بەيسەنبى, 17 قازان 2019
قاينايدى قانىڭ... 2657 6 پىكىر 3 قازان, 2017 ساعات 18:55

ەنەرگەتيكا مينيسترلىگى ەلباسىن ەكى سويلەتكەنى مە؟

 

قر پرەزيدەنتى نازارباەۆ 2010 جىلى قاڭتار ايىندا: «ءبىز 2014 جىلعا قاراي ءۇش بىردەي مۇناي وڭدەۋ زاۋىتىن جاڭالاپ، ىسكە قوساتىن بولامىز. سول كەزدە مۇناي ونىمدەرىنە دەگەن ىشكى سۇرانىس تولىعىمەن قامتاماسىز ەتىلەدى»، - دەگەن ەدى (ەركىن اۋدارما. ورىسشاسى: «ك 2014 گودۋ مى رەكونسترۋيرۋەم ۆسە تري نپز ي سموجەم پولنوستيۋ وبەسپەچيۆات ناشۋ ۆنۋترەننيۋيۋ پوترەبنوست پو ۆسەمۋ سپەكترۋ نەفتەپرودۋكتوۆ»).

كورىپ وتىرسىزدار، سودان بەرى ارادا جەلكەنىن كەرىپ جەتى جىل ءوتتى. پاۆلودارداعى زاۋىت تۇرالاپ جاتىر. اتىراۋ مەن شىمكەنتتەگى زاۋىتتاردىڭ جاڭالانىپ ءام جالاڭ قاعىپ تۇرعانى شامالى. قازان ايىنىڭ 1-نە قاراعان ءتۇنى جانار-جاعارمايدىڭ قۇنى كەزەكتى رەت تاعى دا قاعىنىپ شىعا كەلدى. ونى ايتاسىز، اۆتوكولىك يەلەرى جانارماي قۇياتىن ستانسالاردان «بەنزين جوق» دەپ كەلەتىن بەدىرەيگەن ءسوز ەستىپ كەرى قايتۋدا. راس، بەنزين جوق. مۇلدەم جوق ەمەس، تاپشى. مۇنايلى قازاقستان جانارماي تاپشىلىعىن تارتىپ وتىر. ماسقارا! ەل ىشىندە قاربالاس قارەكەت (اجيوتاج) تۋدىرىپ جاتقان جايتكە بايلانىستى كەشە ەنەرگەتيكا مينيسترلىگى ەرىنىپ وتىرىپ بىردەڭە-سىردەڭە دەگەن بولدى، ونىسى، بىراق، ساۋدىڭ اسىن ءىشىپ، جىندىنىڭ ساندىراعىن ايتقاننىڭ كەرىنە ۇقساپ كەتتى. قۇرمەتتى وقىرمان، ءبىز ەپتەپ ەتيكادان وزىپ وتىرمىز، كەشىرەرسىز، ايتسە دە، ۆيتسە-ءمينيستردىڭ ۋاجىنە بايلانىستى وزگەشە ءبىر سىپايىلىق تانىتۋ قولىمىزدان كەلمەدى.

ماعاۋوۆ. اسەت ماعاۋوۆ (سۋرەتتە) ەنەرگەتيكا ۆيتسە-ءمينيسترى. الگى ماعاۋوۆ ماندىراپ وتىرىپ: «ءبىز بۇنداي جاعدايعا ساراپتاما جاساپ كورمەپپىز» دەيدى. قۇداي تاس توبەسىنەن ۇرسىن! سوندا، جىلدا بولاتىن جانارماي تاپشىلىعى مەن باعانىڭ كۇرت ءوسىپ كەتەتىنىن بىلمەيتىن، بىلسە دە سونىڭ سەبەپ سالدارىن زەرتتەپ، ارەكەت ەتپەيتىن بۇل قانداي مينيسترلىك؟ بۇل مينيسترلىكتى ءمينيسترى قانات بوزۋمباەۆ دەيتىن بوزىمنان باستاپ ءبارىن قىزمەتتەن ايداپ شىقسا ءجون بولار ەدى! ءبىر وكىنىشتىسى: ءبىزدىڭ حالىق بۇنداي تالاپ قويا المايدى. «بەنزين قىمباتتادى ما؟». «قىمباتتادى». «ەندى قايتەمىز، «جازعان قۇلدا شارشاۋ جوق» دەپ، كوتەنزورلىققا كونىپ جۇرە بەرەدى. «ۇيالعان تەك تۇرماستىڭ» كەرىن كەلتىرىپ الگى ماعاۋوۆ «2018 جىلى جانارمايعا دەگەن بارلىق سالانىڭ سۇرانىسىن قامتاماسىز ەتەمىز» دەپ ۋادە قىلدى. اتاسىنىڭ باسى! جەت جىلدا جەر باۋىرلاپ جاتقان سالبوكسەلەر ءبىر جىلدا بىردەڭە بىتىرەدى دەگەنگە سەنە المايدى ەكەنبىز.

قيت ەتسە، ءبارىن پرەزيدەنتتەن كورەمىز. پرەزيدەنت ءسوز جوق، يگىلىكتى ىستەردى اتقارۋعا پارمەن بەرەدى. ال سونداي ىستەرگە جاۋاپتى لاۋازىم يەلەرى بولسا، «كۇندە ەرتەڭمەن» قۇدايدىڭ كۇنىن ولتىرۋمەن ءجۇر. اينالىپ كەلگەندە ەل الدىندا ەلباسى ەكى سويلەگەن بولىپ شىعادى. وسى دۇرىس پا؟ بۇل رەتتە ساياساتتانۋشى راسۋل جۇمالىنىڭ سوزىنە جۇگىنگەنىمىز ءجون شىعار. ول بىلاي دەيدى:

  • قاراعاندىدا كومىر، ماڭعىستاۋدا گاز، الماتىدا جىلۋ، استانادا بەنزين، اتىراۋدا بالىق تاپشى بولسا، بۇل بىرەۋدە مىي تاپشى دەگەن ءسوز (FB-داعى جازباسىنان).

داۋرەن قۋات

Abai.kz  

6 پىكىر