سەنبى, 18 قاڭتار 2020
تۋعان جەرگە تۋىڭ تىك! 2861 0 پىكىر 31 شىلدە, 2017 ساعات 12:46

تۇلەكتەردىڭ تۋعان جەرگە سىيى

 

 

وتانعا دەگەن پاتريوتتىق سەزىم تۋعان جەردى قۇرمەتتەۋدەن باستالادى. ەلباسىمىزدىڭ رۋحاني جاڭعىرۋ ماقالاسىنداعى ءبىر ءبولىم تۋعان جەردى تۇلەتۋ قاجەتتىگىنە باعىتتالعان. جوبا بويىنشا ونى كىم ۇيىمداستىرىپ، اتقارۋ كەرەكتىگى دە ناقتى كورسەتىلگەن. بۇل كۇندە ەل ىشىندە ءوز اۋىلىنىڭ كوركەيۋىنە اتسالىسىپ جۇرگەن ازاماتتار از ەمەس. مىسالى، وڭتۇستىك قازاقستان وبلىسى، ورداباسى اۋدانى تورتكۇل اۋىلىنىڭ تۇلەكتەرى وسىنداي يگى ىسكە ۇيىتقى بولىپ ءجۇر دەپ حابارلايدى «قازاقستان-شىمكەنت» ارناسى.

تورتكۇلدە 10 مىڭنان استام تۇرعىن بار. ورتالىق ساياباقتا سالىنعان سپورت الاڭشاسى جۇرشىلىقتىڭ يگىلىگىنە جاراپ تۇر. بەكاسىل سۇلتانبەك قولى بوساعان ساتتە كۇندە وسىندا. فۋتبول وينايدى. دەنەنى شىنىقتىراتىن ءتۇرلى جابدىقتارمەن جاتتىعادى.

وسى الاڭ سالىنعالى جاقسى بولىپ قالدى. كۇندە وسىندا كەلىپ، تۋرنيككە تارتىلىپ دەنەمدى شىنىقتىرىپ تۇرام. وسىنى سالىپ بەرگەن 79-شى تۋىلعان اعالارعا راحمەت ايتامىز، - دەيدى تورتكۇل اۋىلىنىڭ تۇرعىنى بەكاسىل سۇلتانبەك.

ءىزباسار ءىنى العىسىن ارقالاعاندار  مەكتەپتى بىتىرگەندەرىنە 20 جىلدىق مەرەيتويىن وتكەرەردە ەل ءۇشىن وسىنداي يگىلىكتى ءىس جاساعان كورىنەدى.   50 ازامات ورتادان قارجى جيناپ، ساياباقتاعى بوس جاتقان جەردى اۋىل جاستارىنىڭ قاجەتىنە جاراتىپ، تاماشا الاڭ جابدىقتاپ بەرىپتى.

ال، وسىنوۋ يگىلىكتى ءىستى ۇيىمداستىرۋشىلاردىڭ ءبىرى حاسەن ادىلبەكوۆ: «ساياباقتاعى بوس جاتقان جەردى اۋىل جاستارىنىڭ قاجەتىنە جاراتۋ اسا قيىن بولعان جوق. ۇيىمشىلدىقپەن اتقارعان جۇمىس قاشاندا جەمىستى بولادى ەمەس پە؟»، - دەيدى.

بۇل جەردە بالالار وينايتىن ءتۇرلى اتكەنشەكتەر مەن اتتراكتسيوندار قويىلىپتى. ءتىپتى،  كىشىگىرىم مادەني  شارالاردى وتكىزەتىن ساحنا دا بار.

وسىنوۋ يگىلىكتى ىسكە سۇيسىنگەن تورتكۇل اۋىل وكرۋگى اكىمدىگىنىڭ باس مامانى مارات باقبەرگەن: «ەندى بۇل جەردى كۇتىپ-باپتاۋ، ۇقىپتى ۇستاۋ - ءبىزدىڭ موينىمىزدا. سوندىقتان وسى الاڭنىڭ تازالىعىنا قاراپ، بۇزىلماۋىن باقىلاۋدا ۇستاپ تۇرمىز»، - دەپ ۋادە بەردى.

 

راس، شىن نيەت بولسا، باعىنبايتىن بەلەس جوق. تۋعان جەرگە دەگەن سۇيىسپەنشىلىك 50 ەردى وسىلايشا، يگى ءىستى اتقارۋعا جەتەلەدى. بىرىكتى، اقىلداستى، ناتيجەسىندە اۋىلدىڭ كوركى اشىلدى. بۇگىندە بۇل الاڭدا بالالاردىڭ قۋانىشتى ءۇنى ەستىلەدى. ەلباسىمىز ايتقان رۋحاني جاڭعىرۋ، تۋعان جەر باعدارلاماسىنا ءاربىر ازامات وسىلاي ۇلەس قوسسا، قازاقستاننىڭ  ءاربىر اۋىلى گۇلدەنە بەرەرى اقيقات.

اباي-اقپارات

0 پىكىر