«ەكسپو-2017» حالىقارالىق مامانداندىرىلعان كورمە – ءالەم الدىندا مەملەكەتىمىزدىڭ مارتەبەسىن اسقاقتاتىپ، مۇمكىندىكتەرىن  پاش ەتەتىن  ماڭىزى زور جوبا. ءبىلىم مەن عىلىمعا بەت بۇرعان مۇنداي الىپ شارا ەل تاريحىندا  بۇرىن سوڭدى بولعان ەمەس. كورمە شاعىن جانە ورتا بيزنەستى وركەندەتىپ، استانانىڭ ينفراقۇرىلىمىنا ۇلكەن سەرپىلىس بەرەدى.

«بولاشاق ەنەرگياسى» تاقىرىبىنداعى حالىقارالىق كورمە قازىرگى تاڭدا ادامزات ءۇشىن ەنەرگەتيكالىق رەسۋرستاردى ءتيىمدى پايدالانۋ پروبلەماسىنىڭ وزەكتىلىگىن ايقىندايدى.

تمد اۋماعىندا العاش رەت وتكىزىلىپ وتىرعان  "استانا ەكسپو-2017" حالىقارالىق كورمەسىنىڭ ءوز جۇمىسىن باستاعانىنا دا ءبىر جارىم اي بولىپتى.

وسى كۇنگە دەيىن حالىقارالىق كورمەنى تاماشالاۋعا الەمنىڭ تۇكپىر-تۇكپىرىنەن مىڭداعان شەتەلدىك قوناقتار مەن وتانداستارىمىز كەلىپ-كەتۋدە، قازىر دە كەلۋشىلەردىڭ سانى ۇزىلەر ەمەس.

قازاق ءبىلىمىنىڭ قارا شاڭىراعى  – اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ۇجىمى دا استانا تورىندە سالتانات قۇرعان «ەكسپو-2017» كورمەسىنە ءىس-ساپارعا جولداما الىپ، 25 شىلدە كۇنى ۇجىمنىڭ العاشقى لەگى ەلورداعا تابان تىرەدى.

ۇجىمدى كورمەگە جولداۋ ۋنيۆەرسيتەت رەكتورى، پروفەسسور تاكير بالىقباەۆتىڭ تىكەلەي قولداۋىمەن جۇرگىزىلىپ، ءىس-ساپار شىعىندارى ۋنيۆەرسيتەت قاراجاتى ەسەبىنەن تولەندى. 

«ەكسپو» كورمەسىنە جولداما العانداردىڭ قاتارىندا ۋنيۆەرسيتەتتە ۇزاق جىلدار بويى ەرەن ەڭبەكتەرىمەن ەرەكشەلەنگەن ۇستازدار قاۋىمى مەن قىزمەتكەرلەرى جانە دە وقۋدا وزات، قوعامدىق ومىردە بەلسەندى ءبىلىم الۋشىلار بولدى. اتاپ ايتقاندا، ۋنيۆەرسيتەتىمىزدىڭ ارداگەر-ۇستازى، پەداگوگيكا عىلىمدارىنىڭ دوكتورى كۇلاش ورازبەكوۆا، تاريح عىلىمدارىنىڭ كانديداتى، پروفەسسور مۇرات سەمبينوۆ، «جوعارعى وقۋ ورنىنىڭ ۇزدىك وقىتۋشىسى» (2014 ج.) اتاعىنىڭ يەگەرى، گەوگرافيا عىلىمدارىنىڭ دوكتورى باحادۋرحان ابديماناپوۆ، حالىقارالىق قاتىناستار كافەدراسىنىڭ مەڭگەرۋشىسى، ساياسي عىلىمدارىنىڭ دوكتورى، پروفەسسور جومارت سيمتيكوۆ، باستاۋىشتا وقىتۋ پەداگوگيكاسى مەن ادىستەمەسى كافەدراسىنىڭ مەڭگەرۋشىسى، پەداگوگيكا عىلىمدارىنىڭ دوكتورى، پروفەسسور ءازيا جۇماباەۆا جانە ت.ب.

كورمەگە بارعان ۋنيۆەرسيتەت ۇجىمىن ل.م. گۋميلەۆ اتىنداعى ەۋرازيا ۇلتتىق ۋنيۆەرسيتەتىندەگى ارىپتەستەرىمىز جىلى قابىلداپ،  ستۋدەنتتەر ۇيىنە جايعاستىردى.

كەلەسى كۇنى بەلسەندىلەر توبى حالىقارالىق كورمەنى تاماشالاۋدى  قازاقستاننىڭ ۇلتتىق پاۆيلونى ورنالاسقان "نۇر الەم" سفەراسىنان باستادى.  ەلىمىزدىڭ  سالت-ءداستۇرى، مادەنيەتى، تاريحىمەن قاتار «جاسامپاز ەنەرگيانىڭ» ۇزدىك جوبالارىن ۇسىنعان بۇل پاۆيلوننان قازۇپۋلىقتار ۇلكەن اسەر الدى.

ودان ءارى ۋنيۆەرسيتەت ۇجىمى وڭتۇستىك كورەيا، سينگاپۋر، مالايزيا، جاپونيا، گەرمانيا، فرانتسيا، ۇلىبريتانيا سىندى دامىعان مەملەكەتتەردىڭ جاسىل تەحنولوگيالار بويىنشا ۇسىنعان يننوۆاتسيالىق جوبالارىمەن تانىستى.

قىسقا مەرزىمدى بولسا دا تاعىلىمى مول تانىمدىق ساپاردان رۋحاني ازىق العان ارىپتەستەرىمىز ۋنيۆەرسيتەت باسشىلىعىنا شەكسىز العىستارىن ءبىلدىردى.

«جاقسىنى كورمەككە» دەگەندەي،  ۋنيۆەرسيتەت بەلسەندىلەرىنىڭ تاعى ءبىر لەگى تامىز ايىندا حالىقارالىق كورمەنى تاماشالاۋ ءۇشىن اتتانباق.

تاعى ءبىر ايتا كەتەتىن جايت، ۋنيۆەرسيتەتىمىزدىڭ عىلىمي-پەداگوگيكالىق قاۋىمى مەن بەلسەندى جاستارى «ەكسپو» كورمەسىن ۇيىمداستىرۋعا وزىندىك ۇلەسىن قوسۋدا. اتاپ ايتقاندا، ۇلتتىق پاۆيلوننىڭ «بولاشاق ەنەرگياسى» ەكسپوزيتسيا قاتارىندا اباي اتىنداعى قازاق ۇلتتىق پەداگوگيكالىق ۋنيۆەرسيتەتى «تەوريالىق جانە تاجىريبەلىك فيزيكا» عىلىمي-زەرتتەۋ ينستيتۋتىنىڭ «كومىرسۋتەكتىك گاز قوسپاسىن ءبولىپ الۋعا ارنالعان قۇرىلعى» اتتى جوباسىنىڭ ورنالاسۋى ۋنيۆەرسيتەتىمىزدىڭ مارتەبەسىن اسقاقتاتىپ، الەمدىك عىلىمي قاۋىمداستىقتىڭ قىزىعۋشىلىعىن وياتتى. بۇل جوبا  كومىرسۋتەكتى گاز قوسپاسىن تاسىمالداۋ، وڭدەۋ جانە پايدالانۋ بارىسىندا ەكولوگيالىق قاۋىپتەردى تومەندەتۋگە باعىتتالعان. جوبا جەتەكشىسى فيزيكا-ماتەماتيكا عىلىمدارىنىڭ دوكتورى ۆ.ن. كوسوۆ. بۇدان باسقا كورمەدە ۋنيۆەرسيتەتىمىزدىڭ 20 ستۋدەنتى ەرىكتىلەر قاتارىندا ەل يگىلىگىنە قىزمەت جاساۋدا.

سوربوننا-قازاقستان ينستيتۋتى «حالىقارالىق قاتىناستار»، «مەنەدجمەنت» ماماندىقتارىنىڭ ماگيسترانتتارى سوربوننا پاريج Cيتە  ۋنيۆەرسيتەتىنىڭ ۇيىمداستىرۋىمەن «استانا EXPO-2017» – فرانتسيا پاۆيلونىنا  «بولاشاق ەنەرگياسى» فرانكوتىلدەس جاستار جوبالارى كونكۋرسى اياسىندا  «ەكولوگيالىق قالالىق كولىك يدەيالارىن دارىپتەۋ»، «جاسىل تەحنولوگيا: سۋ جانە اۋانىڭ ءوندىرىلۋى»، «تەكەلى قالاسىنىڭ «ەكو-قالا» رەتىندە پايدا بولۋى» تاقىرىپتارى بويىنشا عىلىمي جۇمىستارىن ۇسىندى.  اۋقىمى كەڭ، ماڭىزى زور  شارا  ۋنيۆەرسيتەت عالىمدارىنىڭ عىلىمي ىزدەنىستەرگە دەگەن ىنتالارىن وياتىپ، جاڭا باستامالارعا سەرپىن بەردى.

قازاقستاننىڭ الەمدىك ارەناداعى بەدەلىن بيىكتەتەتىن بۇل تاريحي وقيعا – ەلىمىزدىڭ ەڭسەلىلىگىن، مەم­لەكەتىمىزدىڭ مىعىمدىعىن، ۇلتىمىزدىڭ  ۇلىلىعىن ۇلىقتايتىن  ۇلى جوبا!

جاناتبەك  ىشپەكباەۆ، اباي اتىنداعى قازۇپۋ-ءنىڭ تاربيە ءىسى جونىندەگى پرورەكتورى، پروفەسسور

Abai.kz