«نۇر وتان» پارتياسىنىڭ ساياسي تالداۋ جانە ستراتەگيالىق زەرتتەۋلەر ورتالىعى «Nur Otan Talks: modernization» پىكىرتالاس الاڭى اياسىندا «جاڭعىرۋ مەن جاڭا يدەيالار ارقىلى جارقىن بولاشاققا» اتتى كونفەرەنتسيا وتكىزدى. وعان بەلگىلى بلوگەرلەر، پارتيا مۇشەلەرى ساياسات نۇربەك، دينارا ءساتجان، راحىم وشاقباەۆ جانە تاڭىربەرگەن بەردوڭعار قاتىستى. سونداي-اق، بەلگىلى ساراپشى ايدوس سارىم مەن جاس رەجيسسەر، پروديۋسسەر نۇرتاس ادامباي دا جاڭعىرۋ جونىندەگى ءوز ويلارىمەن ءبولىستى.

ءىس-شارانىڭ باستى ەرەكشەلىگى وعان قاتىسۋعا نيەت بىلدىرۋشىلەر تەك ينتەرنەت ارقىلى تىركەلدى. سول سەبەپتى كونفەرەنتسياعا قاتىسۋشىلار نەگىزىنەن پارتيالىق جاڭعىرۋ باستاماسىن جان-جاقتى تالقىلاپ، قاشاندا جاڭا يدەيالار ۇسىنۋعا دايىن تۇراتىن الەۋمەتتىك جەلىلەردىڭ بەلسەندى قولدانۋشىلارى بولدى. وسى رەتتە پارتيانىڭ اتالعان ءىس-شارا تۋرالى اقپاراتىن ەكى اپتادا 13 مىڭنان استام قولدانۋشى كورىپ، 250-دەن استام ادام قاتىسۋعا نيەت بىلدىرگەنىن ايرىقشا اتاپ وتكەن ءجون.

كونفەرەنتسيانىڭ مودەراتورى، «نۇر وتان» پارتياسى توراعاسى ءبىرىنشى ورىنباسارىنىڭ كەڭەسشىسى جاننا قۇرمانعاليەۆا پارتيا مۇشەلەرىنىڭ، ساراپشىلاردىڭ، قوعام قايراتكەرلەرىنىڭ، ماسس-مەديا وكىلدەرىنىڭ جانە ەل ەرتەڭىنە بەيجاي قارامايتىن بارشا قازاقستاندىقتار قاتىساتىن، پارتيانى جاڭعىرتۋدىڭ وزەكتى ماسەلەلەرى اشىق تالقىلاناتىن مۇنداي زاماناۋي فورماتتاعى سۇحباتتاسۋ الاڭىن قۇرۋ اسا ماڭىزى باستاما ەكەنىن ايتتى.

– «الەمدى وزگەرتكىڭ كەلسە، الدىمەن ءوزىڭدى وزگەرت» دەگەن بارشاعا ءمالىم قاعيدا بار. سوندىقتان ەلباسى جاريالاعان جاڭعىرۋ ۇدەرىسىنىڭ ءتيىمدى نۇسقاۋشىسى بولۋ ءۇشىن جانە وسى ءىستىڭ الدىڭعى لەگىندە قالۋ ءۇشىن پارتيا ءوزىنىڭ جۇمىس فورماتىن وزگەرتۋى كەرەك. سونداي-اق، ونى اشىق اقپاراتتىق قوعامنىڭ ترەندتەرىنە بەيىمدەپ، زامانانىڭ كەز كەلگەن تالابىنا جاۋاپ بەرۋگە دايىن بولۋى ءتيىس. سول سەبەپتى، ءبىز بۇگىن پارتيا جۇمىسىن جاڭعىرتۋ جولدارى جونىندە ىشكى پىكىرتالاس وتكىزىپ وتىرمىز، – دەدى جاننا قۇرمانعاليەۆا.

ءوز كەزەگىندە ساياساتتانۋشى، الەۋمەتتىك جەلىنىڭ بەلسەندىسى ساياسات نۇربەك پارتيانىڭ بىرىكتىرۋشى كۇش ەكەنىنە ەرەكشە نازار اۋدارىپ:

– قاي كەزدە دە كەدەرگىلەر مەن قارسى پىكىر بىلدىرۋشىلەر كەزدەسەدى. ياعني، جاڭعىرۋدى قولدايتىندار دا، سونداي-اق، وعان قارسى شىعاتىندار دا بولادى. وسى ماسەلەنى وڭتايلى شەشۋ ءۇشىن پارتيا ءوزىنىڭ بىرىكتىرۋشى الەۋەتىن ءتيىمدى پايدالانىپ، ەكى اۋديتوريانى ورتاق مۇددەگە توعىستىرا ءبىلۋى، – دەدى.

ءىس-شاراعا قاتىسقان بەلگىلى تەلەجۋرناليست دينارا ءساتجان پارتيانىڭ زامان اعىمىنا ىلەسىپ، قاتارىنا جاستاردى كوپتەپ تارتۋى كەرەكتىگىن ايتتى. سونداي-اق، ول پارتيانىڭ ماسس-مەديامەن بايلانىسىن ودان ءارى جاقسارتۋ جونىندە ءوز ۇسىنىسىن جەتكىزدى.

پارتيالىق جاڭعىرۋدىڭ ءمانى مەن ماڭىزى تىم تەرەڭدە ەكەنىن ايتقان بەلگىلى ساياساتتانۋشى ايدوس سارىم وسى ماسەلەنى دۇرىس ءتۇسىنۋىمىز كەرەكتىگىنە توقتالدى.

– جاڭعىرۋدى ءار ادام وزىنەن باستاۋى ءتيىس. ونى ايقايلاتىپ جارنامالاۋدىڭ دا قاجەتى جوق. ەڭ باستىسى جاڭعىرۋدىڭ ءمانى مەن ماڭىزىن دۇرىس ءتۇسىنۋىمىز كەرەك. ءبىز ءوزىمىزدىڭ ولقى تۇستارىمىز بەن ماسەلەلەرىمىزدى اشىق ايتۋدان قورىقپاۋعا ءتيىسپىز. پارتيالىق جاڭعىرۋ تەك لوگوتيپتى اۋىستىرۋ ەمەس، ناقتى قۇندىلىقتار، فيلوسوفيا ماسەلەسىن قامتيتىن اۋقىمدى ءىس ەكەنىن تۇسىنگەن كەزدە عانا پارتيا ۋاقىت تالابىنا ساي بولادى، – دەدى ايدوس سارىم.

ال پارتيانىڭ باستى قىزمەتى ستراتەگيالىق باستامالاردى ايقىنداۋ ەكەنىن ايتقان ەكونوميست راحىم وشاقباەۆ: «قازىر تەك «نۇر وتان» عانا ەمەس، ەلىمىزدەگى بارلىق پارتيا جاڭعىرۋدان ءوتۋى ءتيىس. «نۇر وتاننىڭ» تىڭ باستاماسى اياسىندا ەكونوميكالىق دامۋدىڭ ماڭىزدى ماسەلەلەرى بويىنشا اۋقىمدى پىكىرتالاستار وتكىزىلۋى كەرەك. سەبەبى، ەكونوميكالىق ءوسىم، الەۋمەتتىك تۇراقتىلىقتىڭ نىعايۋى – پارتيانىڭ باستى مىندەتى»، – دەدى.

پارتيا جانىنداعى جاستار قوزعالىسىنىڭ نەگىزىن قالاۋشىلاردىڭ ءبىرى، بۇگىندە قوعامداعى وزەكتى ماسەلەلەرمەن بەلسەنە اينالىسىپ جۇرگەن بەلگىلى جان تاڭىربەرگەن بەردوڭعار دا بۇل باسقوسۋعا ارنايى كەلدى. ءار ءىستى بىرلەسىپ اتقارۋدىڭ بەرەرى مول ەكەنىنە نازار اۋدارعان ول: «ەلىمدى جاڭعىرتۋ ءۇشىن ماعان الدىمەن ءوزىمدى جاڭعىرتۋ كەرەك. رەفورمالار جونىندەگى تىڭ باستامالار تومەننەن، ياعني پارتيا مۇشەلەرىنەن، قوعامنىڭ قاراپايىم وكىلدەرىنەن باستالۋى كەرەك. قازاقستاندىقتار پارتياعا ءوز يدەيالارىمەن كەلۋلەرى ءتيىس. ويتكەنى، پارتيا دەگەنىمىز مۇمكىندىگى مول ناقتى كۇش. سوندىقتان «جۇمىلا كوتەرگەن جۇك جەڭىل» دەگەندەي، كوزدەگەن ماقساتقا بىرلەسىپ جەتۋىمىز كەرەك»، – دەدى.

سپيكەرلەردىڭ قاتارىندا جاستار اراسىندا تانىمال اكتەر، رەجيسسەر نۇرتاس ادامباي دا بولدى. ادەتتەگىدەي ءوز ويىن اشىق بىلدىرگەن ول بىرقاتار ۇسىنىستارىن دا جەتكىزدى. ءوز سوزىندە ن.ادامباي: «پارتيانىڭ قاراپايىم حالىقپەن بايلانىسى بۇرىنعىدان دا نىعايا ءتۇسۋى ءتيىس. حالىققا ەتەنە جاقىن بولىڭىزدار. الەۋمەتتىك جەلىلەردەگى بەلسەندىلىكتى ارتتىرىڭىزدار. سەبەبى، بۇگىندە اتالعان جەلىلەردى حالىق وتە بەلسەندى قولدانادى. تانىمال بولىڭىزدار. وسى تۇرعىدان كەلگەندە پارتيا قوعامدى الاڭداتقان وتكىر ماسەلەلەر جونىندە پىكىر ءبىلدىرىپ، سوعان قاتىستى پىكىرتالاستارعا بەلسەندى قاتىسۋى كەرەك» – دەدى.

سونىمەن قاتار ءىس-شارا بارىسىندا كونفەرەنتسياعا قاتىسۋشىلار «اشىق ميكروفون» فورماتى اياسىندا سپيكەرلەر مەن پارتيا وكىلدەرىنە وزدەرىن الاڭداتقان ساۋالدارىن جولداپ، قوعامدىق سانانى جاڭعىرتۋدىڭ ماڭىزدى باعىتتارى بويىنشا پىكىرتالاستىڭ كورىگىن قىزدىردى.

جالپى بارلىق قاتىسۋشىلار كونفەرەنتسيا فورماتىنىڭ جاڭاشىلدىعى جانە كەزدەسۋدە ايتىلعان ويلاردىڭ ماڭىزدىلىعى جونىندە پىكىرلەرىن ءبىلدىرىپ، مۇنداي باستامانىڭ داستۇرگە اينالۋىنا تىلەكتەس ەكەندەرىن ءبىلدىردى.

ال كونفەرەنتسيانى ۇيىمداستىرۋشىلار بۇل باعىتتاعى پىكىرتالاستى ەلەكتروندى فورماتتا، ياعني فەيسبۋك جەلىسىندە ارنايى اشىلعان «Nur Otan Talks» پاراقشاسىندا جالعاستىرۋدى ۇسىندى.

ايتا كەتەيىك، پارتيا ساياسي كەڭەسىنىڭ كەڭەيتىلگەن وتىرىسىندا ەلباسى نۇرسۇلتان نازارباەۆ پارتيانى جاڭعىرتۋ جانە ونىڭ ساياسي جۇمىسىنا جاڭا ۇلگىلەر مەن ادىستەردى قولدانۋ كەرەكتىگى تۋرالى ناقتى تاپسىرما بەرگەن بولاتىن.

Abai.kz