بۇگىن جۇمىس ساپارى بارىسىندا الماتى اكىمى باۋىرجان بايبەك قالا بيۋدجەتىنىڭ ەسەبىنەن الىنعان كوممۋنالدىق قىزمەت پەن ىشكى ىستەر دەپارتامەنتى جاڭا ارنايى تەحنيكالارىن قاراپ شىقتى.

مەگاپوليس باسشىسىنا قىس كەزىندە قالا كوشەلەرىن تازالايتىن ارنايى تەحنيكا دا كورسەتىلدى.

بۇلار كاماز شاسسيىندەگى قۇرامالى 14 تازالاعىش ماشينالار، وتىمدىلىگى جوعارى Unimog ءۇش كوپفۋنكتسيونالدى تازالاعىش كولىك، ەكى Snowbooster قار تازالايتىن ماشينالار، كونۆەيەر-ۆاكۋمدى Dulevو ماشيناسى، قار تازالايتىن 16 Pony ماشيناسى، 20 ميني تراكتورلار مەن ميني تيەگىشتەر.

«قالادا جاياۋ جۇرگىنشىلەر ءۇشىن جاقسى جاعدايلار جاسالۋدا، دەمەك، قىستا تروتۋارلاردى تازالاۋعا ەرەكشە ءمان بەرىلەدى. قالانىڭ تاريحي ورتالىعىنىڭ ۇشتەن ءبىرىنىڭ جاڭارۋىنا وراي ارنايى تەحنيكالار – كوپفۋنكتسيونالدى Pony ماشيناسى، مينيتيەگىشتەر، جەڭىل تراكتورلار الىندى. جۇمىسشىلار اقاۋ كەلتىرمەيتىن قۇرالداردى پايدالاناتىن بولادى»، - دەدى تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ باسشىسى اسەت ماساباەۆ.

قالادا تازالاناتىن جولدىڭ جالپى كولەمى 20 ملن. م². قىستا كوشە تازالاۋمەن 15 مەردىگەر ۇيىم، 1116 ارنايى تەحنيكا بىرلىگى اينالىسادى. جول تازالاۋمەن اينالىساتىن جۇمىسشىلار قاتارىن 1,2 دەن 2,7 مىڭ ادامعا كوبەيتۋ قاراستىرىلعان.

بۇلاردان وزگە قالا اۋداندارىندا وندىرىستىك بازالار قۇرىلعان، سونىڭ ارقاسىندا كوشە تازالاۋ جىلدامدىعى 1,5 ەسەگە ارتادى. جۇمىسشىلار ديسلوكاتسياسى جانىنا ولاردىڭ كيىمدەرىن اۋىستىرۋعا، ىستىق سۋسىندار ءىشىپ، جىلىنۋىنا مۇمكىندىك بەرەتىن ءمودۋلدى كونتەينەرلەر قويىلادى.

جۇمىس ساپارى بارىسىندا مەگاپوليس اكىمى پوليتسيانىڭ جاڭا اۆتوكولىكتەرىن قاراپ شىعىپ، ىشكى ىستەر ورگاندارىنىڭ ماتەريالدىق-تەحنيكالىق بازاسىن جاقسارتۋ قىلمىسپەن كۇرەسكە جانە قۇقىقتىق ءتارتىپتى كۇشەيتۋگە وڭ ىقپال ەتەتىنىن اتاپ ءوتتى.

ءىىد-ءنىڭ باستىعى سەرىك كۇدەباەۆ كوشەلەرگە پاترۋل جاساۋ ءۇشىن وتاندىق ءارى گازبەن جۇرەتىن 200-دەن استام جەڭىل اۆتوكولىك بىرلىگى الىنعاندىعىن جەتكىزدى. بۇلاردان وزگە جەكە قۇرامدى تاسىمالدايتىن ەكى اۆتوبۋس پەن بىرنەشە ميكرواۆتوبۋستار، ەكى ءورت اۆتوتسيستەرناسى جانە 34 ەۆاكۋاتور الىنعان. ونىڭ ۇستىنە، 147 اۆتوماشينا ۆيدەورەگيستراتورلارمەن جابدىقتالعان.

ايتا كەتەرلىگى، الماتىدا وتكەن جىلمەن سالىستىرعاندا بيىل قۇقىق قورعاۋ ورگاندارىن ماتەريالدىق –تەحنيكالىق جابدىقتاۋعا قارجى 2 ەسە كوپ جۇمسالعان. ەگەر 2016 جىلى 706 ميلليون تەڭگەگە 118 جاڭا قىزمەتتىك كولىك الىنسا، بيىل قالا بيۋدجەتى ەسەبىنەن 3,5 ملرد. تەڭگەگە ءتۇرلى مودەلدەگى 280 كولىك الىنعان.

Abai.kz