جيەنىمنىڭ ماشينەسىنە جولدان ءبىر قىز وتىردى. سودان ەستىدىم، الماتىدا قىزداردىڭ جەكپە-جەگىن وتكىزەدى ەكەن. ءوزى جاقىندا عانا تالدىقورعانداعى جابىق جەردە وتكەن جەكپە-جەككە قاتىسىپ، ءبىراز اقشا ۇتىپ الىپتى. ونىڭ الدىندا الماتىدا ۇيىمداستىرىلعان تاعى بىرەۋىنە بارىپ، تارازدىق قىزدى جەڭىپ قايتىپتى.

ءتۇرى سونشالىقتى «جىندى» قىزعا ۇقسامايدى. كەيىن اڭگىمەلەسە كەلە، مىنەزدى قىز ەكەنى بىلىنە باستادى. جەكپە-جەككە ەكى رەت قاتىسىپ، ەكەۋىندە دە ءوزى سياقتى قازاق قىزدارىمەن شىعىپتى. سوعان قاراعاندا، قازاق قىزدارىن ەندى ءبىر-بىرىمەن توبەلەستىرىپ، بىرەۋلەر سودان اقشا تابا باستاعان سەكىلدى.

«وندايدى تەلەبىزىردەن كورسەتپەيدى. بىراق الماتىدا پوستوياننو ءوتىپ تۇرادى. توبەلەسەتىندەردىڭ توقسان بەس پروتسەنتى قازاق قىزدارى. ەندى، بىرەۋلەر اقشانى جەڭىل جۇرىسپەن تابادى، بىرەۋلەر وسىلاي توبەلەسىپ ءجۇرىپ تابادى. ءبىز سياقتىلارعا باسقا ۆاريانت جوق قوي» دەپ مۇنايىپ قويادى.

جيەنىمنىڭ دە مىنەزى شاتاق. الگى ءسوزدى ەستىگەندە، قاتتى اشۋلانىپ كەتكەنىن بايقادىم. قىزعا ەمەس، قازاق قىزدارىن ءبىر-بىرىمەن يتشە توبەلەستىرىپ، سودان اقشا تاۋىپ جۇرگەندەرگە اشۋلانىپ وتىردى. ءبىراز جەرگە دەيىن ۇندەمەي كەلدىك تە، ءوزىن البينا دەپ اتاعان الگى قارىنداستى ايتقان جەرىنە دەيىن تەگىن جەتكىزىپ تاستاپ، ۇيگە قايتتىق. جازعىم كەلمەپ ەدى، بىراق بۇل سۇمدىقتى بارشا حالىق ءبىلسىن دەپ جازدىم...

جولىمبەت ماكىش

Facebook-تەگى پاراقشاسىنان