قازاقستان مۇسىلماندارى ءدىني باسقارماسى «حالال دامۋ» جشس-ءى قۇرىلعاننان بەرى حالال جارمەڭكە ارزان باعامەن ەكىنشى رەت ءوتىپ وتىر. شاراعا باس ءمۇفتي ەرجان قاجى مالعاجىۇلى ارنايى قاتىستى.

«بۇگىنگى جارمەڭكە الداعى ۋاقىتتا قازاقستاننىڭ بارلىق ايماقتارىندا دا وتكىزىلەتىن بولادى. مۇنداي شارانى اپتاسىنا ءبىر رەت وتكىزۋدى جوسپارلاپ وتىرمىز. حالال ءونىمىن حالىققا جەتكىزۋ، دامىتۋ ءدىني باسقارمانىڭ ءبىر مىندەتى. حالال ءار جانۇيادا بولۋ كەرەك. مۇسىلماننىڭ دۇعا تىلەگى قابىل بولۋ ءۇشىن، ونىڭ نامازدارى تولىق بولۋ ءۇشىن ەڭ ءبىرىنشى حالال اس تۇتىنۋ كەرەك. مىنە، وسى ماقساتتا «حالال» ءبولىمىن اشىپ، بۇگىنگى تاڭدا جۇمىستار جۇرگىزىپ جاتىرمىز. وبلىستارداعى وكىلدەر وسى حالال بويىنشا جۇمىس جاساپ جاتىر. ءبىزدىڭ سەرتيفيكاتىمىزدى العان كاسىپورىندارىمىزدى كۇندەلىكتى قاداعالاپ وتىرعان ماماندارىمىز بار. بارلىق ءوندىرىس وشاقتارىنا العىس ايتامىن. بۇگىنگى جارمەڭكەمىز ءساتتى ءوتسىن» دەدى باس ءمۇفتي ەرجان قاجى مالعاجىۇلى.

جارمەڭكەگە 31 كاسىپورىن ءوز ونىمدەرىن قويعان.  كەلۋشىلەرگە ەت پەن ءسۇت ونىمدەرى، كونديتەرلىك جانە ازىق-تۇلىك تاۋارلارى ۇسىنىلدى.

حالىقتىڭ حالال ونىمگە سۇرانىسى جوعارى. ونى جارمەڭكەگە كەلگەن حالىقتىڭ قاراسىنان بايقاۋعا بولادى.

كەلۋشىلەر ەشقانداي قوسپاسىز ادال ءونىمدى مولىنان الىپ قالۋعا تىراستى. سەبەبى، جارمەڭكەگە قويىلعان تاۋارلاردىڭ بارلىعى – تابيعي تازا، قۇنارلى، ساپالى ونىمدەر.

«شۇجىق ونىمدەرىن الدىم. ونىمدەردىڭ باعاسى قول جەتىمدى. ءارى حالال دەگەن بەلگىسى بار. حالىققا دا كەرەگى وسى. وسى جارمەڭكە ءجيى ۇيىمداستىرىلىپ تۇرسا دەيمىن» دەدى ارسەن بايبوسىن.

جارمەڭكەدە ساتىلعان ونىمدەردىڭ باعاسىدا، ساپاسىدا حالىقتىڭ كوڭىلىنەن شىقتى. حالىق بازاردان 1000 تەڭگەگە الاتىن شۇجىقتى 750, 800 تەڭگەگە، ال، سيىر ەتىن – 1200, 1300 تەڭگەدەن ساتىپ الدى.

ەلىمىزدىڭ ءار وڭىرىنەن كەلگەن حالال كاسىپورىندار ساۋدا سورەسىنە ەت پەن ءسۇت ونىمدەرىن، كونديتەرلىك تاۋارلار مەن سۋسىنداردىڭ سان ءتۇرىن قويدى. جارمەڭكەگە كوسمەتيكالىق ءونىم وندىرەتىن كومپانيالار دا قاتىسۋدا. سولاردىڭ ءبىرى – قازاقستاندا العاشقى قاتتى سابىن ءوندىرۋشى كاسىپورىن «ادال پلەنت» جشس. وندىرىسوشاعى ونىمدەرىن «Sulu» دەگەن اتپەن شىعارادى. كومپانيانىڭ ىرگەسى 2013 جىلى قالانعان. ولار «حالال» سەرتيفيكاتىن العاندارىنا 2 جىل بولعان.

«2016 جىلى «حالال» سەرتيفيكاتىن الدىق. بارلىق زەرتحانالاردىڭ تەكسەرۋىنەن وتتىك. ونىمدەرىمىزدىڭ بارلىعى تابيعي، تازا ءونىم. ناتيجەلەرى وتە كەرەمەت. ەلىمىزدەگى سۋپەرماركەتتەردە، بازارلاردا ساۋدامىز جاقسى ءجۇرىپ جاتىر. ءدىني باسقارمانىڭ باستاماسىمەن ۇلكەن ىستەر اتقارىلىپ جاتىر. كاسىپ ورىنىمىزدىڭ ماقساتى ەلىمىزگە تازا، تابيعي، حالال ءونىم ۇسىنۋ» دەدى كومپانيانىڭ كوممەرتسيالىق ديرەكتورى ەرگەن سەيسەباەۆ.

شارا سوڭىندا باس ءمۇفتي «حالال» ءبولىمىنىڭ وڭىرلەردەگى وكىلدەرى مەن حالال كاسىپورىنداردىڭ باسشىلارىمەن كەزدەسىپ، العىس حاتپەن ماراپاتتادى.

قازىرگى ۋاقىتتا «حالال دامۋ» جشس-نىڭ سەرتيفيكاتىن العان 150-دەن استام كاسىپورىن بار. جارمەڭكەنى الداعى ۋاقىتتا ءار وڭىردە اپتا سايىن ۇيىمداستىرۋ تۇرۋ جوسپارلانىپ وتىر.

Abai.kz