قىستى كۇنى "باقتىباي ءجۇنىسوۆ دەگەن كىم؟", "نە ءبىتىرىپتى؟", "باي بولسا نەگە حالىققا كومەكتەسپەيدى؟" دەگەن əڭگىمە ايتىلعان-دى. راسىمەن دە ول كىسىنى كوپ ادام بىلمەيتىن بولىپ شىقتى. ەرىكسىز "رياسىز قازاق" دەگەن ماقالا جازعانبىز Abai.kz. كە. ول كىسى جاساعان جاقسىلىعىن جارنامالامايتىن-ءدۇر. ەشكىمگە بəلسىنبەيتىن-ءدۇر.

كەيبىر ازاماتتار بالاعا بەس ءجۇز تەڭگە ۇستاتسا قايسىبىر باسىلىمدار بەبەۋلەپ كەتەتىن. سوندا بۇل قالاي دەيتىنبىز. سويتسەك، كەي ادامدار جارناما وتىن كوسەپ، قوزدىرادى ەكەن دە، ءبىزدىڭ كەيىپكەر ءۇنسىز قالادى ەكەن. باياعىدا ءبىر بيزنەسمەن سۇحباتتاسۋشىسىنان "قازدىڭ جۇمىرتقاسىنان قاراعاندا تاۋىقتىڭ جۇمىرتقاسى نەگە جاقسى وتەدى بىلەسىڭ بە؟" دەپ سۇراپتى دا، ءوزى: "بىلاي قاراساڭ قازدىڭ جۇمىرتقاسى əلدەقايدا ۇلكەن. تاۋىقتىكى كىشى. بىراق قاز جۇمىرتقا تاپقان سوڭ ءۇنسىز قالادى دا، تاۋىق قىت-قىتتاپ جارناما جاسايدى" دەپ جاۋاپ بەرىپتى. سول سەكىلدى جاقسىلىق جاساعان سوڭ قىت-قىتتايتىن پيارششيكتەردى ەل بىلەدى دە، باقتىباي ءجۇنىسوۆ سەكىلدى رياسىز قازاقتاردى ەل جىعا تانىمايدى.

بۇل پوستتى جازىپ وتىرعان سەبەبىم، وسىدان ءبىراز بۇرىن قاز داۋىستى قازىبەك بابامىزدىڭ 350 جىلدىق مەرەيتويىنا ەڭ ءبىرىنشى بولىپ باقتىباي اعام 5 ملن اۋدارعان بولاتىن. بۇگىن ات بəيگەسىنە 50 مىڭ دوللاردىڭ دجيپ اۆتوكولىگىن تىگەتىنىن ەستىپ، اعاممەن ماقتانىپ مارقايىپ وتىرمىن. "جاقسىنىڭ جاقسىلىعىن ايت نۇرى تاسىسىن" دەگەنگە سۇيەنىپ، سۇيىنشىلەپ وتىرعان حəل بىزدىكى. جاساسىن رياسىز قازاقتار!

جانات جاڭقاشۇلى

Facebook-تەگى پاراقشاسىنان