سۋرەتتە باشقۇرتستاننان كەلگەن ونەرپازدار ونەر كورسەتىپ جاتقان ءسات

قىرعىزستاننىڭ شولپان اتا قالاسىنداعى شىڭعىس ايتماتوۆ اتىنداعى «رۋح وردا» مادەني ورتالىعىندا 2 شىلدە كۇنى ءوتۋى جوسپارلانعان دۇنيەجۇزىلىك تۇركى حالىقتارىنىڭ قۇرىلتايى «رۋح ورداعا» بومبا قويىلعانى تۋرالى جالعان حابار ءتۇسۋى سەبەپتى وتپەي قالدى.

مادەني ورتالىققا بومبا قويىلعانى تۋرالى جەرگىلىكتى ميليتسياعا تاڭەرتەڭ حابار تۇسكەن. ميليتسيا ورتالىقتاعى ادامداردى تۇگەلدەي سىرتقا شىعارىپ، ورتالىقتى قورشاپ، بومبا ىزدەۋگە كىرىسكەن. بىراق، بومبا تابىلماي، حابار جالعان بولىپ شىقتى. جالعان حابار بەرىپ، تەلەفون شالعان ادامدى ميليتسيا ىزدەستىرىپ جاتىر. سونداي-اق، تەرگەۋ ىسىمەن قىرعىزستان ۇلتتىق قاۋىپسىزدىك قىزمەتىنىڭ مەملەكەتتىك كوميتەتى اينالىسۋدا.

«رۋح ورداعا» بومبا قويىلعانى تۋرالى جالعان اقپارات دۇنيەجۇزىلىك تۇركى حالىقتارىنىڭ قۇرىلتايىنىڭ جوسپارىن وزگەرتتى. قۇرىلتايدى وتكىزۋدى قازاقستان تاراپى ءوز قولىنا الىپ، شىلدەنىڭ جاقىن كۇندەرى الماتىدا وتكىزبەك.

24.kg اقپاراتتىق سايتىنىڭ «قۇرىلتاي قاتىسۋشىلارى تاراپ كەتتى» دەپ جازعان اقپاراتى جالعان. ويتكەنى، قۇرىلتايعا دەلەگاتتارى شولپان اتا قالاسىنداعى «باقىت» قوناق ءۇي جايىنا جينالىپ، كۇن بويى بەيرەسمي جاعدايدا ءوزارا رۋحاني-مادەني ماسەلەلەردى تالقىلاپ، ءبىر-بىرىنە تارتۋ تارالعى جاساپ، دەلەگاتتار ىشىندەگى ونەرپازدار ونەرلەرىن كورسەتىپ، ءار ۇلت ءوزىنىڭ ۇلتتىق كيىمدەرىن كيىپ، ءان ايتىپ، بيلەدى. وسىلايشا، قۇرىلتاي بەيرەسمي جاعدايدا باستالدى. ال، 21 ەلدەن كەلگەن دەلەگاتتار ءوز ارالارىنان الماتىدا وتەتىن قۇرىلتايعا قاتىساتىن ارنايى وكىل سايلادى. ءار ەلدىڭ اتىنان تاڭدالعان جيىرما شاقتى وكىل بۇگىن كەشكە الماتىعا جولعا شىعادى. ال، قالعان دەلەگاتتار جوسپارلانعان ۋاقىتتارى بويىنشا ەلدەرىنە قايتادى.

نۇرا ماتاي