قر ءبىلىم جانە عىلىم ءمينيسترى ەرلان ساعاديەۆ قوعامدىق رەزونانس تۋدىرعان مەملەكەتتىك ءبىلىم بەرۋ گرانتتارىنىڭ بولىنۋىنە قاتىستى تۇسىنىكتەمە بەردى، -دەپ حابارلايدى Abai.kz اقپاراتتىق پورتالى قازاقپاراتقا  سىلتەمە جاساپ.

«ءبىز گرانتتى ەكونوميكانىڭ باسىم باعىتتارى بويىنشا بولەمىز. ماسەلەن، ەسەپتەۋ تەحنيكاسىنا 610, قۇقىقتانۋعا - 45 گرانت بەرەمىز. جالپى مەديتسيناعا 2,5 مىڭ گرانت بولسەك، ستوماتولوگياعا - بار بولعانى 45. مۇنىڭ بارلىعى ءتۇرلى دامۋ باعدارلامالارىندا بەكىتىلگەن. سايكەسىنشە، جىل سايىن جوعارى بالل جيناعاندار بەلگىلى ءبىر ماماندىققا گرانتقا تۇسە الماي قالادى، ال تومەن بالل جيناعاندار كەرسىنشە  گرانت يەگەرى اتانادى»، - دەدى مينيستر بۇگىنگى ۇكىمەت وتىرىسىندا.

ونىڭ ايتۋىنشا، بۇل ماسەلە ءبىرىنشى رەت كوتەرىلىپ وتىرعان جوق جانە جىل سايىن بۇل پروتسەستەن تاجىريبەسى جوق وقۋشىلار مەن اتا-انالار وتەدى.

«ونىڭ ۇستىنە، قاجەتتى ماماندىقتار سانى وتە كەش شىعادى جانە تالاپكەر ءوز مۇمكىندىكتەرىن باعامداپ ۇلگەرمەيدى. بالاعا بەيىندى ءپانىن تاڭداپ، سول بويىنشا دايىندالۋى ءۇشىن ۋاقىت كەرەك. بۇل ماسەلە بويىنشا مينيسترلىك بىرقاتار شەشىمدەر ۇسىنادى. ماسەلەن، ماماندىقتار بويىنشا بولىنەتىن گرانتتار سانىن ءۇش جىل بۇرىن جاريالاۋ كەرەك. مۇنى ۇشجىلدىق بيۋدجەت اياسىندا جاساۋعا بولادى. باقىتجان ءابدىرۇلى، بۇل ماسەلەنى بيىلدان قالدىرماي شەشۋ كەرەك»، - دەدى ساعاديەۆ قر پرەمەر-مينيسترىنە قاراتىپ ايتقان سوزىندە.

سونداي-اق، مينيستر ءبىلىم بەرۋ گرانتتارىن جەڭىلدىكپەن بەرۋ جونىندە دە ءسوز قوزعادى.

«بۇگىندە «التىن بەلگى» بويىنشا الەۋمەتتىك ادىلدىك ماسەلەسى وتكىر كۇيىندە تۇر. بيىلعى گرانتتار «التىن بەلگى» فاكتورىنسىز، ۇبت-دا جيناعان بالل بويىنشا بەرىلدى. ودان كەيىن رەسپۋبليكالىق كوميسسيا «التىن بەلگى» العان تالاپكەرلەر الدىنداعى مىندەتتەمەلەرىن ورىنداۋى ءۇشىن شامامەن 4% گرانت قوستى. ونداعان جوعارعى وقۋ ورىندارى حابارلاستى. وتكەن جىلى دا «التىن بەلگى» يەگەرلەرىن جوو گرانتتارى بويىنشا ورنالاستىرۋعا ءماجبۇر بولىپ ەدىك. ەندى بيىل زاڭنامالىق وزگەرىستەر ەنگىزۋدى جوسپارلاپ وتىرمىز»، - دەپ ءوز ءسوزىن تۇيىندەدى مينيستر.

Abai.kz