جۋىردا ماڭعىستاۋ وبلىسىنىڭ اقتاۋ قالاسىندا العاشقى رەت قازاقستان رەسپۋبليكاسىنىڭ بيتۋم وندىرۋشىلەرىنىڭ كونفەرەنتسياسى وتكەن ەدى.  كونفەرەنتسياعا جول بيتۋم وندىرەتىن كومپانيالار، جول بيتۋم تۇتىنۋشىلارى، جول قۇرىلىس كومپانيالارى جانە مۇددەلى مەملەكەتتىك ورگاندارىنىڭ، اتاپ ايتقاندا، قر ەنەرگەتيكا مينيستىرلىگى مەن قر ينۆەستيتسيالار جانە دامۋ مينيسترلىگىنىڭ وكىلدەرى كاتىستى.

كونفەرەنتسيادا ماڭعىستاۋ وبلىسىنىڭ اكىمى ەرالى توعجانوۆ ءوندىرىس وشاعىنىڭ ماڭىزدىلىعىنا توقتالدى.

-اقتاۋ بيتۋم زاۋىتى 2013 جىلى قازاقستان رەسپۋبليكاسىنىڭ پرەزيدەنتى نۇرسۇلتان ءابىشۇلى نازارباەۆتىڭ باستاماسىمەن  قازاقستان رەسپۋبليكاسى 2010-2014 جىلدارعا ارنالعان ۇدەمەلى-يندۋستريالدى-يننوۆاتسيالىق دامۋ مەملەكەتتىك باعدارلاماسى اياسىندا ىسكە قوسىلعان بولاتىن.  باستاپقى ىسكە قوسىلعان كەزدە 50-60 مىڭ توننا ءونىم شىعارىلسا، بيىلعى جىل باسىنان بەرى زاۋىت 230 مىڭ توننا جول بيتۋمدارىن ءوندىرۋ دەڭگەيىنە جەتتى. اقتاۋ زاۋىتىنىڭ بيتۋمى بارلىق كورسەتكىشتەرى بويىنشا مەملەكەتتىك ستاندارتتار (ست قر 1373-2013) تالابىنان جوعارى جانە ەڭ ۇزدىك حالىقارالىق ۇلگىلەرگە سايكەس ەكەنىن ەرەكشە اتاپ وتكىم كەلەدى،- دەدى ايماق باسشىسى.

بۇگىنگى تاڭدا زاۋىت ونىمدەرى «نۇرلى جول» مەملەكەتتىك باعدارلاماسى شەڭبەرىندە «باتىس ەۋروپا – باتىس قىتاي» حالىقارالىق كولىك تراسسالارى، «شىمكەنت - قىزىلوردا»، «استانا - پاۆلودار»، «استانا - تەمىرتاۋ»، «اتىراۋ - اقتاۋ» سەكىلدى رەسپۋبليكالىق ماڭىزى بار كولىك جولدارىنا توسەۋ ءۇشىن كەڭىنەن پايدالانىلادى.

كونفەرەنتسيا بارىسىندا، جول قۇرىلىس سالاسىنىڭ زاماناۋي تالاپتارىنا ساي بولاتىن، جوعارى ساپالى جول بيتۋمىنىڭ ءوندىرۋى جانە جاڭا حيميالىق قوسپالارعا دەگەن سۇرانىستىڭ قالىپتاستىرۋ ماسەلەلەرى تالقىلاندى. سونىمەن قاتار، ورالعان بيتۋمنىڭ شىعارىلۋ مۇمكىندىگىن ەسكەرە وتىرىپ، جول بيتۋمىن جىلدىق ءوندىرىس نىسانىنا كوشۋ شارتتارى قاراستىرىلدى.

ايتا كەتەيىك، 22 قاراشادا زاۋىت العاش بيگ-بەگتەگى جول بيتۋمىنىڭ 60 توننا كولەمىندە العاشقى پارتياسىن ەكسپورتقا شىعاردى.  بيگ-بەگ – بۇل سىيىمدىلىعى 1000 كگ دەيىن، ءونىمدى كەز-كەلگەن تەمپەراتۋرادا تاسىمالداۋ مەن ساقتاۋعا مۇمكىندىك بەرەتىن، ءبىر رەت پايدالانىلاتىن ارنايى تاسىمالداۋ ىدىسى. ءدال وسى تاسىلمەن، ياعني كورشىمىز قىتاي ەلىنە ەكپورتتالدى.

«قىتايلىق كومپانيامەن ءبىزدىڭ ارىپتەستىگىمىزدىڭ ناتيجەسىندە، ءبىز جوعارى ساپالى ءونىمدى تەك ورتالىق ازيا ەلدەرىنە عانا ەمەس، سونىمەن قاتار قىتايعا ەكسپورتتاۋ مۇمكىندىگىنە يە بولدىق» - دەپ اتاپ كورسەتتى «CASPI BITUM بك» جشس ديرەكتورىنىڭ ورىنباسارى ساكەن ۋتەلباەۆ. وسىلايشا، 2017 جىلدىڭ قاڭتار ايىندا جول بيتۋمىنىڭ 65 تونناسى العاش وزبەكستانعا ەكسپورتقا جىبەرىلدى.

كونفەرەنتسيانىڭ سوڭىندا كاسپي بيتۋم زاۋىتى مەن ش. ەسەنوۆ اتىنداعى كاسپي مەملەكەتتىك ۋنيۆەرسيتەتىنىڭ باسشىلىعى ءوزارا ىنتىماقتاستىق تۋرالى مەموراندۋمعا قول قويدى. ونىڭ شەڭبەرىندە ءبىلىم وشاعىنىڭ جانىندا كاسىپورىنعا ماماندار دايارلاۋ مەن قايتا دايارلاۋدى ۇيىمداستىرۋ، زاۋىت ماماندارىن وقۋ پروتسەسىنە جۇمىلدىرۋ، تەحنولوگيالىق ستارت-اپتاردى قالىپتاستىرۋعا مۇمكىندىك تۋعىزۋ جانە مۇناي ءوندىرۋ سالاسىندا عىلىمي زەرتتەۋلەرگە جاعداي جاساۋ جوسپارلانعان.

ەرعالي بەرىكۇلى

اقتاۋ

Abai.kz