وڭتۇستىك قازاقستان وبلىسىنىڭ اكىمدىگى مەن تۇركيالىق «DOGUS» Constraction كومپانياسى اراسىندا «وگەم» وزەنىنىڭ سۋىن بۇرۋ ماقساتىندا ىنتىماقتاستىق مەموراندۋمى ءتۇزىلدى. ەندى اتالعان شەتەلدىك كومپانيا وكىلدەرى وسى ۋاعدالاستىق اياسىندا تۇجىرىمداما ازىرلەمەك. بۇل جۇمىستار 2018 جىلدىڭ قاڭتارىنا دەيىن اياقتالسا، ودان كەيىن جوبانىڭ تەحنيكالىق ەكونوميكالىق نەگىزدەمەسى (تەن) مەن جوبالاۋ-سمەتالىق قۇجاتتاماسىن (جسق) ازىرلەۋ جۇمىستارىنىڭ كەزەڭدەرى باستالادى.

بۇل تۋرالى تۇرىك كومپانياسىنىڭ وكىلدەرى وبلىس اكىمى جانسەيىت تۇيمەباەۆتىڭ الدىندا تانىستىرىلىم جاساپ، «DOGUS» Constraction كومپانياسىنىڭ قازاقستانداعى وكىلى يۋنۋس ەمرە سۋدجۋ مەن وبلىس اكىمىنىڭ ءبىرىنشى ورىنباسارى دارحان ساتىبالدىنىڭ اراسىندا اتالعان قۇجاتقا قول قويىلدى. 

وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسى ماماندارىنىڭ مالىمەتىنشە، جوبا ىسكە اسقاندا وگەم وزەنىندە گيدروتەحنيكالىق يمارات (سوورۋجەنيە) سالىنىپ، ودان ءۇش اۋدانعا - سارىاعاش، ماقتاارال جانە قازىعۇرتقا 3-3,5 م3/سەك كولەمدە سۋ تارتىلادى. ودان سوڭ، تارتىلاتىن سۋاعارلار (ۆودوۆود) بويىنان كىشى سۋ ەلەكتر ستانسالارى بوي كوتەرىپ، 51,7 مۆت ەلەكتر قۋاتى الىنادى دەپ كۇتىلۋدە.

سونىمەن قاتار، اتالعان جوبا ىسكە اسقان جاعدايدا، وبلىستىڭ قازىعۇرت، سارىاعاش جانە ماقتارال اۋداندارىنىڭ 400-گە جۋىق ەلدى مەكەنىندەگى 700 مىڭنان اسا تۇرعىن ساپالى اۋىز سۋمەن قامتاماسىز ەتىلىپ، اۋىز سۋعا بايلانىستى ماسەلە تولىق شەشىمىن تابادى.

ەسكە سالايىق، «وگەم» وزەنى كورشىلەس وزبەكستاننىڭ اۋماعىندا ءىشىنارا ورنالاسىپ، ترانسشەكارالىق وزەندەر قاتارىنا جاتقاندىقتان، وسى جىلدىڭ اقپانىندا قازاقستان مەن وزبەكستان رەسپۋبليكالارى ۇكىمەتىنىڭ بىرلەسكەن جۇمىس توبى باس قوسقان بولاتىن. وندا قوس ەلدىڭ وكىلدەرى ەكىجاقتى ىنتىماقتاستىقتى جەتىلدىرۋ ماسەلەلەرى بويىنشا وتىرىسىندا «وگەم» وزەنىنىڭ سۋىن بۇرۋ كەلىسىلگەن بولاتىن.

Abai.kz