تۇماعاڭ تۇعىرىنا قوندى. وسىدان ءبىر جارىم جىل بۇرىن Abai.kz اقپاراتتىق پورتالى قازاقتىڭ كلاسسيك اقىنى تۇمانباي مولداعاليەۆتىڭ اتى اتاۋسىز قالىپ بارا جاتقانىنا كۇيىنىپ، "تۇماعاڭ تۇعىرىنا قاشان قونادى؟" دەگەن ماقالا جازىپ، ماسەلە كوتەرگەن ەدى. سول ماقالادا ايتىلعان جايلار ورىندالا باستادى.

قازاقتىڭ ءبىرتۋار اقىنى تۇمانبايدىڭ ەسكەرتكىشى ەندى ەسىك قالاسىندا قاسقايىپ تۇراتىن بولدى. بۇگىن اقىن ەسكەرتكىشى رەسمي تۇردە اشىلدى.

ەسكەرتكىشتى اشۋ سالتاناتىندا ءسوز سويلەگەن الماتى وبلىسى اكىمىنىڭ ورىنباسارى جاقسىلىق ومار وبلىس اكىمى اماندىق باتالوۆ ەلباسىنىڭ "بولاشاققا باعدار: رۋحاني جاڭعىرۋ" ماقالاسىنىڭ اياسىندا بۇل ىسكە باستاماشى بولعانىن ايتتى. اكىم اقىننىڭ ەڭسەلى ەسكەرتكىشىن جاساتۋ ءۇشىن وبلىس بيۋدجەتىنەن 25 ميلليون تەڭگە قارجى بولگىزىپتى.

قازاقتىڭ تۇمانبايىنىڭ تاس ءمۇسىنىن التاي يساتايۇلى بەيسەنوۆ سومداعان.

سونىمەن قاتار، بۇگىن ەسىك قالاسىنداعى مادەنيەت ۇيىنە تۇمانباي مولداعاليەۆتىڭ اتى بەرىلدى. تۇماعاڭنىڭ اتىن العان مادەنيەت ءۇيىنىڭ اينالاسىن اباتتاندىرۋعا 80 ميلليون تەڭگە بولىنگەنىن دە سۇيىنشىلەگىمىز كەلەدى.

زامانىندا: ء"بىر ەسكەرتكىش تۇرعىزدىم مەن وزىمە" دەپ جىرلاعان تۇماعاڭنىڭ جىرى ماڭگىلىك الاش جۇرتىمەن جاسايتىنى حاق. الماتى وبلىسىنىڭ اكىمى اماندىق باتالوۆتىڭ يگى ءىسىن الماتى قالاسىنىڭ اكىمى باۋىرجان بايبەك ءىلىپ اكەتىپ، الماتى قالاسىنداعى ماسانشى كوشەسىنە اقىننىڭ ەسىمىن بەرسە دەگەن تىلەگىمىزدى وسى ارادا بىلدىرە كەتكىمىز كەلەدى.

تۇماعاڭ بىردە ساتباەۆ كوشەسىندە كەلە جاتىپ، ءىنىسى اۋىت مۇقيبەككە: «اۋىت، وسى مەن ولسەم، الماتىدان مەنىڭ اتىما كوشە بەرىلە مە؟» – دەپ سۇراپتى.

– ارينە بولادى، ءبارى بولادى، اعا! – دەيدى عوي اۋىت ءىنىسى اڭقىلداپ.

– ءاي، كىم بىلەدى! مىسالى، ساعي جيەنباەۆ بىزدەن ءبىر كەم ەمەس اقىن، الماتىدا اتىندا دىم دا جوق قوي. ەگەر، مەنى ۇمىتىپ بارا جاتسا، ءوزىڭ «ءايت!» دەپ قويارسىڭ! – دەپتى.

سول اۋىت مۇقيبەككە ايتىلعان اماناتتى Abai.kz وقىرماننىڭ ەسىنە قايىرا سالۋدى ءجون سانادى.

قوش! سونىمەن، تۇماعاڭ تۇعىرىنا قوندى!

قۇتتى بولسىن، اعايىن!

قانات بىرلىكۇلى

Abai.kz