ءۇش قاعيدا
مەكتەپ ديرەكتورىنىڭ ات شاپتىرىم بولمەسى. جالعاپ العان جاساندى كىرپىكتەرى جەر سۇزگەن ديرەكتور اپاي جەتپىستى القىمداپ قالسا دا، وسى ورنىنان تاپجىلماعانىنا وتىز جىلدان استى. ادامنىڭ جانارى جانىنىڭ ايناسى دەسەك، جاساندى كىرپىكتەر سول اينانى كولەگەيلەپ، ارعى جاقتا نە بولىپ جاتقانىن جاسىرىپ تۇرعانداي اسەر ەتەدى ەكەن.. ول از بولعانداي قالامىن قولىنا العاندا سوياۋداي جاساندى تىرناقتارى جالت-جۇلت ەتەدى... جاساندىلىق پەن جالت-جۇلت ءدۇنيەگە تابىندىرىپ قويعان زامان-اي...
كەنەت ەسىك جۇلقا اشىلدى.
- اپاي، بۇل نە قىلعانىڭىز؟ زەينەتكە شىعۋىما التى اي قالعاندا، مەنىڭ ساعاتتارىمدى باسقا مۇعالىمگە بەرگەنىڭىز نە؟ - دەپ كىرگەن مۇعالىم سۇراقتى توتەسىنەن قويدى. ديرەكتور اپاي اشىنىپ تۇرعان مۇعالىمگە قولىن ءبىر اق سىلتەدى. قالاي اشىلعان ەسىك سولاي جابىلدى.
ءوزىنىڭ زاڭدى ساعاتتارىن سۇراپ كىرگەن مۇعالىمدى بىلەتىن ەدىم. وسى مەكتەپتىڭ وتىمەن كىرىپ كۇلىمەن شىققانىنا وتىز جىلعا تاياپ قالدى. بىلىكتى مامان رەتىندە ارىپتەستەرىنىڭ الدىندا، اتا-انالار مەن شاكىرتتەر اراسىندا بەدەلدى... مارقۇم جولداسى دا وسى مەكتەپتىڭ سىيلى ۇستازى بولاتىن، سودان قالعان قوس تۇياعىن ەلدەن كەم قىلماي وسىرگەنى دە كوز الدىمىزدا. سونشاما شاكىرت تاربيەلەپ، بار ءومىرىن، بار ۋاقىتىن ارناعان وسى مەكتەپتەن وزىنە لايىق قۇرمەتپەن التى ايدان سوڭ زەينەتكە شىقسام دەپ جۇرگەن بولاتىن. قازىرگى زاڭدى بىلەسىز، سوڭعى جىلعى العان جالاقىڭ ەرتەڭگى زەينەتاقىڭنىڭ باعدارشامى. بۇل مۇعالىم سول ءۇشىن كۇيىنىپ تۇر، وتىز جىلعى ۇستازدىق ءومىرىن التى ايلىق ەڭبەكاقى شەشەر تۇستا، ديرەكتور اپايدان مۇنداي شەشىم راسىمەن كۇتپەگەن بولاتىن.
سول مۇعالىم ۋاقىت سوزباي، دەرەۋ شەشىم قابىلداپ 30 جىلداي جۇمىس ىستەگەن مەكتەبىن ديرەكتور اپايعا تاستاپ ءوزى باسقا مەكتەپكە اۋىسىپ كەتتى...
وسى وقيعادان سوڭ وزىمە ءۇش قاعيدا ءتۇيدىم.
1. ءوزىڭدى باعالامايتىن جەردە ءبىر كۇن دە ايالداما;
2. ءوزىڭ ءبىلىمدى بولساڭ،كەز كەلگەن جەردەن ورىن تاباسىڭ;
3. شەشىم قابىلداۋدان قورىقپاۋ كەرەك.
مەرەكە قۇتتى بولسىن، قۇرمەتتى ۇستازدار!
جاڭىل اسىلبەكوۆا
Facebook-تەگى پاراقشاسىنان
