بيىلعى 29 قازاندا وتەتىن رەسپۋبليكانىڭ 105 سايلاۋ وكرۋگىندەگى جەرگىلىكتى ءماسليحاتتاردىڭ سايلاۋىنا ءوز ۇمىتكەرلەرىن ۇسىنۋعا قاي پارتيا بولسا دا الدىن-الا قامداناتىنى بەلگىلى.

الماتى – بارلىق ساياسي-ەكونوميكالىق ينستيتۋتتار ورنالاسقان ءىرى قالا جانە ەجەلدەن سايلاۋعا قاتىسۋشىلاردىڭ بەلسەندى توپتارى، قوعامدىق جانە ۇكىمەتتىك ەمەس ۇيىمداردىڭ باسىم بولىگى شوعىرلانعان الىپ مەگاپوليس.

ەلىمىزدىڭ قوعامدىق-ساياسي ومىرىندەگى اسا ماڭىزدى سانالاتىن وزەكتى ماسەلەگە دايىندىقتىڭ جوعارى دارەجەدە باستالعانى جانە  تۋرالى «نۇر وتان» پارتياسىنىڭ الماتى قالالىق فيليالىنىڭ كەزەكتەن تىس وتكەن حح-شى كونفەرەنتسياسىدا جان-جاقتى ايتىلدى.

كونفەرەنتسياعا «نۇر وتان» پارتياسى ساياسي كەڭەسىنىڭ بيۋرو مۇشەسى، «نۇر وتان» پارتياسى قالالىق فيليالىنىڭ توراعاسى، الماتى قالاسىنىڭ اكىمى باۋىرجان بايبەك، الماتى قالالىق ماسليحاتىنىڭ دەپۋتاتتارى، «نۇر وتان» پارتياسى الماتى قالالىق فيليالىنىڭ بيۋرو جانە ساياسي كەڭەس مۇشەلەرى، مەملەكەتتىك ورگاندار مەن ۇكىمەتتىك ەمەس ۇيىمداردىڭ جەتەكشىلەرى، «جاس وتان» جاستار قاناتىنىڭ مۇشەلەرى جانە بۇقارالىق اقپارات قۇرالدارىنىڭ وكىلدەرى قاتىستى.

«نۇر وتان» پارتياسىنىڭ قالالىق ماسليحاتتاعى فراكتسياسى الماتىنىڭ ەكونوميكالىق، الەۋمەتتىك جانە ينفراقۇرىلىمدىق جۇيەسىن دامىتۋ بويىنشا جۇيەلى جۇمىستاردى جۇزەگە اسىرۋدا.

كونفەرەنتسيانى «نۇر وتان» پارتياسى ساياسي كەڭەسىنىڭ بيۋرو مۇشەسى، پارتيانىڭ الماتى قالالىق فيليالىنىڭ توراعاسى، الماتى قالاسىنىڭ اكىمى باۋىرجان بايبەك اشىپ، جۇرگىزىپ وتىردى.

«ەلباسى، پارتيا توراعاسى نۇرسۇلتان ءابىشۇلى نازارباەۆ باستاماشىلىق ەتكەن كونستيتۋتسيالىق رەفورما­لار مەن جولداۋلار، رۋحاني جاڭعىرۋعا شاقىرعان باعدارلاماسى ارقىلى ەلىمىز جاڭا تاريحي داۋىرگە اياق باستى. بۇل رەفورمالار – ەڭ ال­دىمەن، تاۋەلسىز قازاقستاننىڭ الدىڭعى قا­تارلى 30 مەملەكەت دەڭگەيىنە كوتەرىلۋىن   قامتاماسىز ەتەتىن بەلەستەردىڭ ىرگەتاسى! ەندەشە، الماتى قالالىق فيليال پارتيانىڭ سايلاۋالدى تۇعىرناماسىندا بەلگىلەنگەن، ەل ەكونوميكاسىن وركەندەتۋ، حالىقتىڭ تۇرمىستىق ءال-اۋقاتىن جاقسارتۋ، الەۋمەتتىك سالالاردى دامىتۋ باعىتىن ايقىنداعان تاپسىرمالاردى ودان ارى جۇزەگە اسىرۋدى جالعاستىرا بەرەتىن بولادى»، - دەپ اتاپ ءوتتى ب.بايبەك.

الماتى قالالىق ماسليحاتىنىڭ ءVى شاقىرىلىم دەپۋتاتتارى – دينار نوكەتاەۆا سەناتورلىققا سايلانىپ، قانات توسەكباەۆ باتىس قازاقستان وبلىسىنىڭ دەنساۋلىق ساقتاۋ باسقارماسىنىڭ باسشىسى بولىپ تاعايىندالدى.

وسىعان وراي، كونفەرەنتسيادا الماتى قالاسىنداعى ماسليحات دەپۋتاتتارىنىڭ بوساعان ورنىنا جوعارى ءبىلىم، بيزنەس جانە عىلىمي-زەرتتەۋ سالالارىندا قىزمەت ىستەيتىن 6 ۇمىتكەردىڭ ىشىنەن 3 كانديدات تاڭدالىپ الىندى. ولار – "الماتى قالاسىن دامىتۋ ورتالىعى" اق ءتورايىمى جاننا تولەگەنوۆا، «يۋنيكوم بيزنەس گرۋپ» جشس ديرەكتورى ۆياچەسلاۆ بانششيكوۆ جانە حالىقارالىق يننوۆاتسيالىق تەحنولوگيا ۋنيۆەرسيتەتىنىڭ رەكتورى دامير شىنىبەكوۆ.

سونىمەن قاتار، كونفەرەنتسيا بارىسىندا «ۇزدىك باستاۋىش پارتيا ۇيىمى» سايىسىنىڭ جەڭىمپازدارىن ماراپاتتاۋ ءراسىمى ءوتتى.

«باستاۋىش پارتيا ۇيىمدارى – «نۇر وتاننىڭ» نەگىزگى تىرەگىنە، شىنايى كۇشىنە اينالدى» دەپ ەلباسى ايتقانداي، حالىق مۇددەسىن قورعاۋ، ەلدىڭ ءال-اۋقاتى مەن تۇرمىسىن جاقسارتۋ، ەكونوميكامىزدى دامىتۋعا ۇلەس قوسۋ – باستاۋىش ۇيىمداردىڭ قىزمەتىندەگى باستى باعىتى. الماتى قالاسىنداعى 90 مىڭ مۇشەسى بار 700-دەن  اسا   باستاۋىش   ۇيىمداردىڭ  جاۋاپكەرشىلىگى ەرەكشە بولعاندىقتان، ادىستەمەلىك-ۇيىمداستىرۋشىلىق جۇمىستارى جەتىلدىرىلدى. بارلىق  ۇيىمداردىڭ ماتەريالدىق-تەحنيكالىق بازالارى نىعايتىلدى. بۇل ءۇردىس الداعى ۋاقىتتا دا جالعاسىن تابادى»، - دەپ ءسوزىن تۇيىندەگەن باۋىرجان بايبەك بايقاۋ جەڭىمپازدارىن قۇتتىقتاپ، شەت ەلگە جولدامالار تاپسىردى.

وتكەن جىلعى ۇيىمداستىرىلعان سايىستىڭ جەڭىمپازدارى – №5 قالالىق اۋرۋحاناسى، «Mega Alma-ata» ساۋدا ءۇيى جانە الماتى اۋەجايىنىڭ باستاۋىش ۇيىم وكىلدەرى قىتايعا جولداما الىپ، كورشى ەلدىڭ بيلىك پارتياسى جۇمىسىنىڭ تاجىريبەسىمەن تانىسۋ مۇمكىندىگىنە يە بولعان ەدى. بيىل دا سول ءۇردىس ساقتالدى. قالا بويىنشا ءبىرىنشى كەزەڭدە 130-دان استام باستاۋىش پارتيا ۇيىمدارى بايقاۋعا قاتىسىپ، سونىڭ ىشىنەن 27 باستاۋىش پارتيا ۇيىمى قالالىق كەزەڭگە شىقتى. سايىس قورىتىندىسىندا 3 سانات بويىنشا –  9 جەڭىمپاز انىقتالدى.

ولاردىڭ اراسىندا «الماتى-2 تەمىرجولى»، كارديولوگيا جانە ىشكى اۋرۋلار عىلىمي-زەرتتەۋ ينستيتۋتى، «الماتى سۋ حولدينگى»، «ازمك»، «بۋحگالتەر جانە اۋديتورلار قاۋىمداستىعى» جانە باسقالارىنىڭ باستاۋىش پارتيا ۇيىمدارى بار.

پارتيا ۇيىمدارى ءبىر جىل بويى كوپتەگەن قوعامدىق-ساياسي ءىس-شارالار وتكىزىپ، جاعدايى تومەن وتباسىلارعا، ارداگەرلەر مەن مۇگەدەكتەرگە، جەتىم بالالارعا قايىرىمدىلىق شارالارىن كورسەتتى جانە بەلسەندى ەڭبەك ەتۋ ناتيجەسىندە «نۇر وتان» پارتياسىنىڭ ەل الدىنداعى بەدەلىن كوتەرۋگە ىقپال ەتكەنى ءسوزسسىز.

حالقىمىزدا «ورەلى ءىستىڭ قاسىندا وركەندى ەل جينالادى» دەيتىن ناقىل ءسوز بار. قالالىق فيليال قالىڭ كوپشىلىكتى سوڭىنان ەرتە بىلگەن، ارقاشان يگىلىكتى ىستەردىڭ كوشباسىندا تۇرعان باستاۋىش ۇيىمدارمەن ءوزارا بىرلىگىن، بايلانىسىن ودان ءارى ورىستەتە بەرەتىن بولادى.

Abai.kz