مۇحتار شەرىم. "ا"?
شىرەنگەن شەنەۋنىكتى تىلشىلەر انوكوندا جىلانى سياقتى الدى-ارتىن وراپ الدى. سايدان دا، تاۋدان دا دومالاعان تاستارداي سۇراقتار جاۋىپ كەتتى دەيسىڭ!
– قازاقتاردىڭ لاتىن الىپبيىنە كوشۋىن قالاي قارسى الدىڭىز؟ – دەدى ءبىر تەلەارنا ءتىلشىسى.
– ا؟
– لاتىن الىپبيىنە...
– ا؟
– قازاق–قىرعىز شەكاراسى تۋرالى ويىڭىز؟ – دەپ سۇرادى ءبىر گازەتتىڭ ءتىلشى قىزى.
– ا؟
– ويىڭىز؟
– ا؟
– سەناتوردىڭ ەلىمىزدە اجىراسقان ەرلى-زايىپتىلارعا ۇلكەن ايىپپۇل سالىنسىن دەگەن ۇسىنىسىن قالاي قابىلدايسىز؟ – دەپ سۇرادى سارى باسىلىمنىڭ ساپ-سارى ءتىلشىسى.
– ا؟
– ايىپپۇل دەيمىز...
– ا؟
– كەشىرىڭىز، تىلشىلەردى مەنسىنبەي تۇرسىز-اۋ دەيمىن؟
– ا؟
– سيرياداعى سوعىسقا قاتىسقانى ءۇشىن باتىس قازاقستان وبلىسىنىڭ تۋماسى ون جىلعا سوتتالدى. پىكىرىڭىزدى بىلگىم كەلەدى؟
– ا؟
– نەمەنە، ا؟
– ا؟
– باق ءمينيسترىنىڭ زاڭعا «رەمي وكىل» ۇعىمىن ەنگىزىپ جاتقانىنان حاباردارسىز با؟
– ا؟
– ەگەر وزگەرىستەر ماقۇلداناتىن بولسا، تىلشىلەرگە «ا» دەپ تۇرعانىڭىز ءۇشىن ەڭبەك اقىڭىزدان قاعىلاسىز! قىزمەتىڭىز بونۋستىق-بالدىق جۇيەمەن باعالانادى!
– ا؟
– بۇدان بىلاي مەملەكەتتىك قىزمەتكەرلەردىڭ ەڭبەك اقىسى بۇقارالىق اقپارات قۇرالدارىنىڭ ساۋالدارىنا جاۋاپ بەرۋ جاعدايىنا بايلانىستى بولادى دەيمىن!
– ا؟
– تاس كەرەڭسىز بە نە؟
– ا؟
– وقۋ ورىندارىنداعى ساپاسىز جۋرفاكتار جويىلسىن دەگەنگە قالاي قارايسىز؟
– ا؟
– قىزىق ادام ەكەنسىز!
– ا؟
توپىرلاعان تىلشىلەر ءبىر-ءبىرىنىڭ: «نە دەپ جاتىر؟» دەگەن ساۋالدارىنا: «ا؟» دەگەن جاۋاپتار الىپ، اۋىزدارى اشىلا، ەكپىندەرى باسىلا تاراستى. نە دەيسىز؟ ا؟
Abai.kz
