سەنبى, 21 قىركۇيەك 2019
بىرلىگىمىز جاراسقان 1300 0 پىكىر 28 قىركۇيەك, 2017 ساعات 13:23

"زاماناۋي كوپەتنوستى قازاقستان" فورۋمى ءوتتى

 قازاقستان رەسپۋبليكاسى ۇلتتىق مۋزەيىندە «زاماناۋي كوپەتنوستى مەملەكەت: ۇلتتىق مودەلدەر مەن دامۋ ستراتەگيالارى» عالىمدار مەن ساراپشىلاردىڭ حالىقارالىق فورۋمى بولىپ ءوتتى. بۇل تۋرالى "اباي اقپارات" پورتالى حابارلايدى.

ءىس-شاراعا قحا توراعاسىنىڭ ورىنباسارى – حاتشىلىق مەڭگەرۋشىسى دارحان مىڭباي، قر پارلامەنتى ءماجىلىسىنىڭ دەپۋتاتتارى، قازاقستان حالقى اسسامبلەياسىنىڭ مۇشەلەرى، ەتنومادەني بىرلەستىكتەر مەن مەملەكەتتىك ورگانداردىڭ وكىلدەرى قاتىستى.

فورۋمعا قحر، رەسەي، وزبەكستان، قىرعىزستان، بەلارۋس ەلدەرىنەن كەلگەن ساراپشىلار، سونداي-اق، حالىقارالىق قاتىناستار سالاسىنداعى وتاندىق تانىمال ساراپشىلار قاتىسىپ، ءسوز سويلەدى.

دارحان مىڭباي العى سوزىندە، بيىلعى جىلدىڭ ەلىمىز ءۇشىن ەرەكشە جىل ەكەنىن ايتا كەلە،  «بىرلىگى بەكەم ەل وزادى» دەگەن حالىق دانالىعىن ۇستانعان تاۋەلسىز مەملەكەتىمىز ەكونوميكالىق جاڭعىرۋدى قولعا الىپ، ساياسي جاڭعىرۋدى باستاپ، رۋحاني جاڭعىرۋعا قادام باستى. كۇنى كەشە عانا جەر جاھاندى دۇبىرلەتىپ «EXPO-2017» حالىقارالىق كورمەسىن ابىرويمەن وتكىزدىك. بۇگىنگى وتكىزىلىپ وتىرعان فورۋم دا سول ماڭىزدى شارالاردىڭ زاڭدى جالعاسى دەپ بىلەمىن» دەدى.

سونداي-اق، ەلباسىمىزدىڭ قازاقستان حالقى  اسسامبلەياسى ەتنومادەني بىرلەستىكتەرىنىڭ «بەيبىتشىلىك پەن كەلىسىمنىڭ 25 جىلى» فەستيۆالىندەگى: «تاۋەلسىزدىكتىڭ ەڭ باستى تىرەگى –  بەيبىتشىلىك پەن كەلىسىم، تىنىشتىق پەن تۇراقتىلىق. وسىنىڭ ارقاسىندا ءبىز 25 جىلدا مەملەكەت قۇردىق، دەڭگەيىن كوتەردىك، xالىقتىڭ ءال-اۋقاتىن جوعارىلاتتىق. ال اسسامبلەيا – وسى قاسيەتتى تىرەگىمىزدىڭ  مىزعىماس تۇعىرى» دەپ اتاپ وتكەن بولاتىن. راسىندا دا، ءبىز ەگەمەن ەل رەتىندە ءومىر ءسۇرىپ وتىرعان جىلداردا تورتكۇل دۇنيەگە بىرلىگى جاراسقان كوپەتنوستى ەلدى داۋدىڭ دا، جاۋدىڭ دا المايتىندىعىن پاش ەتىپ كەلەمىز» دەگەن ءسوزىن تىلگە تيەك ەتتى.

فيلوسوفيا عىلىمدارىنىڭ دوكتورى، بەلارۋس رەسپۋبليكاسىنان كەلگەن پروفەسسور م.ا.موجەيكو اتالعان تاقىرىپ توڭىرەگىندە وزەكتى وي قوزعاپ، مادەنيەتتىڭ جاھاندانۋ زامانىنداعى دامۋ پروتسەستەرى جونىندە پىكىرىن ءبىلدىردى.

فورۋمنىڭ كۇن تارتىبىندە – زاماناۋي جاعدايدا ازاماتتىق بىرەگەيلىكتى قالىپتاستىرۋ تاجىريبەسىن مادەني-فيلوسوفيالىق ءتۇسىنۋ، ن.نازارباەۆتىڭ قوعامدىق كەلىسىم مەن جالپىۇلتتىق بىرلىكتىڭ قازاقستاندىق مودەلىنىڭ ورنىن جانە ونىڭ قازىرگى زامانعى ۇلعايىپ كەلە جاتقان سىن-قاتەرلەر جاعدايىنداعى ءرولى، قازاقستان حالقى اسسامبلەياسى ينستيتۋتىنىڭ قوعامدىق سانانى جاڭعىرتۋداعى ءرولىن اشىق كورسەتۋ سەكىلدى بىرقاتار وزەكتى ماسەلەلەر تالقىلاندى.

فورۋم جۇمىسىنىڭ قورىتىندىسى بويىنشا قازاقستاندا دا، الەمدە دە مادەني ارتۇرلىلىك پەن مادەنيەتارالىق  ديالوگتى ساقتاۋ جانە كەڭەيتۋ بويىنشا پراكتيكالىق ۇسىنىستار تۇجىرىمدالدى.

ءىس-شارا قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىنىڭ ورتالىق ازيا وڭىرىندە ەتنوسارالىق جانە كونفەسسياارالىق قاتىناستاردى زەرتتەۋ ورتالىعىنىڭ قاتىسۋىمەن قازاقستان حالقى اسسامبلەياسىنىڭ عىلىمي-ساراپتامالىق كەڭەسىنىڭ ۇيىمداستىرۋىمەن ءوتتى.

ەرعالي بەرىكۇلى

Abai.kz

0 پىكىر