لاتىنشالاۋعا قاتىستى ەلباسى نۇرسۇلتان نازارباەۆ پىكىر ايتتى. ءبىزدىڭ تۇيگەنىمىز - لاتىندانۋ قازاققا عانا قاتىستى ەكەن.

"حابار" ارناسىنا سۇحبات بەرگەن پرەزيدەنت نازارباەۆ لاتىن الىپبيىنە كوشۋ پروتسەسسى تۋرالى دا ايتتى.

"لاتىن ارپىنە كوشكەندە، ءبىز ورىس تىلىنەن قاشىپ كەتەيىن دەگەن جوقپىز. وسىنداي الىپ-قاشپا سوزدەردى كەيبىر ساياساتكەرلەر ايتادى. اسىرەسە ورىس تىلىندە. ءالىپبي تەك قاعا قازاقتىڭ تىلىنە قاتىستى ماسەلە. عىلىم مەنەن تەحنيكانىڭ كوزى بولىپ وتىرعان، كوپ اۋدارىلعان ورىس تىلىنە، بارلىعىن اجىراتپاساق، مەنىڭشە ءبىز بايىمايمىز، كەدەيلەنەمىز. بۇل جاتقان ۇلكەن ماسەلە. ۇلكەن جۇمىس اتقارىلىپ جاتىر. جاقىندا مەن ءبىر-ەكى ءماتىنىن قارايتىن بولامىن. وسىمەن شۇعىلدانىپ جۇرگەن عالىمداردى، ءتىلماشتاردىڭ بارلىعىن جيناپ، سولارمەن وتىرىپ، قاراپ ءبىر جوباعا توقتايتىن بولامىز", - دەدى پرەزيدەنت نازارباەۆ.

بۇل ەلباسىنىڭ ايتقانى. سوزبە-ءسوز. الىپ-قوسقانىمىز جوق. لاتىن الىپبيىنە كوشۋ قازاقستانداعى قازاقتان باسقاعا ەش قاتىسى جوق پروتسەسس ەكەن. ورىس دياسپوراسى ءۇشىن ورىس تىلىندە جارىق كورەتىن باسىلىمدار ءام كيريلليتسا ءالىپبيى ساقتالىپ قالادى ەكەن. بۇنى دا پرەزيدەنت ايتتى.

ءسويتىپ، ايىر ءتىلدى ساياساتتان ءۇش تىلگە كوشكەن قازاقستاندا ەندى قوس ءالىپبيى بولاتىن كورىنەدى.

بىزدەن دەرەك. قازاقستان حالقىنىڭ سانى 18 ميلليونعا جۋىقتاپتى. 18 ميلليون قازاقستاندىقتىڭ 71 پايىزىن قازاق ۇلتىنىڭ وكىلدەرى قۇرايدى ەكەن. ءيا، 71 پايىز قازاق ەلدە بار. بۇعان قوسا، 80 پايىزدان استام اۋديتوريا  قازاق ءتىلدى ەكەنىن ەسەپكە الىڭىز. 80 پايىز دەگەن قازاق ءتىلىن ەركىن مەڭگەرگەن، سول تىلدە سويلەيتىن جۇرت. ءسويتىپ، ستاتيستيكا قازاقستاندا ءابسوليۋتتى دومينانت ءتىل – قازاق ءتىلى، باسىم ۇلت – قازاق بولدى دەگەندى انىق ايتىپ تۇر.

سونىمەن قاتار، پرەزيدەنت تاپسىرماسىنا سايكەس، ەلىمىزدە 2025 جىلعا دەيىن قازاق ءتىلىن ەركىن مەڭگەرگەندەر سانى 95%-عا جەتەدى.

ايتپاقشى، 1991 جىلى ەلىمىزدەگى ورىستاردىڭ جالپى سانى 5,9 ملن بولعان. قازىر 3,7 ملن ورىس قالدى. ورىستاردىڭ سانى 2 ملن-عا ازايدى.

2030 جىلعا ارنالعان ستراتەگيالىق پەرسپەكتيۆادا ەڭ تومەنگى پايىمداۋ بويىنشا قازاق ۇلتىنىڭ سانى 82-85 پايىزدى قۇرايتىن بولادى. باسقا ۇلىستار مەن ەتنيكالىق توپتاردىڭ سانى 15 پايىزدى قامتىماق.

بۇل مەملەكەتتىك ورگانداردىڭ رەسمي ستاتيستيكاسى. ساندار ەلدىڭ قازاقىلانعانىن كورسەتىپ وتىر. ەندىگى سۇراق: پرەزيدەنت ايتقانداي قازاقستانداعى ورىس دياسپوراسى ءۇشىن عانا ساقتالىپ قالاتىن كيريلليتساعا قاجەتتىلىك قانشا؟

نۇرگەلدى ابدىعانيۇلى

Abai.kz