بەيسەنبى, 17 قازان 2019
ءبىزدىڭ شەنەۋنىك 2244 0 پىكىر 3 قازان, 2017 ساعات 15:28

مامان تاعايىنداۋدىڭ قوستانايلىق قويىرتپاقتارى

 

باسقا جەردى بىلمەيمىن، ءبىزدىڭ قوستانايدا كەيىنگى كەزدەرى باسقارما باسشىلارىنىڭ لاۋازىمدىق عۇمىرى ۇزاققا بارمايتىن بولىپ ءجۇر. سوڭعى «مودا» مىناداي: ءبىر ورىندا ءبىراز وتىرىپ قالعان باسشىنىڭ قاي-قايسىسى دا سوزگە كەلمەستەن ورنىن وزگەرتەدى. ارينە، جايلى قىزمەتىنەن ايىرىلمايدى. تەك قانا  اقىرىنداپ ەكىنشىسىنە جىلجي قويادى. مۇمكىن، بۇل ءبىر جاعىنان دۇرىس تا شىعار. الايدا بۇرىنعى باسشىنىڭ قانشالىقتى جاقسى قىزمەت اتقارعاندىعى، ال ونىڭ ورنىن باسقان شەنەۋنىكتىڭ بۇل سالادان قانشالىقتى حابارى بار جانە ونى الىپ جۇرە الا ما دەگەن ساۋالدار ەشكىمدى دە مازالامايدى. ال بۇل ەڭ نەگىزگى پروبلەمانىڭ ءبىرى دەر ەدىك. جاڭا باسشى وزىنە تاپسىرىلعان ءىستى الىپ جۇرە الماي، سول سالانى مۇلدەم توقىراتۋعا ۇشارتسا شە؟ وندا تاعى ءبىر دۇمبىلەزدى اكەلىپ قونجيتا قويا ما؟ بۇلاي دەۋىمىزگە بىرنەشە جاعداي سەبەپ بولىپ وتىر. ماسەلەن، وبلىستىق اكىمدىكتىڭ قارجى سالاسىن كوپ جىلدار باسقارىپ، تاماشا تاجىريبە جيناعان باسشىنى اياق اياستىنان مۇراعات باسقارماسىنىڭ باسشىسى ەتىپ تاعايىنداي سالدى. سوندا قارجى سالاسى مەن مۇراعات سالاسىنىڭ پالەندەي ايىرماشىلىعى بولماعانى ما؟ مۇنى ءبىر دەڭىز. ەندى كەلىپ تىلدەردى دامىتۋ باسقارماسىنىڭ باسشىسىنا دىندەر جونىندەگى باسقارمانىڭ تىزگىنىن ۇستاتتى. ال ءدىن سالاسىنداعى ماسەلەلەرگە ءبىراز قانىعىپ قالعان تاجىريبەلى باسشىنى تىلدەردى دامىتۋعا قولايلى مامان دەپ تاۋىپتى. ەكى سالانىڭ دا اسا ماڭىزدى ەكەندىگىن تۇسىنەمىز، ارينە. الايدا ەكەۋىنىڭ اراسىنداعى ايىرماشىلىقتىڭ جەر مەن كوكتەي ەكەندىگىن دە جىلى جاۋىپ قويۋعا بولماس. قازىرگى زامانعى ءۇردىس - بىزدە كادرلار اۋىستىرۋدىڭ وسىنداي تاپتىرماس ءتاسىلى جاقسى جاڭالىققا اينالعان ءتارىزدى.

مۇنى ايتاسىز، بىزدە كەيدە ادام تاڭقالارلىق جاعداياتتار دا كەزدەسىپ قالادى. ماسەلەن، بۇگىن تاعايىندالعان باسشى بىرەر ايدان سوڭ سوپاڭ ەتىپ باسقا ءبىر قىزمەتتىڭ جايلى ورىندىعىنان تابىلا كەتەدى. ءبىز جوعارىدا ءسوز قىلعان مۇراعاتقا كەتكەن باسشىمىز ارادا اي وتپەي-اق مەديتسينالىق ساقتاندىرۋ قورىنىڭ وسىنداعى بولىمشەسىنىڭ بىلدەي باسشىسى بولىپ شىعا كەلدى. ال وبلىستىق سپورت باسقارماسىنا تاعايىندالعان باسشى ارادا ءۇش اي وتەر-وتپەستەن ورنىنان بوساپ قالدى. ول ورىن ازىرگە بوس تۇر. بيۋدجەتىنىڭ ءوزى ميللياردتاعان تەڭگە قارجى قۇرايتىن وسىناۋ اسا جايلى قىزمەتكە ادام تابىلماس دەگەن ويدان مۇلدەم اۋلاقپىز. بىراق ول قانداي كادر بولادى؟ ءبىزدى مازالايتىن وسى ساۋال عانا.

قىزمەتتىك كولىگىنە جالعان ءنومىر تاققان  قوستاناي وبلىسىنىڭ اكىمى ارحيمەد مۇحامبەتوۆ دەگەن وسى جىگىت. 

كادر تاعايىنداۋ ماسەلەسىندەگى قوستانايلىق قويىرتپاقتى وبلىس اكىمىنىڭ ءوزى تۇسىنبەسە، ءبىزدىڭ ءتۇسىنۋىمىز تىم قيىنداپ بارادى. ال سوڭىندا تاعى ءبىر تۇزدىعى بار جاڭالىقتى ايتپاي كەتپەسەك، اڭگىمەمىز تولىق بولماس. وبلىسىمىزدىڭ الىستاعى اۋداندارىنىڭ ءبىرى — جانگەلدين اۋدانىندا اكىمدىك قىزمەت اتقارعان  اسقاربەك كەنجەعارين اياق استىنان ابىرويسىزدىققا ۇشىراپ، بىرەۋدىڭ پاتەرىن زاڭسىز جەكەشەلەندىرىپ الىپ، كەيىن ونى ءبىر تۋىسىنا ساتىپ جىبەردى  دەگەن ايىپپەن قىلمىستىق ىسكە تارتىلعان ەدى. سودان كوپ ۇزاماي، ناقتىراق ايتقاندا وسى جىلدىڭ 8 اقپانى كۇنى ءوزى ارىز بەرىپ، قىزمەتىنەن بوساعان ەدى. سويتكەن اسەكەڭ جاقىندا وبلدىسىمىزداعى ەجەلگى وقۋ ورىندارىنىڭ ءبىرى – سارىكول اگروونەركاسىپ جانە زاڭ كوللەدجى ديرەكتورىنىڭ جايلى دا مايلى ورىنتاعىنا جايعاستى. مىنەكەي، بىزدەگى وزگە وبلىستارعا جاقسى تاجىريبە رەتىندە تاراتۋعا ابدەن جارايتىن تاپتىرماس كادر ساياساتىنىڭ جاعدايى وسىنداي.

جايبەرگەن بولاتوۆ

قوستاناي

Abai.kz

0 پىكىر