سەنبى, 21 قىركۇيەك 2019
ديدار-عايىپ 5934 1 پىكىر 3 تامىز, 2017 ساعات 12:31

تاعدىر ىزعارى. ءبىز سەندەردى ماڭگى ۇمىتپايمىز!

«ءومىر سوقپاعىندا قالدىرعان ءىزىڭ انىق بولسا، ول سەنىڭ وسكەنىڭ. ال، ءىزىڭ ەلەۋسىز بولىپ، ءۇمىتىلا باستاسا، ول سەنىڭ وشكەنىڭ»، ‒ دەيدى، دانا حالقىمىز. ءار ادامنىڭ قالدىرعان ءىزى – قوعامعا، حالقىنا سىڭىرگەن ەڭبەگىمەن، ەڭ باستىسى، ءىزىن جالعاستىرار ۇرپاعىنىڭ ەلى قۇپتارلىق وڭ ىستەرىمەن ولشەنەر. ءبىز دە 52 جىلداي قاتار ورىلگەن ومىرىمىزدە، ءبىرىمىز حالىققا ءبىلىم بەرۋ، ەكىنشىمىز مەملەكەتتىك قىزمەت سالاسىندا حال-قادەرىمىزشە ەڭبەك ەتتىك، قازىر زەينەتكەرمىز. ەڭبەگىمىز ەلەندى، مەملەكەتتىك ماراپاتتان دا قۇرالاقان ەمەسپىز. ايتسە دە ءبىزدىڭ ۇكىلى ءۇمىتىمىز ۇلىمىز ەسەنمەن جانە تۇڭعىش نەمەرەمىز دارينامەن بايلانىستى بولاتىن.

ەسەن ۇلىمىز تۋا سالىپ، 2 جىلدان استام اۋرۋحانادان شىقپادى. مۇمكىن، دارىگەرلەردىڭ كومەگى، تۋىستاردىڭ سابيگە دەگەن ىقىلاسى، ءوزىنىڭ ومىرگە دەگەن قۇلشىنىسى بولار، دەنساۋلىعى وڭالىپ، قۇرداستارىمەن تاي-قۇلىنداي تەبىسىپ، ويناپ كەتتى. ءتىپتى، 19 جاسىندا ءوز قالاۋى بويىنشا ۇيلەنۋىنە دە قارسى بولعان جوقپىز. 20 جاسىندا قىزى دارينا دۇنيەگە كەلدى. ءوزى تاڭداپ العان ماماندىعىنا ساي 2 جوعارى وقۋ ورنىن ءبىتىرىپ، اتقارىپ جۇرگەن قىزمەتىنىڭ قىر-سىرىن تەرەڭ ءتۇسىنىپ، قىزمەت ساتىسى دا وسە باستاعان بولاتىن.

ال، دارينا-داكوليانىڭ ومىرگە كەلۋى ءبىزدىڭ شاڭىراعىمىزدى ەرەكشە قۋانىشقا بولەدى. تۋمىسىنان زەرەك، العىر داكوليا وزدىگىنەن ءارىپ تانىپ، سىنىپ اتتاپ، 14 جاسىندا 9-شى سىنىپتى ۇزدىك ءبىتىردى. قازاق، ورىس، اعىلشىن تىلدەرىندە ولەڭ، رەفەراتتار جازۋشى ەدى. سونىمەن بىرگە سۋرەت سالۋ، بي ونەرىندە تالانتى ەرەكشە بولدى. قىزىمىز دۇنيەدەن وزعان سوڭ جارىق كورگەن «اسقاعىم – استانام» (شىعارمالار توپتاماسى), «كوڭىل كوزى» (سۋرەتتەر كاتالوگى) رەسپۋبليكا كىتاپحانالارىنا جىبەرىلگەن بولاتىن. قازىر وقۋشىلاردىڭ وتىنىشىنە ساي، اتالعان تۋىندىلاردىڭ ەكىنشى، تولىقتىرىلعان نۇسقاسى جارىق كوردى. دارينا ەسەنقىزى اۋجانتەگى «حان ءتاڭىرى قىراندارى – ۇلىلاردىڭ ۇرپاقتارىمىز» اتتى ەنتسيكلوپەديالىق جيناققا كىرىپ، كوپتەگەن اقىن-جازۋشىلار دارينانىڭ ەڭبەكتەرىنە سىلتەمە جاساي باستادى. وكىنىشكە وراي، 2007 جىلدىڭ 3-ءشى تامازىندا بولعان كولىك اپاتىنان ۇلىمىز ەسەن، سۇيىكتى نەمەرەمىز دارينا قايتىس بولدى. ەندى نازگۇل بەكتۇرسىنقىزى ەكەۋمىزدىڭ ءومىرىمىز – ەسەن مەن دارينا قاسىمىزدا بولعان باقىتتى جىلدار مەن قوس قۇلىندارىمىزدان ايىرىلىپ، كەڭ دۇنيە اياقاستى تارىلعان جىلداردان تۇراتىنداي.

ءسىرا، حالقىمىز «ادام ءۇش كۇننەن كەيىن كورگە دە ۇيرەنەدى». – دەگەن ءسوزدى بەكەر ايتپاعان بولار. ءبىز دە سەندەرسىز 10 جىلدىڭ ىشىندە قيال مەن ساعىنىش كەمەرىنەن اسقان ۆيرتۋالدى ءومىر سۇرۋگە بەيىمدەلگەندەيمىز. وسى جىلدار ىشىندە ەكەۋىڭنىڭ بيىك رۋحتارىنا باعىشتالعان «قوس جۇلدىز. دۆە زۆەزدى.»،  «تاعدىردىڭ توقسان ءتۇيىنى»، «زەردە جاڭعىرىعى. سكۆوز پريزمۋ ۆرەمەني»، «تەگىنە تارتقان تۇلەكتەر. سترانيتسى پامياتي» اتتى ەڭبەكتەرىمىز جارىق كوردى. تەك ءسويتىپ قانا سەندەرگە دەگەن ساعىنىشىمىزدى ازداپ بولسا دا باسقاندايمىز.

ەندىگى ءبىزدىڭ ءۇمىتىمىز، سول كولىك اپاتىندا دارينا اپكەسى ءوز دەنەسىمەن قورعاپ قالعان، كەنجە نەمەرەمىز ديماتايدا. ديماش تامىزدىڭ 31-دە 13-كە كەلەدى. دارينا وقىعان مەكتەپ-ليتسەيدىڭ 6-شى سىنىبىن ماقتاۋ گراموتاسىمەن ءبىتىردى. جازعان رەفەراتتارى انگليادا، چەحيادا، پولشادا شىقتى. وقۋشىلاردىڭ ماتەماتيكا ءپانى بويىنشا  بولگاريادا وتكەن حالىقارالىق بايقاۋىندا ءبىرىنشى ورىندى جەڭىپ الدى. «بالداۋرەن» اتتى سۋرەتتەر كاتالوگى جانە «كوكبورى – دالا تاعىسى» اتتى اڭگىمەلەر جيناعى جارىق كوردى. بۇل دا بولسا ءبىزدىڭ قىرىق جاماۋ كوڭىلىمىزگە دەمەۋ عوي. ۇلى اباي دا «ادامنىڭ ءبىر قىزىعى بالا دەگەن...»، ‒ دەپ، دۇنيەدەن ەرتە وزعان ءابىشى ء(ابدراحمان) ەسىنە تۇسكەندە جازعان بولار...

ءبىز دە، مىنە، بالالارىمىزدىڭ ءفاني دۇنيەدەن وزعانىنا 10 جىل بولۋى قارساڭىندا ەسكە الىپ وتىرمىز.

ەسەن قۇلىنىم، دارينا بالاپانىم، سەندەر ءبىزدىڭ ماڭگى جۇرەگىمىزدەسىڭدەر.

اكەڭ، اتاڭ بولات ءاۋجانۇلى

اناڭ، اپاڭ نازگۇل بەكتۇرسىنقىزى

Abai.kz

1 پىكىر