جاقىندا قازاقستان حالقى اسسامبلەياسىنىڭ ۇيىمداستىرۋىمەن اۋليە اتا جەرىندە «ءوز ولكەڭدى تانى!» اتتى وبلىستىق تاريحي-مادەني ەكسپەديتسياسى جۇمىسىن باستادى دەپ، حابارلايدى «Abai.kz» اقپاراتتىق پورتالى.

قازاقستان حالقى اسسامبلەياسى باستاماشى بولعان بۇل شاراعا وڭىردەگى ەتنومادەني بىرلەستىكتەر، تاريحي-ولكەتانۋ مۇراجايلارى، اۋداندىق جاستار ۇيىمدارى، بارلىق دەڭگەيدەگى وڭىرلىك كىتاپحانالار، قحا عىلىمي-ساراپتامالىق توپ مۇشەلەرى مەن بۇقارالىق اقپارات قۇرالدارى وكىلدەرى قاتىستى.

ايتا كەتەيىك، ەكتسپەديتسيانى ۇيىمداستىرۋداعى ماقسات پرەزيدەنت نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» ماقالاسىندا اتالعان قوعامدىق سانانى جاڭعىرتۋ جونىندەگى «قازاقستاننىڭ قاسيەتتى رۋحاني قۇندىلىقتارى» جوباسىن ىسكە اسىرۋ جانە مەملەكەت باسشىسىنىڭ قوعامدىق كەلىسىم مەن جالپىۇلتتىق بىرلىكتىڭ قازاقستاندىق ۇلگىسىن دارىپتەۋ.

شارانىڭ العاشقى بولىگىندە ءسوز سويلەگەن جامبىل وبلىسى اكىمى اپپاراتىنىڭ «قوعامدىق كەلىسىم» كمم باسشىسىنىڭ ورىنباسارى كامال نارباتىروۆ ەكسپەديتسيانى اشىپ، قاتىسۋشىلارعا اق جول تىلەدى.

«بۇل ەكسپەديتسيا بارىسىندا بۇكىل وبلىستى قامتىپ، تاريحي قۇندىلىعى بار دەرەكتەردى جيناۋ ۇلكەن ءبىر ماقساتقا اينالىپ وتىر. ءبىزدىڭ جاستاردىڭ ساناسىنا ەرەكشە وي، بويلارىنا پاتريوتتىق سەزىم ۇيالاتاتىنداي ساياحات بولارىنا سەنەمىن. اق جول!»،- دەدى كامال نارباتىروۆ مىرزا.

ەكسپەديتسيانىڭ كەرۋەنى العاش بولىپ تاراز قالاسىنداعى قاراحان بابا كەسەنەسى مەن جامبىل اۋدانىنا قاراستى ايشا ءبيبى كەسەنەسىنە ات باسىن تىرەدى. ودان  كەيىن جۋالى اۋدانىنداعى باۋىرجان مومىشۇلى مۇراجايىنا اتتاندى. بۇدان كەيىن ساياحاتشىلار تالاس اۋدانىندا ورنالاسقان تامدى قالاشىعى مەن سارىسۋ اۋدانىنداعى ىقىلاس دۇكەنۇلى مۇراجايىن تاماشالادى.

ءدال وسى ۋاقىتتا ەكىنشى باعىتپەن شىققان ساياحاتشىلار بايزاق اۋدانىنداعى اقىرتاس قالاشىعىنا، ت.رىسقۇلوۆ اۋدانىنداعى قۇلان توبە قالاشىعىنا جانە مەركى اۋدانىنداعى سىپاتاي باتىر ماۆزولەيىنە ەكسپەديتسيا جاسادى. ال ءۇشىنشى باعىتتاعى قاتىسۋشىلار شۋ اۋدانىنداعى جايساڭ قورىمى مەن قورداي اۋدانىنداعى وتەگەن باتىر كەسەنەسىنە باردى.

ەكسپەديتسيا قۇرامىن جامبىل وبلىسى اكىمى اپپاراتىنا قاراستى «قوعامدىق كەلىسىم» مەكەمەسىنىڭ جاۋاپتى ماماندارى مەن قازاقستان حالقى اسسامبلەياسى جامبىل وبلىستىق فيليالى جانىنداعى «اق جەلكەن» جاستار ليگاسىنىڭ توراعاسى زاينۋددين ماحۋسەەۆ باستاپ جۇرسە، ايماقتارداعى مادەني ەسكەرتكىشتەر مەن تاريحي ورىنداردى تانىستىرۋ جۇمىستارىن  وڭىرىمىزگە تانىمال ارحەولوگ ساۋران قاليەۆ جۇرگىزدى.

اۋليەاتا وڭىرىندەگى «ءوز ولكەڭدى تانى!» تاريحي-مادەني ەكسپەديتسياسى رەسپۋبليكالىق ماڭىزى بار «بەرىكقارا» شاتقالىندا قورىتىندىلانىپ، «قحا جاستارى - 2017» فورۋمىمەن جالعاستى.

ەرعالي بەرىكۇلى

Abai.kz