سوڭعى ۋاقتا ەل كونستيتۋتسياسىنا ەداۋىر وزگەرىستەر ەنگىزىلدى. دالىرەك ايتساق، پرەزيدەنت سايلاۋى تۋرالى زاڭ قايتا قارالىپ، وعان قاتىسۋشىلار ەكشەلىپ-تەكشەلەنەتىن بولدى.

سونىڭ ىشىندە «پرەزيدەنت سايلاۋىنا ءاربىر قازاقستان ازاماتى قاتىسا الادى» دەگەن ەسكى زاڭداعى ەرەجە وزگەردى.

ەندى پرەزيدەنت سايلاۋىنا كەز كەلگەن قازاقستان ازاماتى قاتىسا المايتىن بولدى. قازاقستاندا تۇرعانىنا جانە مەملەكەتتىك قىزمەتتە 5 جىل بولعان، وندا دا ساياسي پارتيادا مۇشەلىكتە بار ادام عانا پرەزيدەنتتىكتەن ۇمىتكەرلەردىڭ قاتارىنا ەنۋى مۇمكىن.   ال بۇل دەكموكراتيا قاعيداسىنا قانشالىقتى ساي؟ ءبىز وسى تۇستا بۇرىنعى ەرەجە بويىنشا پرەزيدەنت سايلاۋىنا قاتىسقان ەكس-كانديتات تۇرعىن ىسقاقۇلى سىزدىقوۆتى ەسكە الدىق دا، ونىڭ پارلامەنتتىڭ قارا جۇمىسشىلار پالاتاسىنان تاپتىق. كەشەگى كانديدات بۇگىن ءماجىلىس دەپۋتاتى ەكەن.

پارلامەنتتىڭ ءباسپاسوز قىزمەتى بىزگە تۇرعىن سىزدىقوۆپەن تەك تۇستەن كەيىن عانا حابارلاسۋعا بولاتىنىن ەسكەرتتى. ونىڭ سەبەبى - دەپۋتات تۇسكە دەيىن پارلامەنتتىڭ پلەنارلىق وتىرىسىندا يا بولماسا باسقا  جيىندا جۇرەدى ەكەن.  ءسويتىپ، ەكى-ءۇش كۇن بويى سىزدىقوۆ جولداسقا بىرنەشە رەت قوڭىراۋ شالىپ، جارتى اۋىز سوزىنە زار بولىپ وتىر ەدىك، كەشە قۇداي وڭداپ، تەلەفون تۇتقاسىن ءوزى الدى.

سودان ەكەۋارا بىلايشا تىلدەسىپ قالدىق:

-اللو، مەن Abai.kz اقپاراتتىق پورتالىنىڭ ءجۋرناليستىمىن. ەسىمىم نۇرگەلدى. تۇرعىن جولداس، سىزبەن از-كەم سويلەسسەك دەپ ەك.

-امانسىزدار ما، اڭگىمە نە جايلى؟

-كونستيتۋتسياعا ەنگىزىلگەن وزگەرىستەر جايلى.

-تۇستەن كەيىن حابارلاسىڭىز. قازىر «ابەد» ۋاقىتى عوي. ساعات ءالى 2 بولعان جوق.

- ...

دەپۋتات تۇستەن كەيىن حابارلاس دەگەندە ساعات ءتىلى تۇپ-تۋرا 13:58-ءدى كورسەتىپ تۇرعان ەدى.

سىزدىقوۆ مىرزانىڭ ءوزى ايتقانداي تۇستەن كەيىن بىرنەشە مارتە قوڭىراۋ شالىپ ەك، تەلەفون تۇتقاسىن ەشكىم كوتەرمەدى.

ءبىز دەپۋتات تۇرعىن سىزدىقوۆتىڭ بۇل ارەكەتىن ەمەن-جارقىن اڭگىمەدەن قاشۋ دەپ تۇسىندىك. ايتپەسە، كابينەتىندە وتىرىپ، تەلەفونمەن تىلدەسكەن دەپۋتاتتىڭ 2 مينۋتتا  «ابەدكە» بارىپ كەلە قويۋى قيسىنسىز عوي.

تاقىرىبىمىزعا ورالايىق. پرەزيدەنتتىك سايلاۋعا قاتىستى وزگەرىسكە وراي رەسمي ورگاندار: «اركىم سايلاۋعا قاتىسا الاتىن. ءسويتىپ، سايلاۋ سايقىمازاق شوۋعا اينالاتىن ەدى» دەدى. راس، 2015 جىلى ءساۋىر ايىندا وتكەن پرەزيدەنتتىك سايلاۋعا كوممۋنيست سىزدىقوۆ جولداس پەن ەكولوگ ادىلعازى قۇسايىنوۆ دەيتىن ازاماتتار كانديدات بولدى. ءتىپتى، تەلىبەكوۆ باستاعان ءبىرتۇرلى ادامدار: ەكستراسەنستەر، بالشىلار، قارتاشىلار دا  سايلاۋعا ۇمىتكەر رەتىندە ات سالىستى. ءيا، ولار سايلاۋالدى دودانىڭ ء"سانىن" كەلتىرىپ-اق باقتى. سايلاۋدىڭ تالابى وزگەرەتىن بولىپ جاتسا دا، ناعىز سايلاۋعا دەيىن بۇنداي "كولدەنەڭ كوك اتتىلاردىڭ" ءالى تالايىن كورەتىن سياقتىمىز. سونىڭ بىرىمەن سۇحبات الايىق دەپ ەدىك، كوردىڭىز بە، 2 مينۋتتى سىلتاۋ قىلىپ اڭگىمەدەن قاشتى. ال، ءبىز 2 مينۋتتا ەكس-كانديدات تۇستەنىپ ۇلگەرە مە دەپ تاڭ قالدىق.

نۇرگەلدى ابدىعانيۇلى

Abai.kz