكتەردىڭ ەكسپو كورمەسىن كورۋگە كەلگەنىن ايتىپ جاتىر.

ءبىز ەل ەستىگەن اقپاراتتاردى قايتالاپ جاتپاي استاناداعى ءبىر كەلەڭسىز جايتتى عانا تىلگە تيەك ەتۋدى ءجون ساناپ وتىرمىز. دجەكي چان كەلگەنى سول ەدى، استاناداعى قابانباي باتىر كوشەسى مىنانداي جازۋلارعا تولىپ كەتتى.

بۇل جەردە نە جازىلىپ تۇر؟ قازاقتىڭ مەملەكەتتىك ءتىلى تۇرعاندا تاۋەلسىز ەلدىڭ داڭعىلىنىڭ بويىندا قىتاي جازۋى نە قىلىپ اداسىپ ءجۇر؟ اسەت يسەكەشوۆ مىرزا ەكسپو-عا ۇلتى ءبىر حانزۋ ءارتىس كەلدى ەكەن دەپ، استانا قالاسىنىڭ كوشەسىن قىتاي جازۋىنا تولتىرىپ جىبەردى. وزگە قوناقتاردى قايتىپ قارسى الماق؟ بىرەۋلەر مۇنى "قىتاي كينوسى فەستيۆالىنىڭ قۇرمەتىنە ىلىنگەن باننەرلەر دەۋى مۇمكىن". قىتاي كينوسى فەستيۆالى بەيجىڭدە ەمەس، استانادا ءوتىپ جاتقان جوق پا؟

بالكىم، يسەكەشوۆ ەكسپو-عا كەلگەن جۇزدەگەن ۇلتتىڭ تىلىندەگى باننەرلەردى استانا كوشەلەرىنە ىلەتىن شىعار.

وسىنداي جالپاقشەشەيلىك ءبىزدى قۇردىمعا جىبەرە مە دەپ قورقامىن!

ءشارىپحان قايسار

Abai.kz