رەجيسسەر ءسابيت قۇرمانبەكوۆتىڭ «ورالمان» تولىقمەتراجدى كوركەم ءفيلمى ءحىىى حالىقارالىق «ەۋرازيا» كينوفەستيۆالىنىڭ گران-ءپريىن يەلەندى. ش.ايمانوۆ اتىنداعى «قازاقفيلم» كينوستۋدياسىندا («قادام» جشس ستۋدياسىنىڭ قاتىسۋىمەن) قر مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن بۇل كارتينا كينوفەستيۆالدىڭ نەگىزگى باعدارلاماسىنا قاتىسقان جالعىز وتاندىق تۋىندى.

 –  «ەۋرازيا» كينوفەستيۆالى ەلىمىزدەگى عانا ەمەس، جالپى ورتالىق ازيا اۋماعىنداعى ەڭ ۇلكەن كينوالاڭ. سوندىقتان دا بۇل كينوفەستيۆالدىڭ ەڭ باستى جۇلدەسىن جەڭىپ الۋ مەن ءۇشىن ابىروي. وسى ورايدا ءتۇسىرىلىم توبىن جەڭىسىمىزبەن قۇتتىقتاعىم كەلىپ وتىر، ويتكەنى، ولار بولماسا مەن بۇل جۇلدەنى ۇتىپ الماس ەدىم – دەدى ءسابيت قۇرمانبەكوۆ.

«ورالمان» ءفيلمى تۋعان جەرىنەن كەتۋگە ءماجبۇر بولعان، الايدا ونداعان جىلدار وتكەن سوڭ اۋعانستاننان ەلىنە قايتا ورالعان قانداستارىمىز جايلى باياندايدى. فيلمگە دۋلىعا اقمولدا، ەسىم سەگىزباەۆ، ەرجان ءتۇسىپوۆ، شىنار اسقاروۆا، بايان قاجنابيەۆا سىندى قازاقستاندىق تانىمال اكتەرلەر تۇسكەن.

- فيلم كينوفەستيۆالدەردە زور باعالانىپ جاتىر. يراندا وتكەن كينوفەستيۆالدە باستى جۇلدەگە يە بولدى. مەن بۇعان قۋانام. الايدا مەن ءۇشىن ەڭ باستىسى بۇل ءفيلمدى قاراپايىم كورەرمەندەرگە كورسەتۋ. وسى استاناداعى كورسەتىلىمدە كورەرمەندەر ءفيلمدى جاقسى قابىلدادى جانە يراندىق اۋديتوريا دا، ونىڭ ىشىندە ەتنيكالىق قازاقتار قىزىعا كورگەن بولاتىن. ءبىز «ورالمان» ءفيلمىن ۇستىمىزدەگى جىلى جالپىۇلتتىق پروكاتقا شىعارۋدى جوسپارلاپ وتىرمىز. سونىمەن قاتار،  شەت ەلدەردە، اسىرەسە قازاق دياسپورالارى بار مەملەكەتتەردە پروكاتتاۋدى كوزدەپ وتىرمىز.

نەگىزى 1998 جىلى قالانعان حالىقارالىق «ەۋرازيا» كينوفەستيۆالى ورتالىق ازياداعى ەڭ ۇلكەن كينوفورۋم بولىپ تابىلادى. بيىلعى جىلى فەستيۆال اياسىندا بارلىق كونكۋرستىق جانە كونكۋرستان تىس باعدارلامالارعا قاتىسقان تولىقمەترلى جانە قىسقامەترلى، اۆتورلىق جانە جانرلىق فيلمدەردىڭ رەكوردتىق كورسەتكىشى - 296 كارتينا كورسەتىلدى.  نەگىزگى كونكۋرستىق باعدارلامادا 13 تولىقمەترلى جانە قىسقامەترلى فيلمدەر كونكۋرسىندا 30 كارتينا قاتىستى. ال فەستيۆالگە 200 دەن استام قوناق شاقىرىلدى. ولاردىڭ قاتارىندا نيكولاس كەيدج، ەدريەن بروۋدي جانە دجون مالكوۆيچ بار.

كينوفەستيۆال تاريحىندا العاش رەت تمد ەلدەرى جانە قىتاي، ءۇندىستان، وڭتۇستىك كورەيا، اقش جانە ەۋروپا ەلدەرىنەن كەلگەن ديستريبيۋتەرلەردىڭ قاتىسۋىمەن Eurasia Film Market  كينونارىعى ءوتتى. ال Eurasia Spotlight بيزنەس الاڭى ادەتتەگىدەي كينوجوبالاردىڭ قىزىقتى پيتچينگتەرىن، كينو سالاسى ماڭىنداعى ءتۇرلى تاقىرىپتارعا نەگىزدەلگەن دوڭگەلەك ۇستەلدەردى، ءباسپاسوز-كونفەرەنتسيالارىن، شەبەرلىك-سىنىپتارىن جانە كينويندۋستريانىڭ ۇزدىك ماماندارى قاتىسقان ارنايى ءىس-شارالاردى ۇسىندى.

ش.ايمانوۆ اتىنداعى «قازاقفيلم» كينوستۋدياسى تۇسىرگەن فيلمدەر ءار جىلدارى «ەۋرازيا» كينوفەستيۆالىنىڭ ءتۇرلى جۇلدەلەرىن جانە گران-ءپريىن جەڭىپ العان. ماسەلەن، دانيار سالاماتتىڭ «اكەم ەكەۋمىز» كارتيناسى، سەرىك اپرىموۆتىڭ «باۋىرى» جانە ناريمان تورەباەۆتىڭ «شۋاقتى كۇندەرى» ۇزدىك رەجيسسۋرا جۇلدەسىن يەمدەنسە، جاڭابەك جەتىرۋوۆتىڭ «دۇنيە جارىق»  جانە اباي قۇلبايدىڭ «ستريج» فيلمدەرى «ۇزدىك ازيا ءفيلمى» اتانعان، ال ارداق امىرقۇلوۆتىڭ «قوش بول، گۇلسارى» كارتيناسى گران-پريگە لايىق دەپ تانىلعان.

ەستەرىڭىزگە سالا كەتەيىك، ۇستىمىزدەگى جىلدىڭ ءساۋىر ايىندا يراننىڭ استاناسى تەگەراندا وتكەن 35-ءشى حالىقارالىق فادجر كينوفەستيۆالىندە رەجيسسەر ءسابيت قۇرمانبەكوۆتىڭ «ورالمان» ءفيلمى شەتەلدىك فيلمدەر اراسىنان توپ جارىپ، باس جۇلدەنى - "ازيانىڭ ۇزدىك ءفيلمى" جۇلدەسىن جەڭىپ العان بولاتىن.

Abai.kz