سەيسەنبى, 2 ماۋسىم 2020
COVID-19 قازاقستاندا. جۇقتىرعاندار — 11571. جازىلعاندار — 5587. قايتىس بولعاندار — 41
3312 0 پىكىر 31 شىلدە, 2017 ساعات 11:08

الاكولدە بلوگەرلەر باس قوستى

جەتىسۋدا وتكەن 28-30 شىلدە ارالىعىندا «BlogCamp Alakol summer school» شاراسىندا بۇگىنگى كۇننىڭ ترەندتى بولىپ تۇرعان ەلەكتروندى باق پەن الەۋمەتتىك جەلىنىڭ جىلىگىن شاشقان ماماندار ماسستەر-كلاسس وتكىزىپ، ءوز بىلىمدەرىمەن ءبولىستى.

قازاقستاننىڭ ءار وڭىرىنەن كەلگەن قاتىسۋشىلار الماتى وبلىسىنىڭ الاكول جاعالاۋىندا ەكى كۇن بويى ساباق الىپ، بىلىمدەرىن جەتىلدىردى.

جازعى مەكتەپتىڭ اشىلۋ سالتاناتىنا وبلىس اكىمىنىڭ ورىنباسارى جاقسىلىق ومار، ورتالىق كوممۋنيكاتسيالار قىزمەتىنىڭ ديرەكتورى ارتۋر نىعمەتوۆ، الماتى وبلىستىق «جەتىسۋ» تەلەارناسىنىڭ ديرەكتورى ءارى «ايتۋعا وڭاي» باعدارلاماسىنىڭ جۇرگىزۋشىسى بەيسەن قۇرانبەك جانە وبلىستىق ىشكى ساياسات باسقارماسىنىڭ باسشىسى رۋستام ءاليۇلى، ەلىمىزدىڭ بەلگىلى جۋرناليستەرى مەن بلوگەرلەرى باس قوستى.

باسقوسۋدا العاشقى ءسوز وبلىس اكىمىنىڭ ورىنباسارى جاقسىلىق مۇقاشۇلىنا بەرىلىپ، الەۋمەتتىك جەلىدەگى مادەنيەتتىلىك پەن ينتەرنەت جۋرناليستيكاسى جايىندا ءسوز قوزعالىپ، «BlogCamp Alakol summer school» جازعى مەكتەبىنىڭ جۇمىسىنا ساتتىلىك تىلەدى.

«قازاقستان رەسپۋبليكاسىنىڭ ستاتيستيكا كوميتەتىنىڭ مالىمەتىنشە، 2008 جىلى الەۋمەتتىك جەلى قولدانۋشىلارى الماتى وبلىسىندا نەبارى 7,3 پايىزدى قۇراسا، 2016 جىلعى ستاتيستيكا 88,2% بولعانىن كورسەتەدى. بۇل كورسەتكىش وبلىس تۇرعىندارىنىڭ عالامتور مۇمكىندىكتەرىن جاقسى مەڭگەرگەنىن كورسەتەدى»، - دەپ اتاپ ءوتتى جاقسىلىق ومار.

ەكى كۇنگە جالعاسقان شاراعا ەلىمىزدىڭ مەديا تۇلعالارى ايدوس سارىم، الىشەر ەلىكباەۆ، ياكوۆ فەدوروۆ پەن وركەن كەنجەبەك سىندى ازاماتتار قاتىسۋشىلارعا ماستەر-كلاسس وتكىزدى. كول جاعالاۋىندا وتكەن بۇل شارادا كوپتەگەن قىزىقتى اقپاراتتار بەرىلدى. سونىمەن قاتار، الەۋمەتتىك جەلى بەلسەندىلەرى ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا ايتىلعان باعىتتاردى قولداي وتىرىپ، قازاقستاندى جاڭا كەزەڭگە الىپ شىعۋ جايىن تالقىلادى.

جەرگىلىكتى اتقارۋشى ورگاننىڭ باق-پەن بايلانىسى جونىندە ماستەر-كلاسستا الىشەر ەلىكباەۆ قازاقستاننىڭ ءتۇرلى مەكەمەلەرى مەن كومپانيالارىنىڭ الەۋمەتتىك جەلىدەگى ارتىقشىلىعى مەن كەمشىلىكتەرىن ناقتى كەيستەر ارقىلى كورسەتىپ، قانداي جاعدايدا قانداي امالدار ىستەۋ كەرەكتىگىن جەتكىزدى.

ال، ماستەر-كلاسستارىن تاندەممەن وتكىزگەن ياكوۆ فەدوروۆ پەن وركەن كەنجەبەك اۋديتوريامەن جۇمىس ىستەۋ ارقىلى پراكتيكالىق تاجىربيە جيناۋعا كوپ مۇمكىندىك بەردى.

ەلەكتوروندىق باق پەن الەۋمەتتىك جەلىنى ءتيىمدى قولدانا ءبىلۋدى ۇيرەتەتىن   «BlogCamp Alakol summer school» شاراسىندا ەلىمىزدىڭ بارلىق وڭىرىنەن كەلگەن جەلى بەلسەندىلەرى مەن ايماقتارداعى وڭىرلىك كوممۋنيكاتسيالار قىزمەتىنىنىڭ وكىلدەرى،  جالپى سانى 70-تەن استام ادام قاتىستى.

Abai.kz

0 پىكىر