الماتىدا ىقىلاس اتىنداعى حالىق اسپاپتارىنىڭ  مۇراجايىندا اقىن، ءانشى، كومپوزيتور اقان سەرى قورامساۇلىنىڭ دومبىراسىمەن العاش رەت كۇمبىرلەپ كۇي شەرتىلدى. قازاقتىڭ حالىق اقىنىنىڭ عاسىرلىق تاريحى بار مۋزىكا اسپابىن مۇراجايعا تانىمال جازۋشى ساكەن ءجۇنىسوۆتىڭ ۇرپاقتارى تاپسىرعان ەدى.

شىعارماشىلىق كەش بارىسىندا ەرلان تولەۋتاي اقان سەرىنىڭ دومبىراسىمەن «سىرىمبەتتى» كۇمبىرلەتتى. اقان سەرىگە  ارنالعان شىعارماشىلىق كەشتە ءداستۇرلى مۋزىكا ونەرىنىڭ وكىلدەرى اقىننىڭ «شامشىقامار»، «ماڭماڭگەر»، «بالقاديشا» جانە باسقا دا اندەرىن ورىندادى. الماتىنىڭ «قالا كۇنى» اياسىندا وتكەن مۋزىكا كەشىنە  مادەنيەت پەن ونەر قايراتكەرلەرى، جۇرتشىلىق ، جاستار قاتىستى.

الماتى اكىمى باۋىرجان بايبەك مەملەكەت باسشىسىنىڭ «رۋحاني جاڭعىرۋ» باعدارلامالىق ماقالاسىندا جەكە مادەنيەتىمىز بەن ۇلتتىق كودتى ساقتاۋعا ۇلكەن ءمان بەرىلگەندىگىن،  ال بۇل ەلىمىزدىڭ  مادەني جەتىستىكتەرىن بۇكىل الەمگە پاش ەتۋگە مۇمكىندىك بەرەتىنىن اتاپ ءوتتى.

«مەملەكەت باسشىسى ن.ءا.نازارباەۆتىڭ ساليقالى ساياساتى  ارقاسىندا قازاق حالقىنىڭ مادەني- رۋحاني مۇراسى  قايتا جاڭعىرۋدا. سونىڭ جارقىن مىسالى رەتىندە بۇگىنگى  كۇنى مۇراجايدا 100-دەن استام مۋزىكا اسپاپتارى مەن باسقا دا كيەلى زاتتار ساقتالعان ءارى ولاردىڭ قاتارى جىل سايىن جاڭا ەكسپوناتتارمەن تولىعۋدا.  بىز بۇگىن ەرەكشە ساياسي وقيعانىڭ كۋاسى بولىپ وتىرمىز، ىقىلاس مۇراجايىنىڭ قورىنا ۇلى  اقىن اقان سەرىنىڭ جەكە دومبىراسى بەرىلىپ وتىر»، - دەدى  باۋىرجان بايبەك.

تەك سوڭعى ەكى جىلدىڭ ىشىندە عانا الماتىدا «الاتاۋ»  ءداستۇرلى ونەر تەاترى، ءداستۇرلى مۋزىكانىڭ  مۋلتيمەديالىق ورتالىعى، الماتىنىڭ مىڭجىلدىق تاريحى مۇراجايى اشىلىپ، 5 رەت ايتىس جانە اقىنداردىڭ «التىن دومبىرا» مەن  قازاق  ۇلتتىق سپورتتىڭ «ۇلى دالا ويىندارى»  فەستيۆالدەرى ءوتتى.

اقان سەرى – قازاق  ءان ونەرىندەگى قايتالانباس تۇلعا. ول 1843 جىلى سولۇتستىك قازاقستان وبلىسى ايىرتاۋ اۋدانىنىڭ قوسكول اۋىلىندا تۋىلعان، قازىرگى كەزدە ەلدى  مەكەنگە اقان سەرى  ەسىمى بەرىلگەن. اقان سەرى زور داۋسىمەن، مۋزىكاعا جانە پوەزياعا دەگەن قىزىعۋشىلىعىمەن ەرەكشەلەنەتىن. ول  ۇلتتىق مادەنيەتتىڭ قالىپتاسۋى مەن دامۋىنا مول ۇلەس قوستى. ۇلى اقىننىڭ ءومىرى تۋرالى ەكى تومدىق رومان جارىق كوردى، ونىڭ اۆتورى جازۋشى ساكەن ءجۇنىسوۆ.

Abai.kz